Ọghẹnẹ nọ Ọ Ma Omai na O You Omai Gaga

1. ỌGHẸNẸ O BI RU ỌRE NA VA ZE

Ababọ ọre na, oware ovuovo o rẹ sae zọ evaọ akpọ na ha. Ọre na o bi fiobọhọ kẹ ire nọ e be sae rọ ta ebe, whẹ ivo họ jẹ mọ ibi. Ọre na o bi fiobọhọ kẹ ire nọ e be sae rọ rehọ awọ rai se ame no otọ ze kpobọ ebe rai. Kẹsena ame na o ve no ebe na ruọ ofou.

2. ỌGHẸNẸ O BI RU OSO RRỌ

Oso nọ ọ rẹ rrọ na yọ emamọ okẹ nọ u no obọ Ọghẹnẹ ze. Oso o re ru nọ ekakọ i re ro woma re ma ruẹ emu re. Ọghẹnẹ o bi ru nọ iso e rẹ rọ rrọ evaọ ezi rai, je ru nọ ekakọ e rẹ rọ mọ ziezi re ma wo emuore buobu.

3. ỌGHẸNẸ O BI FIOBỌHỌ KẸ OMAI WO EMU GBE IWU NỌ MA RE KUHỌ

Nẹnẹ, esẹ buobu a rẹ ruawa kpahe epanọ iviuwou rai a sae rọ ruẹ emu re jẹ ruẹ iwu kuhọ. Ebaibol na ọ ta nọ: “Wha muẹrohọ evra obọ ehru na ziezi; a rẹ kọ ibi hayo vu hayo koko fihọ iwou nọ a rẹ jọ sẹro eware he, ghele na, Ọsẹ obọ odhiwu rai ọ be kuọ ae. Kọ wha gbẹ ghare vi ae?”​—Matiu 6:25, 26.

“Wha wuhrẹ mi idodo obọ ẹwọ, epanọ e be rọ rro . . . ; rekọ mẹ be ta kẹ owhai nọ makọ epanọ Solomọn [ovie na] o wo oruaro te na, ọ gọ ẹgọ woma te idodo nana ọvuọvo ho. Whaọ otẹrọnọ Ọghẹnẹ ọ be gọ ododo obọ ẹwọ ẹgọ te enẹ . . . , kọ ọ gbẹ sae gọ owhai ẹgọ viere?”​—Matiu 6:28-30.

Nọ orọnọ Ọghẹnẹ o bi fiobọhọ kẹ omai wo emuore gbe iwu nọ ma re kuhọ na, ọ sai fiobọhọ kẹ omai wo eware efa nọ e ginẹ roja evaọ uzuazọ. Ma te bi ru oreva Ọghẹnẹ, ọ rẹ ghale iruo abọ mai otẹrọnọ iruo ẹwọ ma bi ru hayo fiobọhọ kẹ omai ruẹ iruo nọ ma re ru re ma wo ugho dẹ eware nọ ma gwọlọ.​—Matiu 6:32, 33.

Ma te roro kpahe ọre na, oso, evra, gbe idodo, u fo nọ ma re yere Ọghẹnẹ je you rie. Evaọ uzoẹme nọ o rrọ aro na, ma te ta kpahe oghẹrẹ nọ Ọghẹnẹ ọ jẹ hae rọ ta ẹme kẹ ahwo-akpọ.