Ile Uvie na nọ E rẹ Lẹliẹ Oma Ohwo Jaja

Nọ Pọl avọ Saelas a jọ uwou-odi, a jẹ so ile jiri Ọghẹnẹ. (Iru 16:25) Evaọ oke mai na, ibe Ileleikristi mai a jẹ so ile Uvie na nọ a jọ ega uye obọ Sachsenhausen, evaọ otọ esuo Nazi evaọ Germany gbe oke nọ a wọ ai kpohọ Siberia. Iku nana i dhesẹ epanọ ile esuọ i wo ẹgba te gbe epanọ e sai ro ru oma ohwo jaja nọ ọ tẹ rrọ uye.

Evaọ obaro, evẹrẹ efa a ti wo obe-ile ọkpokpọ na “Sing Out Joyfully” to Jehovah. Nọ o tẹ nwani te omai obọ no, a joma wuhrẹ eme ile na fihọ uzou evaọ oke egagọ uviuwou mai. (Ẹf 5:19) Kẹsena ẹzi ọfuafo na o ve fiobọhọ kẹ omai kareghẹhọ ai nọ ma tẹ rrọ otọ edawọ. Ile Uvie na i re fiobọhọ kẹ omai tẹrovi ẹruore mai. E rẹ sai ru omai jọ jajaja nọ edawọ i te te omai. Nọ eva e tẹ be were omai, eme ile na e rẹ wọ omai ‘so ile avọ oghọghọ.’ (1Ir 15:16; Ol 33:​1-3) A joma so ile Uvie na evaọ oke kpobi!

WHA RRI IVIDIO NA OLE NỌ O KẸ IRUIRUO OGAGA, KẸSENA WHA VẸ KIYO ENỌ NANA:

• Uyero vẹ Brọda Frost ọ jọ nọ o lẹliẹ e riẹ kere eme ole na?

• Ẹvẹ ole na ọ rọ kẹ inievo nọ e jọ ega uye obọ Sachsenhausen ẹgba?

• Evaọ iyero sa-sa vẹ ile Uvie na e sae rọ kẹ omai omosasọ kẹdẹ kẹdẹ?

• Ile Uvie na vẹ whọ gwọlọ wuhrẹ fihọ uzou?