[no ẹkpẹlobọ kpohọ obọze] Marcelo, Yomara, gbe Hiver. Aimasa na a kru Ebaibol Efafa Akpọ Ọkpokpọ orọ ẹvẹrẹ Spanish họ obọ, onọ a ru kẹ ahwo otuaro
A Muẹrohọ nọ Inievo na A You Rai Gaga
ỌMỌTẸ jọ nọ a re se Yomara avọ inievo-emezae ivẹ riẹ Marcelo avọ Hiver a be rria iwhre ọsese jọ evaọ obọ Guatemala. Isẹri Jihova a te mu Yomara Ebaibol họ ewuhrẹ. Uwhremu na, a te ti mu inievo ivẹ riẹ na họ ewuhrẹ re. Rekọ aimasa na a tuaro, yọ a riẹ epanọ a re se ebe nọ a ru kẹ ahwo otuaro ho. Fikiere oniọvo nọ o je wuhrẹ ai Ebaibol na ọvo o re se idhe-eme na gbe eria Ebaibol nọ e rrọ oria nọ a bi wuhrẹ na kẹ ae.
Oke o be nyaharo na, a tẹ te gwọlọ nọ a re kpohọ ewuhrẹ, rekọ re a sai te Ọgwa Uvie nọ ọ mae kẹle ae, o rẹ rehọ iminiti udhuvẹ, yọ ae ọvo a sae nyate obei hi. Inievo ukoko na a tẹ jẹ hae wọ ae kpohọ ewuhrẹ ẹsikpobi. U te ti te epanọ a ro mu aimasa na ẹme họ ẹkẹ evaọ abọ isukulu ọrọ ewuhrẹ udevie-oka. Yọ inievo na a jẹ hai fiobọhọ kẹ ae re a wuhrẹ ẹme na fihọ uzou ziezi, a vẹ sai ru ei.
Evaọ Asoi 2019, a te ti mu ewuhrẹ họ eru evaọ iwhre nọ a jẹ rria na. Oke yena yọ oniọvo jọ avọ aye riẹ nọ a rrọ ekobaro oke-kpobi a nwane kwa ziọ iwhre na no re. Aimava na a tẹ jẹ gwọlọ oghẹrẹ kpobi nọ a re ro wuhrẹ Yomara avọ inievo riẹ epanọ a re se ebe nọ a ru kẹ ahwo otuaro je kere eme rai. Whaọ aimava na a tubẹ riẹ epanọ a re se je kere eme ahwo otuaro ho. Fikiere a te se kpahe iẹe ziezi jẹ daoma riẹ oghẹrẹ nọ a sai ro wuhrẹ omọfa epanọ a re se ebe nọ a ru kẹ ahwo otuaro je kere eme rai.
Marcelo nọ ọ be kẹ uyo evaọ obọ ewuhrẹ
A te ti mu ai họ ewuhrẹ. Nọ a wuhrẹ Yomara avọ inievo riẹ te emerae jọ no, a tẹ riẹ epanọ a re se ebe nọ a ru kẹ ahwo otuaro ziezi. Onana o lẹliẹ e rai nyaharo ziezi evaọ ukoko na.a Enẹna Yomara avọ Marcelo, gbe Hiver a rrọ ekobaro oke-kpobi. Ere ọvo ho, Marcelo yọ odibo oruiruo. Aimasa na a kruga ziezi evaọ ukoko na, yọ amọfa a be rọ aro kele ai.
Obọ nọ inievo ukoko na a fihọ kẹ Yomara avọ inievo riẹ o da rai ẹro fia. Yomara ọ ta nọ: “Inievo na a gine you omai gaga yọ anwọ ẹdẹ ọsosuọ nọ a rọ ta usi uwoma kẹ omai a bi ro fiobọhọ kẹ omai.” Marcelo ọ ta nọ: “Ma wo obọdẹ egbẹnyusu evaọ ukoko mai. Ma te je wo inievo buobu nọ i you ohwohwo evaọ akpọ na soso.” Yomara avọ inievo riẹ a bi rẹro oke nọ a te rọ rehọ ibiaro ivẹ rai ruẹ epanọ a bi ro ru otọakpọ na fihọ aparadase.—Ol. 37:10, 11; Aiz. 35:5.
a Ibroshọ jọ ọ riẹ nọ u re fiobọhọ kẹ ohwo nọ o tuaro hayo ohwo nọ ọ be ruẹ ude tere he se ebe nọ a ru kẹ ahwo otiọye na je kere eme rai. Uzoẹme riẹ họ Learn to Read Braille.