Ẹvẹ Ma Sai ro You Inievo Mai Ẹsikpobi?

1-2. (a) Fikieme Pọl ọ rọ ta nọ uyoyou họ oware nọ “o mae rro”? (b) Enọ vẹ ma te kẹ iyo rai?

OKENỌ Pọl ukọ na ọ jẹ ta ẹme kpahe ẹrọwọ, ẹruore, gbe uyoyou, enẹ o ro ku ẹme na họ di, anọ “onọ o mae rro evaọ usu rai họ uyoyou.” (1 Kọr. 13:13) Fikieme Pọl ọ rọ ta nọ uyoyou o mae rro? Nọ ma tẹ ruọ akpọ ọkpokpọ na no, ma ti gbe du fi ẹrọwọ họ eyaa nọ Jihova ọ ya kpahe akpọ ọkpokpọ na ha, yọ ma ti gbe du rẹro eware nọ Ọghẹnẹ ọ ya eyaa rai na ha keme aikpobi i rugba no. Kọ uyoyou? Ma ti gbe you Jihova gbe ahwo-akpọ ibe mai oke yena. Yọ ma ti tube you rai viere nọ oke o be nya na.

² Nọ orọnọ uyoyou o te jariẹ bẹdẹ bẹdẹ na, ma te kẹ iyo enọ esa jọ. Orọ ọsosuọ, fikieme u je fo re ma you ohwohwo? Orọ avọ ivẹ, eme u re dhesẹ nọ ma you inievo mai? Orọ avọ esa, eme ma re ru re ma hai you ohwohwo ẹsikpobi?

FIKIEME U JE FO RE MA YOU OHWOHWO?

3. Fikieme u ro fo re ma you inievo mai?

³ Fikieme o jẹ roja re ma you ohwohwo? Keme ma te you ohwohwo, oye ahwo a rẹ rọ riẹ nọ mai họ Ileleikristi uzẹme. Jesu ọ vuẹ ikọ riẹ nọ: “Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.” (Jọn 13:35) U te no ere no, ma te you ohwohwo, mai kpobi na ma rẹ jọ ọvo. Pọl ọ ta nọ uyoyou “o rẹ wha okugbe ọkpekpe ze.” (Kọl. 3:14) Rekọ oware ofa jọ o riẹ nọ u ro fo re ma you ohwohwo, yọ oware na u wuzou gaga. Jọn ukọ na o kere se Ileleikristi nọ: “Ohwo kpobi nọ o you Ọghẹnẹ o re je you oniọvo riẹ hrọ.” (1 Jọn 4:21) Nọ ma te you inievo mai, yọ ma bi dhesẹ nọ ma you Jihova.

4-5. Kẹ oriruo jọ nọ u dhesẹ nọ ma te you inievo mai, u re dhesẹ nọ ma you Jihova.

⁴ Ẹvẹ uyoyou nọ ma re you inievo mai u re ro dhesẹ nọ ma you Jihova? Joma rọ oriruo jọ dhesẹ iẹe. Nọ edọktọ ọ tẹ gwọlọ riẹ sọ ubiudu ohwo u bi kie ziezi, ọ sai fi oware jọ họ oria jọ oma ohwo na. Ọ sai fi oware na họ obọ ohwo na. Kọ eme ma be ta na?

⁵ Wọhọ epanọ edọktọ o re fi oware họ obọ ohwo re ọ riẹ epanọ ubiudu ohwo na o rrọ na, ma te rri oghẹrẹ nọ ma bi lele inievo mai yeri, o sae lẹliẹ omai riẹ sọ ma you Jihova gaga. Nọ ma tẹ ruẹ nọ ma gbe you inievo na tere he, kiyọ o wọhọ nọ ma gbe you Jihova tere he. Rekọ nọ ma te you inievo ukoko na gaga, u re dhesẹ nọ ma gine you Jihova gaga.

6. Ma tẹ ruẹ nọ ma gbe you inievo mai tere he, fikieme ma re ro ru oware jọ kpahe iẹe vẹrẹ vẹrẹ? (1 Jọn 4:7-9, 11)

⁶ Ma tẹ ruẹ nọ ma gbe you inievo ukoko na tere he, ma re ru oware jọ kpahe iẹe vẹrẹ vẹrẹ keme oware jọ u muhọ ẹthọ no. Eme ma rọ ta ere? Keme ẹfa no usu mai avọ Jihova o rrọ na! Jọn ukọ na ọ vẹvẹ omai unu kpahe oware yena. Ọ ta nọ: “Ohwo nọ o you oniọvo riẹ hẹ, ọnọ ọ be ruẹ, ọ rẹ sai you Ọghẹnẹ hẹ, ọnọ ọ re ruẹ hẹ.” (1 Jọn 4:20) Eme ọ be ta kẹ omai na? Ma te “you ohwohwo,” ẹsiẹe ọvo eva mai e sae rọ were Jihova.—Se 1 Jọn 4:7-9, 11.

ẸVẸ MA SAI RO DHESẸ NỌ MA YOU OHWOHWO?

7-8. Eware jọ vẹ ma re ru nọ i re dhesẹ nọ ma you ohwohwo?

⁷ A jọ Ebaibol rọ ẹme uyoyou fa ẹgogo kẹ omai unuẹse buobu. Ọghẹnẹ o jie uzi kẹ omai nọ ma re “you ohwohwo.” (Jọn 15:12, 17; Rom 13:8; 1 Tẹs. 4:9; 1 Pita 1:22; 1 Jọn 4:11) Rekọ uyoyou nọ ma be ta ẹme riẹ na, obọ eva o rẹ jọ. Kọ ẹvẹ ma sai ro dhesẹ iẹe via? Ẹme nọ ma be ta gbe eware nọ ma bi ru ma re ro dhesẹ iẹe via.

⁸ Eware buobu e riẹ nọ ma re ru nọ i re dhesẹ nọ ma you inievo mai. Rri eware jọ nọ Ebaibol ọ ta nọ ma re ru. “Wha ta uzẹme kẹ ohwohwo.” (Zẹk. 8:16) “Wha rọ udhedhẹ lele ohwohwo rria.” (Mak 9:50) “Evaọ ọghọ ọrọkẹ ohwohwo, kobaro.” (Rom 12:10) “Wha dede ohwohwo rehọ.” (Rom 15:7) “Wha gbẹ hai . . . rọvrẹ ohwohwo.” (Kọl. 3:13) “Wha hai fiobọhọ wọ ewha egbẹgbẹdẹ ohwohwo.” (Gal. 6:2) “Wha hae . . . sasa ohwohwo oma.” (1 Tẹs. 4:18) “Wha gbẹ hae . . . bọ ohwohwo ga.” (1 Tẹs. 5:11) “Wha . . . lẹ kẹ ohwohwo.”—Jem. 5:16.

9. Fikieme o jẹ rọnọ ma tẹ be sasa inievo mai oma, yọ ma bi dhesẹ nọ ma you rai? (Rri uwoho na re.)

⁹ Joma ta ẹme kpahe oware jọ evaọ usu eware nọ ma ta ẹme te evaọ edhe-ẹme avọ eree na. Pọl ọ vuẹ Ileleikristi nọ: “Wha hae . . . sasa ohwohwo oma.” Oware jọ nọ u re dhesẹ nọ ma you inievo mai họ, nọ ma tẹ be hae sasa ae oma. Fikieme ma rọ ta ere? Obe jọ nọ o rẹ fa otọ eme Ebaibol o ta nọ, ẹme nọ a fa “sasa” oma na, u dhesẹ epanọ “ohwo o re dikihẹ gba ohwo nọ uye o be bẹ re ọ tuduhọ iẹe awọ.” Nọ ẹbẹbẹ o te te oniọvo mai oma, nọ ma jẹ be sasa iẹe oma, o rẹ lẹliẹe kru udu ga, ọ vẹ gbẹ be gọ Jihova vrẹ. Ma tẹ be hae sasa inievo mai oma, yọ ma bi dhesẹ nọ ma you rai.—2 Kọr. 7:6, 7, 13.

10. Fikieme ma rọ ta nọ ohrọ-oriọ gbe omosasọ okọ gbe uvi?

¹⁰ Ohrọ-oriọ avọ omosasọ okọ gbe uvi. Ẹvẹ ma rọ ta ere? Keme nọ ohwo o te wo ohrọ-oriọ, ẹsiẹe ọ te mae rọ gwọlọ sasa omọfa oma, ọ vẹ jẹ gwọlọ epanọ o re ro fiobọhọ kẹe. Fikiere jọ ohrọ ahwo o hae re omai, keme ẹsiẹe ma te rọ gwọlọ sasa ae oma. Pọl ọ ta ẹme jọ nọ u dhesẹ nọ fikinọ Jihova ọ rẹ re ohrọ ohwo gaga, oye o be lẹliẹe sasa omai oma. Ọ ta nọ Jihova yọ “Ọsẹ nọ o wo ohrọ-oriọ gbe Ọghẹnẹ omosasọ kpobi.” (2 Kọr. 1:3) Pọl ọ rọ ẹme nọ ọ ta dhesẹ nọ ohwo nọ o wo ohrọ-oriọ, ọ tẹ ruẹ ohwo nọ uye o be bẹ, o rẹ dae. Oyejabọ o ro se Jihova “Ọsẹ nọ o wo ohrọ-oriọ” keme ọye ọ rẹ mae re ohrọ ohwo kpaobọ. Yọ oye o wha riẹ ze nọ ọ be hae rọ sasa omai oma “evaọ edawọ mai kpobi.” (2 Kọr. 1:4) Nọ uvo o tẹ be rro gaga, nọ ohwo ọ jẹ da ame odhedhẹ, oma u re ru ei riẹe. Ere ọvona re, nọ ẹbẹbẹ o te te omai oma, nọ Jihova ọ jẹ sasa omai oma, udu u re te omai otọ. Kọ ẹvẹ ma sae rọ rehọ aro kele Jihova? Ma rẹ daoma wo uruemu nọ o rẹ lẹliẹ omai gwọlọ sasa amọfa oma. Uruemu vẹ oye?

11. Eme obe Ahwo Kọlọsi 3:12 gbe 1 Pita 3:8 o ta nọ ma re wo, nọ o rẹ lẹliẹ omai sasa amọfa oma?

¹¹ Eme ma re ru re ma sai you ohwohwo gaga, ma vẹ hae “sasa ohwohwo oma” ẹsikpobi? Ma re wo ororokẹ, ma ve je wo uyoyou-inievo. (Se Ahwo Kọlọsi 3:12; 1 Pita 3:8.) Eme ma ti ru nọ ma te wo iruemu yena? Nọ ma te wo ohrọ-oriọ gbe ororokẹ evaọ obọ udu mai, ma tẹ ruẹ ohwo nọ uye u te oma, ma te hae gwọlọ epa kpobi nọ ma rẹ rọ sasa iẹe oma. Jesu ọ ta nọ “eme ibuobu nọ e vọ udu na eye unu o rẹ ta via. Emamọ ohwo ọ rẹ rehọ emamọ eware no emamọ eware nọ o kokohọ ze.” (Mat. 12:34, 35) Nọ ma tẹ be hae sasa inievo mai oma, yọ obọdẹ edhere jọ nọ ma re ro dhesẹ nọ ma you rai.

EME MA RE RU RE MA HAI GBE YOU INIEVO MAI VRẸ ERE ỌVO?

12. (a) Fikieme u je fo re ma rri otọ mu? (b) Onọ vẹ ma te kẹ uyo riẹ?

¹² Mai kpobi ma gwọlọ “you ohwohwo ẹsikpobi.” (1 Jọn 4:7) O make rrọ ere na, u fo nọ ma rẹ kareghẹhọ nọ Jesu ọ ta nọ “uyoyou ibuobu u ti kiekpo.” (Mat. 24:12) Orọnikọ Jesu ọ be ta nọ ilele riẹ buobu a ti gbe you ohwohwo ho ho. Rekọ u fo re ma rri otọ mu re uyoyou u gbe fi omai obọ kie he keme uyoyou u kiekpo gaga no evaọ akpọ na. Oye o soriẹ ze nọ ma te rọ kẹ uyo onọ jọ nọ u wuzou gaga. Oye họ, ẹvẹ ma sae rọ riẹ sọ ma gbe gine you inievo mai gaga?

13. Ẹvẹ ma sae rọ riẹ sọ ma gbe gine you inievo mai gaga?

¹³ Oware jọ nọ o rẹ lẹliẹ omai riẹ sọ ma gbe gine you inievo mai gaga họ, ma re roro kpahe oware nọ ma be hai ru nọ oghẹrẹ oware jọ o tẹ via. (2 Kọr. 8:8) Pita ukọ na ọ ta ẹme te oware utioye jọ. Ọ ta nọ: “Maero, wha wo uyoyou ogaga kẹ ohwohwo, keme uyoyou u re ruru izieraha buobu.” (1 Pita 4:8) Ma te roro kpahe oware nọ ma be hai ru nọ oniọvo o te ru omai thọ, o te lẹliẹ omai riẹ sọ ma gbe gine you inievo mai gaga.

14. Oghẹrẹ uyoyou vẹ 1 Pita 4:8 o ta nọ ma re wo? Kẹ oriruo.

¹⁴ Joma rri ẹme nọ Pita ọ jọ oria Ebaibol yena ta na ziezi. Ọ jọ obọ emuhọ owọ avọ eree na fodẹ oghẹrẹ uyoyou nọ u fo nọ ma re wo. Oye họ, “uyoyou ogaga.” Ẹme nọ Pita o kere, nọ a fa uyoyou “ogaga” na, u dhesẹ epanọ a rẹ rriẹ oware fihọ oria. Abọ avọ ivẹ owọ avọ eree na o fodẹ oware nọ u re noi ze nọ ma te wo uyoyou ogaga kẹ inievo mai. O ta nọ: “Uyoyou u re ruru izieraha buobu.” Eme họ otọ ẹme na? Joma kẹ oriruo jọ. Nọ eware i te wholo ehru itebo, nọ ohwo ọ jẹ yẹ ohọ ruru ehru itebo na, ohọ na u re ruru eware na kpobi no, orọnọ ejọ ọvo ho. Ere ọvona re, nọ ma te wo uyoyou ogaga kẹ inievo mai, orọnikọ ma tẹ rọvrẹ rai ẹsiẹvo hayo isiava, yọ u re no ho. Rekọ ma te hae rọvrẹ rai wọhọ ẹsenọ ma be rọ uyoyou mai ruru ‘izieraha rai buobu.’

15. Ma te gine you inievo mai gaga, eme o te lẹliẹ omai ru? (Ahwo Kọlọsi 3:13)

¹⁵ Uyoyou nọ ma wo kẹ inievo mai o tẹ ginẹ rrọ gaga, ma te hae rọvrẹ rai. O tẹ make rọnọ a ru omai oware nọ o da omai te ẹzi, ma te rọvrẹ rai ghele. (Se Ahwo Kọlọsi 3:13.) Nọ ma tẹ be hae rọvrẹ inievo mai, u re dhesẹ nọ ma you rai gaga, yọ ma gwọlọ ru eva were Jihova. Kọ eme ọfa o sai fiobọhọ kẹ omai lele inievo mai riẹ yeri, a tẹ maki wo uruemu nọ o rẹ dha omai eva, hayo nọ a te ru omai thọ?

16-17. Eme ọfa o sai fiobọhọ kẹ omai hae kpairoro vrẹ iruthọ inievo mai? Kẹ oriruo. (Rri uwoho na re.)

¹⁶ U fo re ma hai roro kpahe eware nọ inievo mai a be riẹ ru, orọnikọ iruthọ rai hi. Joma kẹ oriruo jọ. Dae rehọ iẹe nọ whẹ avọ inievo jọ wha kpohọ oria jọ nyae reakpọ kuoma. Eva e be were ohwo kpobi. Re wha te ti kpo, wha te kuomagbe ruọ uwoho. Iwoho nọ wha rehọ i te esa. Rekọ whọ tẹ ruẹ nọ ọvo jọ evaọ usu rai, oniọvo jọ ọ jariẹ si ovao họ. Kọ eme who ti ru uwoho yena? Who ti si ei no ifonu ra, whọ vẹ nyasiọ ivẹ nọ i kiọkọ nọ oniọvo na gbe ahwo nọ i kiọkọ a be jọ hwẹ na ba.

¹⁷ Iwoho itieye na e wọhọ eware nọ ma rẹ kareghẹhọ kpahe inievo mai. Ẹsejọ ma rẹ kareghẹhọ emamọ eware nọ mai avọ inievo mai ma ru kugbe. Kọ otẹrọnọ oniọvo jọ ọ ta ẹme hayo o ru oware jọ nọ o kẹ omai uye, eme ma ti ru? Kọ oye ma te hai roro kpahe? Ijo. Ma rẹ daoma si oware yena no udu no wọhọ epanọ ma re si uwoho nọ o woma ha no ifonu mai na. (Itẹ 19:11; Ẹf. 4:32) Ma riẹ nọ u wo eware iwoma efa buobu nọ oniọvo na o ru no. Yọ eye u fo nọ ma rẹ kareghẹhọ.

OWARE NỌ O JẸ ROJA RE MA YOU INIEVO MAI GAGA ENẸNA

18. Eware jọ vẹ ma jọ uzoẹme nana wuhrẹ kpahe uyoyou no?

¹⁸ Fikieme o jẹ roja re ma hai you inievo mai? Ma wuhrẹ nọ ma te you inievo ukoko na, u re dhesẹ nọ ma you Jihova. Kọ ẹvẹ ma sai ro dhesẹ nọ ma you inievo na? Ma rẹ hae sasa ae oma. Yọ oware jọ nọ o te lẹliẹ omai hae “sasa ohwohwo oma” họ, nọ ma te wo ohrọ-oriọ. Kọ eme ma re ru re uyoyou nọ ma you inievo mai u gbe fi omai abọ kie he? Ma rẹ daoma hae rọvrẹ rai.

19. Fikieme o jẹ roja re ma you inievo ukoko na gaga enẹna?

¹⁹ Fikieme o jẹ roja re ma you inievo mai gaga enẹna? Pita ukọ na ọ kẹ uyo onọ na. Ọ ta nọ: “Urere eware kpobi o kẹle no. Fikiere, . . . wha wo uyoyou ogaga kẹ ohwohwo.” (1 Pita 4:7, 8) Nọ ekuhọ akpọ na o kẹle kpobi no na, oware jọ o te via. Eme ọye? Jesu ọ ta kẹ ilele riẹ nọ: “Erẹwho na kpobi i ti mukpahe owhai fiki odẹ mẹ.” (Mat. 24:9) Nọ a ti mukpahe omai na, oware nọ u ti fiobọhọ kẹ omai họ, nọ ma tẹ be riẹ yerikugbe ohwohwo. Ma te ru ere, Ẹdhọ ọ tẹ maki ru kẹhẹ, ọ te sae wha ozighi fihọ udevie mai hi keme ma you ohwohwo gaga. Yọ uyoyou “o rẹ wha okugbe ọkpekpe ze.”—Kọl. 3:14; Fil. 2:1, 2.