Oghẹrẹ nọ Ma Sai ro Dhesẹ Uyoyou kẹ Erivẹ Mai

Mai kpobi na yọ uviuwou ovo keme Adamu o yẹ omai. U fo nọ ahwo nọ a no uviuwou ovo ze a re you ohwohwo jẹ rọ adhẹẹ kẹ ohwohwo, rekọ ere akpọ na ọ rrọ enẹna ha. Ọghẹnẹ nọ ọ ma omai na ọ gwọlọ nọ ma re yerikugbe wọhọ uviuwou ovo.

OWARE NỌ IKEREAKERE NA E TA KPAHE UYOYOU

“Who re you ọrivẹ ra wọhọ omara hrọ.”​—IRUO-IZERẸ 19:18.

“Wha gbẹ hai you ewegrẹ rai.”​—MATIU 5:44.

OWARE NỌ U DHESẸ RE MA YOU ERIVẸ MAI

Muẹrohọ oghẹrẹ nọ Ọghẹnẹ o dhesẹ uyoyou evaọ Ẹme riẹ evaọ obe 1 Ahwo Kọrint 13:4-7:

“Uyoyou u re wo odiri, o tẹ jẹ rrọ wowou.”

Roro kpahe onana: Ẹvẹ o rẹ jọ owhẹ oma nọ amọfa a tẹ rrọ wowou kugbe owhẹ, je bi wo odiri kẹ owhẹ nọ whọ tẹ maki ru oware thọ?

“Uyoyou o rẹ re ihri hi.”

Roro kpahe onana: Ẹvẹ o rẹ jọ owhẹ oma nọ amọfa a gbe bi viẹro ku owhẹ hayo re owhẹ ihri hi?

Uyoyou “o rẹ gwọlọ ewoma obọriẹ hẹ.”

Roro kpahe onana: Ẹvẹ o rẹ jọ owhẹ oma nọ amọfa a tẹ be rọwo fihọ ẹme nọ whọ ta yọ a re sikẹ nọ ọrai ọvo whọ rẹ rọwo ho?

Uyoyou “u re koko eware edada nọ a ru rie fihọ eva ha.”

Roro kpahe onana: Ọghẹnẹ ọ rẹ rọvrẹ ahwo nọ a ru rie thọ nọ a te kurẹriẹ. Ikereakere na e ta nọ: “Ọ rẹ gwọlọ iruthọ ribri hi, yọ o re mu ofu bẹdẹ bẹdẹ hẹ.” (Olezi 103:9) Avro ọ riẹ hẹ, o rẹ were omai nọ ohwo nọ ma ru thọ ọ tẹ rọvrẹ omai. Fikiere, u fo nọ ma rẹ rọvrẹ amọfa nọ a te ru omai thọ.​—Olezi 86:5.

Uyoyou “o rẹ ghọghọ fiki emuemu hu.”

Roro kpahe onana: Nọ oware uyoma o tẹ via kẹ omai, o rẹ kẹ omai uye nọ amọfa a tẹ be hwẹ omai. Fikiere ma rẹ ghọghọ họ nọ uye u te te amọfa, o tẹ make rọnọ ahwo na a ru omai oware odada evaọ oke nọ u kpemu dede.

Ma tẹ gwọlọ wo eghale Ọghẹnẹ, ma re you amọfa ghelọ oghẹrẹ ohwo nọ a rrọ kẹhẹ. Edhere jọ nọ ma sai ro ru onana họ, nọ ma te bi fiobọhọ kẹ ahwo nọ a gwọlọ obufihọ.