Eria Ekiakiẹ Rọkẹ Obe Ewuhrẹ Uzuazọ Oleleikristi gbe Usi Uwoma Ota Mai
AVA 4-10
Ẹme nọ A re Ru Ovavo
Riẹ Ọnyaba Ra gbe Ọrọ Amọfa
Re ma sai wo edẹro, u fo nọ ma rẹ riẹ ọnyaba mai gbe ọrọ amọfa hrọ. Nọ Pọl o je kere ileta se ahwo Rom, ọ ta nọ: “Ahwo kpobi a raha uzi no, a be sai dhesẹ oruaro Ọghẹnẹ via ha.” (Ahwo Rom 3:23) Ma sai wo otoriẹ abọ sa-sa oruaro Jihova re vievie he. Oriruo jọ họ ọnọ ọ rrọ Emuhọ 1:31 nọ o ta nọ: “Ọghẹnẹ ọ tẹ ruẹ nọ eware kpobi nọ ọ ma na i re wowoma.” Oke kpobi nọ Ọghẹnẹ o te rri kpemu kpohọ eware nọ ọ ma, ọ sae ta nọ eware na “i re wowoma.” Ohwo ọvo nọ ọ rẹ sai wo oruaro utioye ọ riẹ hẹ. Ọnyaba mai nọ ma rẹ riẹ họ oware ọsosuọ nọ o rẹ lẹliẹ omai wo edẹro. Rekọ eware efa e gbẹ riẹ. Ma rẹ riẹ oghẹrẹ nọ Jihova o re ru eware je ru lele iei.
A rehọ ẹme Griki nọ a fa “uzioraha” no ẹme jọ nọ otọ riẹ o rrọ “re a siọ oware ba eru te.” (Ahwo Rom 3:9) Wọhọ oriruo: Dae jọ iroro ra ruẹ ohwo jọ nọ a te kẹ osa nọ ọ tẹ sae rọ ose sa oria nọ a gwọlọ. Ose esa e riẹe obọ. Nọ ọ sa orọ ọsosuọ, o tẹ rọ osabọ ovo thabọ no oria na. Ọ tẹ ma orọ avivẹ te ziezi, nọ ọ sae, o tẹ rọ urula ovo thabọ no oria na. Ọ tẹ nabe kpomavi ziezi kẹ orọ urere na, rekọ nọ ọ sae, o tẹ rrọ omoware krẹ wọhọ ubro uziobọ thabọ no oria na. Kiọkọ omojọ re u tei, rekọ epanọ a gbẹ ta a re ro gbijama.
Mai kpobi ma wọhọ ohwo ọyena nọ ọ sae rọ ose sa oria nọ a gwọlọ họ na. Ẹsejọ dede ma re tube ru kaka obonọ a gwọlọ nọ ma ru te he. Rekọ ẹsiẹfa u re kiọkọ omojọ re ma ru oware na. O rẹ kẹ omai uye gaga keme ghele epanọ ma daoma te kẹhẹ na ma sai ruei hi. Ma wariẹ rehọ iroro mai kpohọ oriruo oke ẹsiẹe na.
Ọnọ ọ sa ose na ọ tẹ be nyavrẹ yolo yolo fiki ọkora osa nọ u te rie obọ họ. Ẹsiẹvo na, ọzae nọ ọ be kẹ ahwo osa na o te sei zihe ze jẹ kẹe osa na, ọ tẹ ta kẹe nọ: “Mẹ te kẹ owhẹ osa na ghele keme whọ were omẹ gaga, yọ mẹ ruẹ epanọ whọ daoma te.” Oma o tẹ mere ọnọ ọ sa ose na!
Oma o rẹ ginẹ mere ohwo! Oma o rẹ mere ohwo kpobi nọ Ọghẹnẹ ọ rọ “okẹ” uzuazọ ebẹdẹ bẹdẹ hwosa kẹ. (Ahwo Rom 6:23) No umuo oke yena vrẹ, oware kpobi nọ a ti ru o te jọ gbagba, a ve ti je ru oware kpobi nọ a gwọlọ mi ai. Yọ a re ti wo edẹro gaga. Ma te wo iroro itienana, o te lẹliẹ omai rọ emamọ ubiẹro rri omamai gbe amọfa.
it-1 1260 ¶2
Ihri, Ihri-Eriọ
Ekpehre Ajọwha. Ẹsejọ ohwo ọ sai gine wo ajọwha kẹ oware jọ hayo re ihri, rekiyọ u bi ru eva dha Ọghẹnẹ. Ere o via kẹ ahwo Ju buobu evaọ etoke ikpe udhusoi ọsosuọ. A jẹ rọ Uzi Mosis nọ a je koko gwọlọ ẹrẹreokie. Rekọ Pọl o dhesẹ nọ ajọwha ọthọthọ a wo na fiki eriariẹ egbagba nọ a wo ho. Fikiere a gbe wo ẹrẹreokie nọ o re no obọ Ọghẹnẹ ze he. A hae ruẹ iruthọ rai jẹ rọ ẹkwoma Kristi kurẹriẹ bru Ọghẹnẹ ze re a sai wo ufuoma no obrukpe Uzi na. (Rom 10:1-10) Sọl obọ Tasọs ọ jọ oghẹrẹ ohwo otiọye na, o wo ekpehre ajọwha ọgaga kẹ egagọ ahwo Ju te epanọ o je ro “kpokpo ukoko Ọghẹnẹ gaga jẹ gwọlọ raha iẹe muotọ.” Ọ jẹ nabe romatotọ koko Uzi na re ọ sae jọ ohwo nọ ọ “kare afuẹwẹ.” (Gal 1:13, 14; Fil 3:6) Ghele na ihri-eriọ nọ o wo kẹ egagọ ahwo Ju na yọ ekpehre ihri-eriọ. Ọ jẹ ginẹ rọ emamọ eva ru onana, oye o soriẹ ze nọ Jihova ọ rọ rehọ ẹkwoma Kristi dhesẹ uwowou ulogbo kẹe, nọ o ro ru ei re o kurẹriẹ ruọ egagọ uzẹme na.—1Ti 1:12, 13.