Fiki Ohwẹ nọ A Kpo Ku Unu!

U WO emetẹ ivẹ jọ nọ i je kpohọ oria evaọ okpẹwho Baguio, obọ Philippines. A tẹ ruẹ oware nọ ma re fi ebe họ nọ a re ghelie no oria ruọ oria, rekọ a wẹriẹ hẹ re a rehọ obe hayo lele oniọvo-ọmọtẹ nọ o dikihẹ gba oware na ta ẹme. Oniọvo-ọmọtẹ na o te kpohwẹ ku unu bi rri rai ọvo. Odẹ oniọvo ọmọtẹ na Helen. Emetẹ ivẹ na a tẹ nya orai vrẹ, rekọ ohwẹ Helen na o were rai gaga.

Nọ emetẹ ivẹ na a je zihe no oria nọ a kpohọ ze, a ruọ omoto, rekọ a tẹ jọ eva omoto na kparo ruẹ oka jw.org ologbo nọ a tamu ugbẹhẹ Ọgwa Uvie jọ. Kẹsena a tẹ kareghẹhọ nọ oka nana ovona a ruẹ evaọ oware nọ a re fi ebe họ ghelie ẹsiẹ na. Aimava a te nwrotọ no omoto nọ a jọ, jẹ romatotọ rri oke ewuhrẹ ikoko sa-sa nọ a kere fihọ oria evaọ aro Ọgwa Uvie na.

Oka yena, a te kpohọ ewuhrẹ jọ nọ oke riẹ u kiehọ ae oma. Whọ riẹ ohwo nọ a ruẹ nọ a jẹ rueva Ọgwa Uvie na? Helen! A tẹ nwani vuhu ei inọ ọye a ruẹ nọ o kpohwẹ ku unu ẹdẹ na. Sista Helen ọ ta nọ, “Ozọ o jẹ dina mu omẹ nọ a jẹ nyabru omẹ ze. Me je roro nọ o wọhọ nọ me ru rai oware jọ thọ.” Rekọ nọ emetẹ ivẹ na a nya mu Helen, a tẹ vuẹe oware nọ o via.

Ewuhrẹ na ọ were emetẹ ivẹ na gaga. Eva e tẹ jẹ were ai re evaọ oghẹrẹ nọ a ro dede ae rehọ. O jarai oma wọhọ ẹsenọ a kuomagbe ahwo nọ a riẹ no vẹre. Nọ a ruẹ nọ inievo na a bi hwere Ọgwa Uvie nọ ewuhrẹ ọ fa no, aimava a tẹ nọ sọ a sae kẹ ai uvẹ re a fiobọhọ. Enẹna, ọjọ rai o no ẹwho na no, rekọ ọnọ o kiọkọ ọ be hai kpohọ ewuhrẹ yọ a mu Ebaibol họ ewuhrẹ kugbei no. Eware nana kpobi e via kẹhẹ na, fiki ohwẹ nọ a kpo ku unu!