Eria Ekiakiẹ Rọkẹ Obe Ewuhrẹ Uzuazọ Oleleikristi gbe Usi Uwoma Ota Mai
ARIA 5-11
EWARE AGHAE NỌ E RRỌ EBAIBOL NA | 2 TIMOTI 1-4
“Orọnikọ Ẹzi Ozodhẹ Oye Ọghẹnẹ Ọ kẹ Omai Hi”
Izoge—Wha Ru re Ahwo A Ruẹ Ẹnyaharo Rai
9 Re o fi obọ họ kẹ Timoti, Pọl ọ kareghẹhọ iẹe uwhremu na nọ: ‘Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga gbe uyoyou avọ iroro egbagba.’ (2 Tim. 1:7) Ohwo nọ o wo ‘iroro egbagba’ o re roro oware te ziezi. Ohwo otiọye na ọ rẹ dawo utho ẹgba riẹ o tẹ make rọnọ eware e be nya oghẹrẹ nọ ọ gwọlọ họ. Izoge jọ nọ e kpako ho evaọ iroro a re dhesẹ ẹzi ozodhẹ jẹ gwọlọ dhẹ no ebẹbẹ rai ẹkwoma owezẹ nọ a rẹ wezẹ okikpo hayo etehe-ughe nọ a re rri oke kpobi, imu egaga nọ a rẹ lọ, idi nọ a rẹ da vroma, epati nọ a re kpohọ ẹsikpobi, hayo ọfariẹ-ogbe. A tuduhọ Ileleikristi awọ inọ a siọ “edhọ-egọ avọ urusio akpọ na ba, re [a] yeri uzuazọ uwowolẹ, avọ ẹrẹreokie, gbe uzuazọ Ọghẹnẹ u yero eva akpọ nana.”—Tait. 2:12.
‘Wo Udu Je Kru Oma Ga!’
7 Nọ o je kere se Timoti, Pọl ọ ta nọ: “Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga . . . Whọ gbẹ vuoma isẹri ise kẹ Ọnowo mai hi.” (2 Timoti 1:7, 8; Mak 8:38) Nọ ma se eme eyena no na, ma sae nọ oma mai nnọ: ‘Kọ mẹ be vuoma ẹrọwọ mẹ, manikọ me wo aruọwha? Evaọ eria iruo mẹ (hayo evaọ isukulu), mẹ be jọ ahwo nọ a wariẹ omẹ họ riẹ nnọ mẹ yọ Osẹri Jihova, manikọ me bi ru re ahwo a seba ẹriẹ nọ mẹ yọ Osẹri? Kọ oma o rẹ vo omẹ re me wo ohẹriẹ no amọfa, manikọ mẹ be rọ evawere dhesẹ via nọ me wo ohẹriẹ no amọfa fiki usu nọ me wo kugbe Jihova?’ Otẹrọnọ ohwo jọ o wo iroro ivẹ kpahe ewhowho emamọ usi na hayo ọ gwọlọ kielele iroro ogbotu, jọ ọ kareghẹhọ uthubro nọ Jihova ọ kẹ Joshua: “Wo udu avọ oma ukruga.” O thọrọ owhẹ ẹro ho, orọnikọ iroro ibe iruiruo hayo erọ ibe emọ isukulu mai họ oware nọ u muẹme he, rekọ eriwo Jihova avọ Jesu Kristi.—Ahwo Galesha 1:10.
Romatotọ Kiẹ Eware Aghae Via
Gwọlọ Efe nọ O Muẹro
13 Timoti ọ jọ ọzae nọ o wo ẹrọwọ gaga. Nọ Pọl ukọ na o sei “emamọ osoja Kristi Jesu” no, ọ tẹ ta kẹe nọ: “Ohwo nọ ọ rrọ osoja o re dhomahọ ekiọthuọ akpọ họ, re ọ ruẹsi wo ọjẹrehọ ọnọ o wuzou riẹ.” (2 Tim. 2:3, 4) Ilele Jesu nẹnẹ, enọ i kugbe inievo nọ i bu vi ima-ọvo (1,000,000) nọ e rrọ iruo odibọgba oke-kpobi na, a bi ru lele ohrẹ Pọl na ghelọ uyero kpobi nọ a rrọ kẹhẹ. A be daoma whaha uruemu ọ onọ-u-kieze a dẹ gbe urusio eware nọ e wariẹ e rai họ, keme a be kareghẹhọ ehri-uzi Ebaibol nọ o ta nọ: “Ọnọ o re momo ọ rẹ jọ ọrigbo kẹ ọnọ o momo mi na.” (Itẹ 22:7) Setan ọ gwọlọ nọ ma rehọ oke gbe ẹgba mai kpobi gbodibo kẹ ekiọthuọ akpọ riẹ nana. Iroro jọ nọ ma rẹ jẹ e rẹ sae lẹliẹ omai riesa fihọ uzou ikpe buobu. Ahwo jọ a re momo igho buobu rọ dẹ uwou, dẹ omoto, kpohọ isukulu ikpehru, je tube ro ru ehaa-orọo ilogbo dede. U re dhesẹ nọ ma wo areghẹ nọ ma te bi yeri umutho uzuazọ jẹ whaha esa gbe ugho nọ ma re mu raha, onọ u ti ru omai wo uvẹ gbodibo kẹ Ọghẹnẹ viukpọ ekiọthuọ akpọ nana.—1 Tim. 6:10.
Idibo Jihova A re “Sioma No Egbegbe”
10 Evaọ oke mai na, ikọ erue e nwane rrọ ukoko na ha. Ghele na, nọ ma tẹ nyaku ahwo nọ a bi wuhrẹ eware nọ e wọso Ebaibol na, o gwọlọ nọ ma rẹ whaha ae ababọ oke oraha. U dhesẹ areghẹ vievie he re ma lele ikọ-erue vravro ovao dhe ovao, kere eme fihọ oria evuẹ Itanẹte rai, hayo lele ae ta ẹme evaọ oghẹrẹ ofa jọ. O tẹ make rọnọ ma gwọlọ ru onana re ma rọ ere fiobọhọ kẹ ae, oria Ikereakere nọ ma ta ẹme kpahe no na o kuvẹ oware utioye vievie he. Mai idibo Jihova ma rẹ whaha omakugbe hayo ẹmeọta-kugbe ikọ-erue riẹriẹriẹ.
ARIA 12-18
EWARE AGHAE NỌ E RRỌ EBAIBOL NA | TAITỌS 1–FILIMỌN
“Rehọ Ekpako Mu”
Enọ Ahwo nọ A S’ebe
Dede nọ Ikereakere na e nwane ta oware kpobi kpahe oghẹrẹ nọ a jẹ rọ rehọ idibo Ọghẹnẹ mu kẹ ewha-iruo evaọ oke nọ u kpemu hu, ma ruẹ ẹmẹvo oghẹrẹ nọ a je ro ru onana. Ebaibol na ọ ta nọ okenọ Pọl ukọ na avọ Banabas a je no erẹ imishọnare ọsosuọ rai ze, ‘a jẹ rehọ ekpako mu evaọ ukoko kpobi, a jẹ siọ emuọriọ ba jẹ lẹ kẹ ae, a je mu ai họ obọ Ọnowo na ọnọ a rọwo.’ (Iruẹru 14:23) Ikpe buobu nọ i lele i rie, Pọl o kere se Taitọs nọ a gbẹ jọ onya imishọnare inọ: ‘Oware nọ me je vu owhẹ wa obọ Kriti ona, re whọ kpọ eware nọ e thọ vi, re whọ rehọ ekpako mu evaọ kẹwho kẹwho wọhọ epanọ me dhesẹ kẹ owhẹ.’ (Tait. 1:5) Yọ o wọhọ nọ Pọl ukọ na ọ kẹ Timoti nọ o je lele ei kpohọ erẹ imishọnare gaga udu nọ ọ jẹ rọ rehọ ekpako mu re. (1 Tim. 5:22) O rrọ vevẹ inọ esẹro ọnyawariẹ e jẹ rehọ ekpako nana mu orọnikọ ikọ na omarai hayo ekpako nọ e jọ obọ Jerusalẹm hu.
Otoriẹ nana nọ Utu Ẹruorote Iruẹru Isẹri Jihova a wo kpahe oghẹrẹ nọ a jẹ rọ rehọ ekpako mu evaọ ikpe-udhusoi ọsosuọ na u ru nọ a ro ru inwene no kpahe oghẹrẹ nọ a rẹ rọ rehọ ekpako gbe idibo iruiruo mu. No umuo Azie 1, 2014 vrẹ, enẹ a be te rọ rehọ ekpako gbe idibo iruiruo mu: Ọsẹro okogho ọ be te hae romatotọ kiẹ eware nọ a kere kpahe inievo-emezae riwi, enọ a kere odẹ rai h’otọ inọ a te kẹ owha-iruo ọkpako hayo odibo oruiruo evaọ okogho na. Okenọ o te weze bru ukoko, ọ rẹ daoma riẹ inievo-emezae nọ a kere odẹ rai fihotọ na, lele ai kpohọ usiuwoma ota nọ o tẹ lọhọ. Ọsẹro okogho na o ve je lele ugboma ekpako ukoko na ta kpahe inievo nọ a kere odẹ rai fihotọ kẹ eromuo na, kẹsena ọ vẹ rehọ ae mu nọ ọ tẹ ruẹ nọ a gine te. Enẹ ọruẹrẹfihotọ eromuo ekpako gbe idibo iruiruo na o te rọ wọhọ epanọ o jọ evaọ ikpe-udhusoi ọsosuọ.
Amono a re w’obọ evaọ eromuo ekpako gbe idibo iruiruo na? Wọhọ epanọ o rrọ n’otọ avọ otọ ze, “odibo oruọzewọ, nọ o wo areghẹ” na o wo owha-iruo nọ ọ rẹ rọ rehọ iwuhrẹ Ọghẹnẹ ko idibo Ọghẹnẹ kpobi. (Mat. 24:45-47) Owha-iruo nana o kẹre te Ikereakere na nọ ọ rẹ kiẹ riwi ziezi avọ obufihọ ẹzi ọfuafo na re ọ ruẹ izi hayo ehri-izi Ebaibol sa-sa nọ i w’obọ kugbe oghẹrẹ nọ u fo nọ a rẹ ruẹrẹ iruẹru abọ ukoko Ọghẹnẹ nọ o rrọ otọakpọ họ. Odibo oruọzewọ ọvona ọ rẹ jẹ rehọ esẹro okogho gbe otu Ogbẹgwae Uwou-Ogha mu. Kẹsena, uwou ogha o vẹ ruẹ nọ a fiobọhọ kẹ ikoko sa-sa evaọ oghẹrẹ nọ a sai ro fi ithubro nọ i bi no obọ odibo oruọzewọ na ze họ iruo. Ugboma ekpako na a wo owha-iruo nọ a rẹ rọ romatotọ rehọ Ikereakere na kiẹ iruemu inievo-emezae nọ a rehọ edẹ rai ze riwi sọ a te kẹ ewha-iruo ekpako hayo idibo iruiruo. Ọsẹro okogho kpobi ọ rẹ lẹ jẹ romatotọ kiẹ eware nọ a kere kpahe inievo nọ a fi odẹ rai h’otọ inọ a te kẹ ekpako hayo idibo iruiruo riwi, kẹsena ọ vẹ rehọ enọ ọ ruẹ nọ a gine te mu. Onana yọ owha-iruo ulogbo.
Romatotọ Kiẹ Eware Aghae Via
w89 5/15 31 ¶5
Enọ Ahwo nọ A s’Ebe
Orọnikọ Pọl ọ jẹ whobọhọ eme iyoma hayo eme omohẹriẹ nọ a jẹ ta kpahe ahwo orẹwho Kriti kpobi hi. Ma wo imuẹro nana keme Pọl ọ riẹ nọ uvi Ileleikristi nọ Ọghẹnẹ ọ jẹrehọ jẹ rehọ ẹzi ọfuafo riẹ wholo no e jọ orẹwho Kriti. (Iruẹru 2:5, 11, 33) Ileleikristi nọ e romakẹ egagọ Ọghẹnẹ e jọ ikoko sa-sa “no okpẹwho ruọ okpẹwho.” Dede nọ Ileleikristi yena a gba ha, u mu omai ẹro nọ a jọ eterue gbe eyẹlẹ nọ i wo uvou-uthethei hi; o hae rọnọ ere a jọ a hai wo ọjẹrehọ Jihova ha. (Ahwo Filipai 3:18, 19; Eviavia 21:8) Wọhọ epanọ o rrọ evaọ erẹwho kpobi nẹnẹ na, ẹsejọhọ ahwo nọ a wo evezi a jọ Kriti re, enọ e jẹ gwọlọ gaviezọ kẹ usi uwoma na nọ eware iyoma nọ a je ru evaọ oke yena e jẹ kẹ uye.—Izikiẹl 9:4; je rri Iruẹru 13:48.
Oruvẹ no Ebe-Ovuẹ nọ A Kere Se Taitọs, Filimọn, gbe Ahwo Hibru Ze
15, 16—Fikieme Pọl ọ gbẹ rọ ta kẹ Filimọn ho inọ o siobọno Onisimọs re ọ siọ ọrigbo ba ẹjọ? Pọl ọ gwọlọ tẹrovi iruo riẹ ọrọ ‘ovuẹ uvie Ọghẹnẹ je wuhrẹ ẹme Jesu Kristi Ọnowo na.’ Fikiere ọ gwọlọ dhoma họ eware efa ha, wọhọ eme nọ i kpomahọ ọrigbo.—Iruẹru 28:31.
ARIA 19-25
EWARE AGHAE NỌ E RRỌ EBAIBOL NA | AHWO HIBRU 1-3
“You Ẹrẹreokie re Who Mukpahe Emuemu”
Wha Jiri Kristi, Ovie nọ O Wo Oruaro Na
8 Jihova ọ jọ obọ odhiwu rehọ Ọmọ riẹ mu Ovie Uvie Mesaya na evaọ ukpe 1914. O rẹ sai mu omai ẹro nọ ẹrẹreokie ọ te da esuo riẹ fia keme ‘ọkpọ uvie riẹ yọ ọkpọ udhedhẹ.’ Obọ Ọghẹnẹ uvie riẹ u no ze, yọ esuo riẹ “ọ rẹ jọ bẹdẹ bẹdẹ.” Kọ eva e gbẹ be were owhẹ nọ whọ be gọ Jihova evaọ otọ esuo Ovie ologbo otiọye nọ o ro mu na?
Wha Jiri Kristi, Ovie nọ O Wo Oruaro Na
7 Se Olezi 45:6, 7. Fikinọ Jesu o you ẹrẹreokie je mukpahe oware kpobi nọ o rẹ sae wha ekela se Ọsẹ riẹ, Jihova ọ rehọ e riẹ mu Ovie ọrọ Uvie Mesaya na. A rehọ “ewhri oghọghọ wholo” Jesu vi “erivẹ” riẹ, koyehọ ivie Juda kpobi nọ i no uyẹ Devidi ze. Evaọ oghẹrẹ vẹ? Orọ ọsosuọ, Jihova ọvo ọ rehọ obọ riẹ wholo Jesu. U te no ere no, Jihova ọ rehọ e riẹ mu Ovie gbe Ozerẹ Okpehru. (Ol. 2:2; Hib. 5:5, 6) Ofariẹ, ẹzi ọfuafo a ro wholo Jesu orọnikọ ewhri hi, yọ obọ odhiwu Uvie riẹ o rrọ.
Romatotọ Kiẹ Eware Aghae Via
it-1 1185 ¶1
Uwoho
Kọ oghẹrẹ ovona Jesu o je ro dhesẹ ọkpọ uruemu Ọsẹ riẹ evaọ oke na kpobi?
Ọmọ otuyẹ Ọghẹnẹ nọ ọ ziọ otoakpọ nọ a se Jesu na, yọ uwoho Ọsẹ riẹ. (2Kọ 4:4) Nọ orọnọ Ọmọ nana họ ọnọ Ọghẹnẹ ọ ta kẹ nọ, “Joma ma ohwo evaọ uwoho mai” na, onana u dhesẹ nọ anwọ oke nọ a rọ ma Ọmọ na o ro tho Ọsẹ riẹ, Ọmemama na. (Emu 1:26; Jọ 1:1-3; Kọl 1:15, 16) Nọ Jesu ọ jọ otọakpọ, ọ daoma dhesẹ ọkpọ uruemu Ọsẹ riẹ te epanọ o rẹ lọhọ te. Oyejabọ nọ ọ rọ ta nọ “ohwo kpobi nọ ọ ruẹ omẹ ọ ruẹ Ọsẹ na no re.” (Jọ 14:9; 5:17, 19, 30, 36; 8:28, 38, 42) Jesu ọ jẹ mai dhesẹ ọkpọ uruemu Ọsẹ riẹ evaọ okenọ Jihova Ọghẹnẹ ọ rọ ugboma ẹzi kpare iẹe no uwhu ze no jẹ “rehọ udu-esuo kpobi . . . evaọ odhiwu gbe otọakpọ” kẹe no. (1Pi 3:18; Mt 28:18) Nọ orọnọ Ọghẹnẹ ọ kpare Jesu “fihọ ọkwa nọ o kpehru vi onọ ọ jọ vẹre” no na, enẹna Ọmọ Ọghẹnẹ na ọ be mai ro dhesẹ ọkpọ uruemu Ọsẹ riẹ vi oke nọ ọ rọ kake jọ obọ odhiwu. (Fil 2:9; Hib 2:9) Enẹna Jesu o bi dhesẹ “oghẹrẹ ohwo nọ [Ọghẹnẹ] ọ rrọ dẹẹ” via.—Hib 1:2-4.
it-1 1063 ¶7
Odhiwu
Jihova Ọghẹnẹ eme nọ e rrọ Olezi 102:25, 26 na i kiekpahe, rekọ Pọl ukọ na ọ ta nọ i kiekpahe Jesu Kristi. Pọl ọ ta ere keme Ọmọ ọvo Ọghẹnẹ họ ọnọ Ọghẹnẹ ọ rọ ma odhiwu gbe otọakpọ na. Pọl ọ ta nọ Ọmọ na ọ rẹ rria tọ rekọ eware nọ a ma na e rẹ rria tọ họ, keme o tẹ ruọ Ọghẹnẹ, ọ rẹ sai “kpiri ai wọhọ epanọ a re kpiri ogbru,” o ve fi ai họ akotọ.—Hib 1:1, 2, 8, 10-12; je rri 1Pi 2:3.
ARIA 26–AZIE 1
EWARE AGHAE NỌ E RRỌ EBAIBOL NA | AHWO HIBRU 4-6
“Dawo Ẹgba Ra Kpobi re Whọ Ruọ Eva Eriosehọ Ọghẹnẹ”
Eme Họ Eriosehọ Ọghẹnẹ?
3 Eware ivẹ i ru omai riẹ inọ ẹdẹ avọ ihrẹ na ọ gbẹ j’otọ evaọ ikpe-udhusoi ọsosuọ. Orọ ọsosuọ, roro kpahe eme nọ Jesu ọ ta kẹ enọ e jẹ wọso ẹe fikinọ o siwi ohwo evaọ Ẹdijala. Olori na ọ ta kẹ ae nọ: ‘Ọsẹ mẹ o gbe bi ru iruo rite enẹna, me te je bi ru re.’ (Jọn 5:16, 17) Eme họ otofa eme riẹ na? A jẹ gwọlọ rọ uzi kru Jesu inọ o ru iruo keleme evaọ Ẹdijala. Jesu ọ tẹ ta kẹ ae nọ: “Ọsẹ mẹ o gbe bi ru iruo.” Ẹme nọ Jesu ọ be ta kẹ ae na họ: ‘Mẹ avọ Ọsẹ mẹ ma bi ru oghẹrẹ iruo evona. Nọ orọnọ Ọsẹ mẹ ọ re siọ iruo ba ẹdẹvo ho makọ te Ẹdijala kpobi na, mẹ rẹ sae ruabọhọ iruo re, makọ evaọ Ẹdijala.’ Jesu ọ rọ ere dhesẹ nọ, rọ kpahe otọakpọ na, Ẹdijala ologbo Ọghẹnẹ na, koyehọ ẹdẹ avọ ihrẹ na, ọ gbẹ j’otọ evaọ oke riẹ.
4 Pọl ukọ na ọ fodẹ oware avivẹ nọ o kẹ omai imuẹro inọ ẹdẹ avọ ihrẹ na ọ gbẹ j’otọ evaọ ikpe-udhusoi ọsosuọ. Nọ ọ jẹ wariẹ eme nọ e rrọ Emuhọ 2:2 kpahe eriosehọ Ọghẹnẹ, Pọl o kere nọ: ‘Mai e nọ e rọwo a te ruọ eva eriosehọ na.’ (Hib. 4:3, 4, 6, 9) Koyehọ evaọ oke Pọl yọ ẹdẹ avọ ihrẹ na ọ gbẹ j’otọ. Ẹvẹ ẹdẹ eriosehọ yena o ti gbe kri te?
5 Re ma sae kuyo onọ yena, ma rẹ kareghẹhọ ẹjiroro ẹdẹ avọ ihrẹ na. Emuhọ 2:3 o ru rie vẹ inọ: ‘Ọghẹnẹ ọ tẹ ghale ẹdẹ avọ ihrẹ na, o te ru ei ọrẹri.’ Jihova o ru ẹdẹ ọyena “ọrẹri,” koyehọ o ru rie fuafo re ọ ruẹsi ru ẹjiroro riẹ gba. Ẹjiroro yena họ re te ezae te eyae nọ i bi yoẹme a rria otọakpọ na jẹ rẹrotei gbe emama kpobi nọ e rrọ eva riẹ. (Emu. 1:28) Jihova Ọghẹnẹ gbe “olori ẹdẹ ẹdijala” na Jesu Kristi, a “gbe bi ru iruo rite enẹna” re a sai ru ẹjiroro yena gba. (Mat. 12:8) Ẹdẹ eriosehọ Ọghẹnẹ ọ te gbẹ j’otọ bẹsenọ ẹjiroro riẹ o re rugba evaọ ekuhọ Esuo Odu Ikpe Kristi na.
Eme Họ Eriosehọ Ọghẹnẹ?
6 Ọghẹnẹ o ru ẹjiroro riẹ vẹ kẹ Adamu avọ Ivi, rekọ a ru lele ẹjiroro na ha. Uzẹme, Adamu avọ Ivi họ ahwo ọsosuọ nọ a ghẹmeeyo. Anwọ oke yena ze, ima ahwo buobu efa a ru epọvo na no. Makọ emọ Izrẹl dede nọ Ọghẹnẹ ọ salọ a ghẹmeeyo. Yọ Pọl ọ vẹvẹ Ileleikristi ikpe-udhusoi ọsosuọ unu inọ ejọ evaọ usu rai a sai kie ruọ ẹta nọ emọ Izrẹl oke anwae a kie ro. O kere nọ: “Whaọ joma họre gaga re ma rueva eriosehọ na, re mai ohwo ọvo ọ seba ezoruẹ fiki oghẹrẹ ẹme ọseba-eyo otiọye na.” (Hib. 4:11) Muẹrohọ inọ Pọl o dhesẹ nọ ohwo nọ ọ ghẹmeeyo ọ rẹ sae rueva eriosehọ Ọghẹnẹ hẹ. Eme oyena u dhesẹ? Otẹrọnọ ma wọso ẹjiroro Ọghẹnẹ evaọ edhere jọ, kọ oyena o gbẹ sae whaha omai ẹruọ eriosehọ Ọghẹnẹ? Uyo onọ yena u wuzou gaga k’omai, yọ ma be te ta kpahe iẹe. Rekọ obọnana, joma rri eware efa nọ ma rẹ sai wuhrẹ kpahe ẹruọ eriosehọ Ọghẹnẹ ẹkwoma ẹta kpahe ekpehre oriruo emọ Izrẹl.
Eme Họ Eriosehọ Ọghẹnẹ?
16 Uvi Oleleikristi ọvuọvo nẹnẹ nọ o re sikẹ nọ a re koko Uzi Mosis re a te wo esiwo ọ riẹ hẹ. Eme nọ Pọl o kere se ahwo Ẹfẹsọs e rrọ vevẹ: “Keme aruoriwo a ro siwi owhai fiki orọwọ; oyena fiki oma-obọ rai hi, rekọ okẹ Ọghẹnẹ—orọnọ fiki iruo ho, re ohwo ọvo ọ siọ eha ba ese.” (Ẹf. 2:8, 9) Kọ eme o gwọlọ re Ileleikristi a ruọ eriosehọ Ọghẹnẹ? Jihova ọ ruẹrẹ ẹdẹ avọ ihrẹ na họ, koyehọ ẹdẹ eriosehọ riẹ, re ọ sai ru ẹjiroro riẹ kpahe otọakpọ na gba. Ma rẹ sae ruọ eriosehọ Jihova, hayo kuomagbei evaọ eriosehọ riẹ ẹkwoma eru lele oreva riẹ nọ ọ be rọ ẹkwoma ukoko riẹ ru vẹ kẹ omai.
17 Evaọ abọdekọ riẹ, ma te bi rri ohrẹ nọ ọrigbo nọ o wo ẹrọwọ avọ areghẹ na ọ be kẹ omai vo, ma je bi ru orọ obọ mai, kiyọ ma be wọso ẹjiroro Ọghẹnẹ. Oyena o sae raha usu mai kugbe Jihova. Evaọ uzoẹme nọ o rrọ aro na, ma te ta kpahe eware jọ nọ e rẹ sai kpomahọ ahwo Ọghẹnẹ, gbe epanọ iroro nọ ma jẹ, sọ ma re yoẹme hayo ma re ru orọ obọ mai, o sai ro dhesẹ sọ ma ginẹ ruọ eriosehọ Ọghẹnẹ no.
Romatotọ Kiẹ Eware Aghae Via
Enọ Ahwo Nọ A S’ebe
Eme họ “ẹme Ọghẹnẹ” nọ obe Ahwo Hibru 4:12 o ta nọ ọ “rrọ uzuazọ o te je wo ẹgba” na?
▪ Eme nọ e wariẹ oria ikere yena họ i dhesẹ nọ Pọl ukọ na ọ jẹ ta kpahe ovuẹ hayo odhesẹvia ẹjiroro Ọghẹnẹ nọ ọ rrọ Ebaibol na.
Ma rẹ jọ ebe mai fodẹ obe Ahwo Hibru 4:12 gaga ro dhesẹ nọ Ebaibol na o wo ẹgba nọ o re ro nwene uzuazọ ahwo. Yọ u gine fo gaga nọ a tẹ fotọ oria ikere nana oghẹrẹ utiona. Dede na, u re fiobọhọ nọ ma te rri eme nọ e wariẹ oria ikere obe Ahwo Hibru 4:12 na họ. Pọl ọ jẹ tuduhọ Ileleikristi obọ Hibru awọ re a daoma ru lele ẹjiroro Ọghẹnẹ sa-sa. A jọ ikereakere efuafo na fodẹ ejọ rai buobu. Pọl ọ rehọ ahwo Izrẹl nọ a siwi no igbo Ijipti kẹ oriruo. Ahwo Izrẹl na a wo ẹruore inọ a te ruọ ẹkwotọ eyaa na, “otọ nọ ame-ivie gbe ọnyọ i je bi suẹ,” onọ a te jọ wo uvi eriosehọ.—Ọny. 3:8; Izie. 12:9, 10.
Onana yọ eyaa nọ Ọghẹnẹ ọ ya. Ghele na, ahwo Izrẹl a te je ru udu rai gaga, a gbe fi ẹrọwọ họ eyaa Ọghẹnẹ hẹ, onọ u ru nọ ibuobu rai a gbẹ rọ ruọ eriosehọ yena ha. (Ik. 14:30; Jos. 14:6-10) O make rrọ ere na, Pọl ọ ta nọ “eyaa nọ a rẹ rọ ruọ evaọ eriosehọ [Ọghẹnẹ]” e gbẹ jariẹ. (Hib. 3:16-19; 4:1) “Eyaa” yena e rrọ usu ẹjiroro Ọghẹnẹ nọ o dhesẹ via. Wọhọ epanọ Ileleikristi obọ Hibru na a ru, ma rẹ sai se kpahe ẹjiroro yena, jẹ daoma yeri uzuazọ mai rọwokugbe ei. Pọl ọ rehọ eme riẹ no obe Emuhọ 2:2 gbe Olezi 95:11 ze ro dhesẹ nọ Ikereakere na eyaa nana i no ze.
Fikiere, u fo nọ u re duobọte omai udu inọ “eyaa nọ a rẹ rọ ruọ evaọ eriosehọ [Ọghẹnẹ] e gbẹ riẹ.” Ma wo imuẹro inọ ma rẹ sae ginẹ ruọ eriosehọ Ọghẹnẹ wọhọ epanọ o rrọ Ebaibol na, yọ ma jowọ nọ ma rẹ rọ ruẹe no. Dede na, orọnikọ Uzi Mosis nọ ma bi koko hayo iruo efa jọ nọ ma bi ru re ma sai wo ọjẹrehọ Jihova, ma be rọ gwọlọ ruọ eriosehọ Ọghẹnẹ hẹ. Ukpoye, ma be rọ evawere ru lele ẹjiroro Ọghẹnẹ nọ ọ rrọ Ebaibol na avọ ẹrọwọ. Ofariẹ, wọhọ epanọ ma ta evaọ obehru na, ahwo buobu a mu Ebaibol na họ ewuhrẹ no evaọ akpọ na soso, yọ a be riẹ kpahe ẹjiroro Ọghẹnẹ. Onana u ru nọ ibuobu rai a bi ro nwene uzuazọ uyero rai, fi ẹrọwọ họ Ọghẹnẹ, jẹ be họ-ame zihe ruọ uvi Ileleikristi. Oghẹrẹ nọ a bi ro nwene uzuazọ rai o kẹ imuẹro vevẹ inọ “ẹme Ọghẹnẹ ọ rrọ uzuazọ o te je wo ẹgba.” Ẹjiroro Ọghẹnẹ nọ o dhesẹ via evaọ Ebaibol na, u nwene uzuazọ mai no, yọ ẹgba riẹ o ti gbe dhesẹ oma via evaọ uzuazọ omai.
it-1 1139 ¶2
Ẹruore
Ẹruore uzuazọ ebẹdẹ bẹdẹ gbe ugboma nọ u re gbo ho nọ ahwo nọ a wo “use obọ odhiwu” a wo na, (Hib 3:1) yọ ẹruore nọ u muẹro nọ a re fievahọ. Ma wo imuẹro nana ẹkwoma eware ivẹ nọ Ọghẹnẹ ọ sae jọ ta ọrue he, koyehọ, eyaa riẹ gbe iyei nọ o duwu, ma te je wo ẹruore evaọ Kristi, ọnọ o re whu hu nọ ọ rrọ obọ idhiwu na. Fikiere, ẹruore nana ọ wọhọ “umuokọ rọkẹ uzuazọ mai, u muẹro jẹ rrọ gaga, yọ o nyaruọ obemu ekọtini na [wọhọ epanọ Ozerẹ Okpehru ọ rẹ ruọ oria Ọrẹri Erẹri na evaọ Ẹdẹ Omavoro], oria nọ ọnọ ọ kobaro ọ ruọ eva no fiki mai, koyehọ Jesu, ọnọ o zihe ruọ ozerẹ okpehru wọhọ epaọ Mẹlkizẹdẹk bẹdẹ bẹdẹ.”—Hib 6:17-20.