A Ruabọhọ Usi Uwoma Ota Evaọ Etoke Okpẹyao COVID-19 Na

Evaọ etoke okpẹyao COVID-19 na, inievo mai a nwene oghẹrẹ nọ a be rọ vuẹ ahwo ovuẹ Ebaibol na nọ o rẹ kẹ omosasọ na. Ukpenọ a rẹ jọ ẹgbede ta usi uwoma hayo kpohọ iwou ahwo, kọ ifonu gbe ileta a be rọ ta usi uwoma na.a Idhere nana nọ a be rọ ta usi uwoma na o be were ahwo buobu oma, yọ ma ruẹ eghale Jihova no. (Itẹ 16:3, 4) Rri iriruo jọ nọ i no orẹwho jọ nọ o rrọ ukoliko ze.

Taure okpẹyao COVID-19 na o te ti muhọ, Helen ọ jẹ hai kpohọ uwou aye jọ ẹsikpobi jẹ ta kẹe nọ ọ gwọlọ nọ o re wuhrẹ Ebaibol kugbei. Aye na ọ rọwo ẹdẹvo ho. Rekọ evaọ ẹdẹ nọ ọ vrẹ taure a tẹ te ta nọ ahwo a no uwou ze he fiki okpẹyao na, Helen ọ kẹ riẹ obe na Eme Ebaibol na Ọ rẹ Sai Wuhrẹ Omai? Evaọ etoke nana, Helen ọ tẹ wariẹ ta kẹ aye nana inọ ọ gwọlọ nọ o re wuhrẹ Ebaibol kugbei, jẹ ta kẹe inọ ifonu a te jọ wuhrẹ. Aye na ọ tẹ rọwo. Uwuhrẹ na o were riẹ gaga, u kri hi ọ tẹ ta kẹ Helen nọ ọ hai wuhrẹ kugbei kẹdẹ kẹdẹ! Aye na o te je muọ iwuhrẹ họ ẹnya ẹsikpobi ẹkwoma ifonu. U te no ere no, o te mu eware nọ o bi wuhrẹ họ eru lele jẹ be ta eware nọ o bi wuhrẹ na kẹ amọfa.

Isẹri Jihova evaọ ukoko jọ a kere ileta sa-sa se iporisi nọ e rrọ ẹwho na, bi yere ai kẹ obọdẹ iruo nọ a bi ru. Ileta na i gbe iporisi na unu. Iporisi jọ ọ ta kẹ Jefferson, ọkpako ukoko jọ nọ, “Mẹ jẹ hai roro anwẹdẹ nọ Isẹri Jihova a mukpahe iporisi.” Jefferson o te dhesẹ kẹe vevẹ nọ ere o rrọ vievie he. Eme nọ e rrọ ileta na e were iporisi na oma te epanọ a rọ tae mu unuẹthẹ ogba iporisi na. Iporisi ọfa ọ ta nọ, “Onana o te whai ze nọ amọfa a te rọ rehọ emamọ ubiẹro rri omai.”

Edna avọ Ednalyn yọ ekobaro oke-kpobi.b Fikinọ a wo itanẹte evaọ uwou rai hi, a jẹ sae jọ itanẹte kuomagbe ukoko rai ru ewuhrẹ hẹ. Fikiere a tẹ rọ ifonu se ohwo jọ nọ a gbẹ rrọ ogbe nọ ọ rrọ Osẹri Jihova ha, a tẹ nọe sọ ọ sae kẹ ai uvẹ re a rehọ itanẹte riẹ ru ewuhrẹ, inọ a te kẹe umugho jọ fihọ itanẹte na. Aye na ọ tẹ ta nọ a sae rehọ iẹe kọnẹte rekọ a du hwa ugho ho. Edna avọ Ednalyn a tẹ vuẹ aye na nọ ọ sai thuru kugbe iwuhrẹ na, o te gine ru ere. Ma be ta ẹme na, Isẹri Jihova a bi wuhrẹ Ebaibol kugbe aye na, ọmọ riẹ jọ, gbe emọ-iruọmọ ivẹ riẹ, a te je bi kpohọ iwuhrẹ ẹsikpobi.

Inievo na a zizie ahwo nọ a gbẹ be rria oria, ahwo nọ a gbe bi ru iruo, gbe amọfa re a gaviezọ kẹ ovuẹ ogbotu nọ a te rrọ ẹkwoma ekọmputa hayo ifonu kẹ. Evaọ oke ọsosuọ, o jẹ ruọ Ellaine nọ ọ be jọ ọspito ẹwho na ru iruo oma ha re o zizie ibe iruiruo riẹ. Evaọ iroro riẹ, edọktọ jọ a be rrọ ekpehre ubiẹro rri Isẹri na. Ghele na, ọ tẹ rrọ ifonu vi uwou se edọktọ nọ e rrọ ọspito na. U wo edọktọ ivẹ jọ nọ e rrọ ọzae-avọ-aye nọ Ellaine ọ jẹ gwọlọ zizie vievie he. Nọ o roro ẹme na jẹ lẹ kpahe iẹe no, ọ tẹ rọ ifonu vi uwou se ai. Aye na ọ tẹ za zihe sei nọ: “Koyehọ whọ gwọlọ nọ me kurẹriẹ ruọ egagọ ra ere na?” Ellaine ọ tẹ ta nọ, ohwo kpobi ọ rẹ sae ziọ iwuhrẹ na, orọnikọ Isẹri Jihova ọvo ho. Okiokiọ riẹ, u gbe Ellaine unu nọ ọ ruẹ nọ ọzae-avọ-aye na a thuru kugbe ewuhrẹ na, yọ a kake rueva gaga. Ellaine ọ ta nọ: “Re ewuhrẹ na ọ tẹ te fa, aye na ọ rrọ ifonu vi uwou se omẹ inọ: ‘Onana họ orọ ọsosuọ nọ mẹ rọ ziọ ewuhrẹ Isẹri Jihova. O jọ ziezi. Eva e were omẹ. Me yere owhẹ nọ who ro zizie omẹ.’”

Edọktọ 20 Ellaine o zizie kẹ ewuhrẹ na, yọ oma o were riẹ gaga nọ ọ ruẹ nọ 16 e ziọ ewuhrẹ na. Nọ Ellaine ọ jẹ wariẹ eme Pọl ukọ na, ọ ta nọ: “Eva e were omẹ nọ mẹ rọ ‘gudu whowho usi uwoma Ọghẹnẹ’ kẹ ibe iruiruo mẹ.”—1 Ahwo Tẹsalonika 2:2.

Okpẹyao na o gboja kẹ ahwo kpobi. Rekọ inievo mai nọ e rrọ orẹwho nana nọ o rrọ ukoliko na gbe eria efa a be wereva ghele jẹ be dawo ẹgba rai kpobi re a fiobọhọ kẹ amọfa jẹ sasa ae oma.—Iruẹru Ikọ Na 20:35.