Epanọ O Sai ro Mu Omai Ẹro Viere inọ Jihova Ọ te Rehọ Akpọ Ọkpokpọ Ze

1-2. Eme u fo nọ ma re ru nọ ma be hẹrẹ akpọ ọkpokpọ na?

JIHOVA ọ ya eyaa nọ ọ te raha akpọ oyoma nana no, ọ vẹ te rọ akpọ ọkpokpọ ze. Eyaa nana e were omai gaga. (2 Pita 3:13) Dede nọ ma riẹ ẹdẹ nọ Ọghẹnẹ ọ te rọ rehọ akpọ ọkpokpọ na ze he, eware nọ e be via i dhesẹ nọ u ti gbe kri hi.—Mat. 24:32-34, 36; Iruẹru 1:7.

² O tẹ make rọnọ ma rrọ ukoko na kri no, mai kpobi ma rẹ gbẹ daoma ru eware nọ e rẹ lẹliẹ ẹrọwọ mai ga re eyaa Ọghẹnẹ i gbe mu omai ẹro ziezi. Fikieme? Keme ma gbe ru ere he, avro ọ sae ruọ omai udu, ẹrọwọ mai ọ gbẹ ga tere he. Pọl ukọ na ọ ta nọ ẹrọwọ mai nọ ọ rẹ ga ha ẹsejọ na yọ “uzioraha nọ ma re kie ro lọlọhọ.” (Hib. 12:1) Re ma gbe wo avro ọvo ho, ma rẹ hai gbe wuhrẹ kpahe oware nọ o lẹliẹ omai riẹ nọ eyaa Ọghẹnẹ i ti rugba kẹle na.—Hib. 11:1.

3. Eme ma te ta kpahe evaọ uzoẹme nana?

³ Ma te jọ uzoẹme nana ta kpahe eware esa nọ ma re ru re eyaa nọ Ọghẹnẹ ọ ya kpahe akpọ ọkpokpọ na i mu omai ẹro ziezi. Orọ ọsosuọ, ma rẹ hai roro didi kpahe idhe ẹtanigbo na. Orọ avọ ivẹ, ma rẹ hai roro kpahe epanọ Jihova o wo ẹgba te. Orọ avọ esa, ma rẹ hai ru eware nọ i re si omai kẹle Jihova. Ma te jẹ ta kpahe epanọ ẹme nọ Ọghẹnẹ ọ vuẹ Habakọk o sai ro ru ẹrọwọ mai ga. Joma kake ta kpahe eware jọ nọ e be via nẹnẹ, nọ e rẹ sai lẹliẹ omai wo avro kpahe eyaa akpọ ọkpokpọ nọ Ọghẹnẹ ọ ya na.

OWARE NỌ U RO FO NỌ MA RE WO ẸRỌWỌ ỌGAGA

4. Iroro vẹ ma rẹ jẹ ẹsejọ nọ u ro fo re ma wo ẹrọwọ ọgaga?

⁴ Kẹdẹ kẹdẹ ma rẹ jiroro oware nọ ma gwọlọ ru. Ma gbe wo ẹrọwọ ọgaga ha, ma sae jẹ emamọ iroro ho. Wọhọ oriruo, ma rẹ jiroro kpahe ahwo nọ ma re lele nya usu, ighe hayo ifimu nọ ma re rri, epanọ ma re kpohọ isukulu te gbe oghẹrẹ isukulu nọ ma rẹ nya, sọ ma rẹ rọo, ohwo nọ ma rẹ rehọ, unu emọ nọ ma gwọlọ yẹ hayo sọ ma re yẹ hẹ, gbe oghẹrẹ okọ nọ ma gwọlọ kọ. Fikiere, u fo re ma hae nọ omamai nọ: ‘Kọ eware nọ me bi ru i bi dhesẹ nọ mẹ rọwo nọ Ọghẹnẹ ọ te raha akpọ nana kẹle, ọ vẹ te rọ akpọ ọkpokpọ ze? Binikọ mẹ be rọ aro kele ahwo nọ a roro nọ ohwo o te whu no ẹruore ọvo ọ gbẹ riẹ hẹ?’ (Mat. 6:19, 20; Luk 12:16-21) U te mu omai ẹro ziezi inọ Ọghẹnẹ ọ te raha akpọ nana kẹle, ọ vẹ te rehọ akpọ ọkpokpọ ze, ma te jẹ emamọ iroro.

5-6. Ẹvẹ ẹrọwọ ọgaga ọ sai ro fiobọhọ kẹ omai nọ ẹbẹbẹ o te te omai? Kẹ oriruo.

⁵ Ma te wo ẹrọwọ ọgaga, u re je fiobọhọ kẹ omai nọ edawọ i te te omai. Ẹsejọ a re kpokpo omai fikinọ ma be gọ Ọghẹnẹ, okpẹyao o sai kie omai, yọ oware jọ o sae via nọ u re ru nọ eva e gbẹ rọ were omai hi. Oke ọsosuọ nọ ẹbẹbẹ o te te omai, udu o sae jọ omai awọ. Rekọ nọ ẹbẹbẹ na o te bi siotọ wọhọ epanọ o rẹ jọ ẹsibuobu na, ma gbe wo ẹrọwọ ọgaga ha, ma sai thihakọ riẹ jẹ gọ Jihova vrẹ avọ evawere he.—Rom 12:12; 1 Pita 1:6, 7.

⁶ Ẹbẹbẹ ologbo jọ o te te omai, ma sai roro nọ Jihova ọ te gbẹ rehọ akpọ ọkpokpọ na ze he. Kọ oyena u dhesẹ nọ ma wo ẹrọwọ họ? O nwane rrọ ere he. Joma kẹ oriruo jọ. Ma tẹ rrọ ezi iso, yọ iso i bi dhe ẹrẹrọ, ma sai roro nọ ezi uvo ọ te ze he. Rekọ ezi uvo ọ rẹ seba ete he. Epọvo na re, eva e gbẹ be were omai hi fiki oware jọ nọ o via kẹ omai, ma rẹ sai roro nọ akpọ ọkpokpọ na ọ te gbẹ ze he. Rekọ ẹrọwọ mai ọ tẹ rrọ gaga, u re mu omai ẹro inọ Ọghẹnẹ ọ te siọ eyaa riẹ ba erugba ha. (Ol. 94:3, 14, 15; Hib. 6:17-19) U te mu omai ẹro ere, ma te gbẹ gọ Jihova ghelọ ebẹbẹ nọ i te omai.

7. Eme u fo nọ ma rẹ daoma whaha?

⁷ Joma ta kpahe oware ofa nọ u ro fo re ma wo ẹrọwọ ọgaga. Oye họ, u re fiobọhọ kẹ omai ruabọhọ iruo usi uwoma ota na. Ahwo buobu nọ ma rẹ ta “usi uwoma” kẹ, ma tẹ vuẹ ae nọ akpọ ọkpokpọ Ọghẹnẹ ọ be tha, a re roro nọ oware utiọye o te via ẹdẹvo ho. (Mat. 24:14; Izik. 33:32) Ma gwọlọ nọ avro otiọye na ọ rẹ ruọ omai udu hu. Fikiere u fo nọ ma re ru eware nọ e rẹ lẹliẹ ẹrọwọ mai ga ẹsikpobi. Joma ta kpahe eware esa jọ.

HAI RORO DIDI KPAHE IDHE ẸTANIGBO NA

8-9. Ẹvẹ ẹrọwọ mai ọ rẹ jọ nọ ma te bi roro didi kpahe idhe ẹtanigbo na?

⁸ Ma te bi roro didi kpahe idhe ẹtanigbo na, ma re wo ẹrọwọ ọgaga. Jesu nọ Jihova o vi ze ti whu kẹ omai na yọ oware jọ nọ o lẹliẹ omai riẹ nọ eyaa Ọghẹnẹ e te seba erugba ha. Fikiere, joma hai roro didi kpahe oware nọ o wha riẹ ze nọ Ọghẹnẹ o ro vi Jesu ze ti whu kẹ omai, gbe oware nọ a thihakọ riẹ re a sae ta omai no igbo. Ma te bi ru ere, u ti mu omai ẹro inọ akpọ ọkpokpọ na ọ te ginẹ ze, ahwo a vẹ te rria bẹdẹ bẹdẹ. Fikieme ma rọ ta ere?

⁹ Eme Jihova avọ Jesu a ru re a sae ta omai no igbo? Jihova o vi Ọmọ ọsosuọ riẹ nọ o you gaga na ziọ otọakpọ, yọ ọ jọ gbagba nọ a yẹe. Ọmọ na ọ rria kugbe Ọsẹ na ikpe buobu evaọ obọ odhiwu, yọ ọ kpekpe riẹ oma gaga. Oke nọ Jesu ọ jọ otọakpọ, ebẹbẹ buobu i te rie nọ o thihakọ rai. Nọ u te oria jọ no, a tẹ lahiẹe je kpei, o te whu uwhu oja. Oware nọ Jihova o thihakọ riẹ o rro kẹhẹ! Kọ Ọghẹnẹ ọ gbẹ hae gwọlọ nọ ma rẹ rria bẹdẹ bẹdẹ evaọ emamọ akpọ họ, ọ hai vi Ọmọ riẹ ze re o whu kẹ omai? (Jọn 3:16; 1 Pita 1:18, 19) Nọ orọnọ Ọghẹnẹ o siobọno Ọmọ ọvo riẹ ze ti whu kẹ omai na, ọ te ginẹ rọ akpọ ọkpokpọ na ze jẹ kẹ omai uzuazọ ebẹdẹ bẹdẹ.

HAE KAREGHẸHỌ EPANỌ JIHOVA O WO ẸGBA TE

10. Wọhọ epanọ obe Ahwo Ẹfisọs 3:20 o ta, eme Jihova ọ rẹ sai ru?

¹⁰ Oware ofa nọ o rẹ lẹliẹ omai wo ẹrọwọ ọgaga họ, nọ ma tẹ be hai roro didi kpahe epanọ Ọghẹnẹ o wo ẹgba te. Jihova o wo ogaga nọ ọ sai ro ru eyaa riẹ kpobi gba. Ẹsejọ ma sai roro nọ eyaa nọ ọ ya inọ ma te rria bẹdẹ bẹdẹ evaọ akpọ ọkpokpọ na o sai rugba ha. Rekọ joma kareghẹhọ nọ Jihova ọ ya eyaa eware nọ ohwo-akpọ ọ sai ru hu unuẹse buobu no. Yọ o ru rai gba. Kọ eme o gbẹ jọ ere he? Jihova họ Ọghẹnẹ Erumeru na. (Job 42:2; Mak 10:27) Fikiere u re gbe omai unu hu inọ Jihova ọ rẹ ya eyaa ikpeware.—Se Ahwo Ẹfisọs 3:20.

11. Kẹ oriruo oware jọ nọ Jihova ọ ya eyaa riẹ nọ ohwo ọ sai roro nọ o te sae via ha. (Rri ẹkpẹti na “Ikpeware nọ Jihova Ọ Ya Eyaa Rai nọ I Rugba.”)

¹¹ Joma ta kpahe eyaa jọ nọ Jihova ọ ya kẹ idibo riẹ evaọ oke nọ u kpemu nọ o wọhọ nọ oware utiọye o sae via vievie he. Jihova ọ vuẹ Abraham avọ Sera nọ a ti yẹ ọmọ, yọ oke yena a kpako vi ahwo nọ a re yẹ ọmọ no. (Emu. 17:15-17) Ọ tẹ jẹ ta kẹ Abraham nọ ọ te rehọ ẹkwotọ Kenan kẹ emọ riẹ. Ahwo Izrẹl nọ e jọ emọ Abraham a jọ igbo ikpe buobu evaọ obọ Ijipti. Oke yena o tẹ wọhọ nọ oware nọ Ọghẹnẹ ọ ya eyaa riẹ na o te sae via ha. Rekọ o via nwane wọhọ epanọ ọ ta. Nọ ikpe buobu e vrẹ no, Jihova ọ ta nọ Ẹlizabẹt nọ ọ kpako gaga no o ti yẹ ọmọ. Jihova ọ ya eyaa kẹ Meri re inọ dede nọ ọ gbẹ rrọ ọmọtẹ nọ ọ riẹ ọzae he, o ti dihọ, o ve ti yẹ Ọmọ Ọghẹnẹ. Yọ Ọmọ nana nọ Meri o bi ti yẹ na, ọye Jihova ọ ya eyaa riẹ fihotọ no anwẹdẹ evaọ ọgbọ Idẹn na. Ẹme nọ Ọghẹnẹ ọ vuẹ Meri na u dhesẹ nọ oke nọ o ti ro ru eyaa yena gba u te no.—Emu. 3:15.

12. Eme Joshua 23:14 gbe Aizaya 55:10, 11 o lẹliẹ omai riẹ kpahe ogaga nọ Jihova o wo?

¹² Ma tẹ be hai roro kpahe eyaa nọ Ọghẹnẹ ọ ya evaọ oke nọ u kpemu gbe epanọ o ro ru ai gba, ẹrọwọ mai ọ te jọ gaga. Ma ve ti fievahọ Jihova inọ ọ te rọ akpọ ọkpokpọ ze. (Se Joshua 23:14; Aizaya 55:10, 11.) Yọ ẹrọwọ mai ọ tẹ rrọ gaga, u ti fiobọhọ kẹ omai wuhrẹ amọfa re a fievahọ Ọghẹnẹ inọ ọ te ginẹ rọ akpọ ọkpokpọ na ze. Re eyaa nọ Ọghẹnẹ ọ ya kpahe idhiwu ekpokpọ gbe akpọ ọkpokpọ na e sai mu omai ẹro, Jihova ọ ta nọ: “Eme nana yọ eme nọ a re fievahọ, e tẹ jẹ rrọ uzẹme.”—Evia. 21:1, 5.

HAI RU EWARE NỌ I RE SI OWHẸ KẸLE ỌGHẸNẸ KẸSE KẸSE

13. Ẹvẹ ewuhrẹ nọ ma rẹ nya ẹsikpobi o rẹ rọ lẹliẹ ẹrọwọ mai ga? Ru ei vẹ.

¹³ Oware ọfa nọ o rẹ lẹliẹ ẹrọwọ mai ga họ, nọ ma tẹ be hai ru eware nọ i re si omai kẹle Ọghẹnẹ kẹse kẹse. Ma te bi kpohọ ewuhrẹ kẹse kẹse, o rẹ lẹliẹ ẹrọwọ mai ga. Joma ta kpahe oniọvo jọ nọ a re se Anna. Oniọvo na o ru oghoghẹrẹ iruo odibọgba oke-kpobi na te ikpe buobu no. Ọ ta nọ: “Ewuhrẹ nọ mẹ be hae nya, o be lẹliẹ ẹrọwọ mẹ ga. O sae jọ nọ ohwo jọ nọ o bi ru ẹme, ọ nwane riẹ ẹme eru tere he, hayo ọ be ta oware okpokpọ ọvo ze nọ mẹ sai kru họ obọ họ. Rekọ ẹsibuobu, mẹ rẹ jọ ẹme oniọvo otiọye na yo ẹme jọ nọ ọ rẹ lẹliẹ oware nọ mẹ riẹ no vẹre vẹ omẹ ẹro viere, yọ o rẹ lẹliẹ ẹrọwọ mẹ ga.”b Ere ọvo ho, iyo nọ inievo mai a rẹ kẹ i re ru ẹrọwọ mai ga.—Rom 1:11, 12; 10:17.

14. Ẹvẹ usi uwoma nọ ma rẹ nya u re ro ru ẹrọwọ mai ga?

¹⁴ Usi uwoma nọ ma rẹ nya o rẹ lẹliẹ ẹrọwọ mai ga re. (Hib. 10:23) Oniọvo jọ nọ a re se Barbara nọ ọ gọ Jihova vrẹ ikpe udhosa-gbikpe no ọ ta nọ: “Usi uwoma nọ mẹ be nya ẹsikpobi o be lẹliẹ ẹrọwọ mẹ ga. Mẹ ruẹ nọ epanọ me wuhrẹ ahwo kpahe eyaa Jihova te, ere ẹrọwọ mẹ ọ be ga te re.”

15. Ẹvẹ ewuhrẹ omobọ mai nọ ma re ru o rẹ rọ lẹliẹ ẹrọwọ mai ga? (Rri iwoho na re.)

¹⁵ Joma ta kpahe oware ọfa nọ o rẹ sae lẹliẹ omai kẹle Ọghẹnẹ je ru ẹrọwọ mai ga. Oye họ uwuhrẹ omobọ mai. Oniọvo jọ nọ a re se Susan ọ ma omaa epanọ o re ro ru ewuhrẹ omobọ riẹ fihotọ, yọ onana u bi fiobọhọ kẹe gaga. Ọ ta nọ: “Kẹdoka kẹdoka, mẹ rẹ ruẹrẹ oma kpahe kẹ Uwuhrẹ Uwou-Eroro nọ a ti ru evaọ oka nọ u ti lele iei. Evaọ Ẹdọvo-Oka gbe Edivẹ-Oka, mẹ vẹ ruẹrẹ oma kpahe kẹ ewuhrẹ udevie oka. Edẹ nọ i kiọkọ evaọ oka na, mẹ vẹ rehọ ai wuhrẹ eware jọ evaọ Ebaibol.” Ewuhrẹ omobọ riẹ nọ Susan o bi ru kẹse kẹse na o be lẹliẹ ẹrọwọ riẹ ga. Oniọvo ọfa nọ a re se Irene nọ ọ jọ obọ ehri ukoko ru iruo te ikpe buobu no, ọ be hai ru ewuhrẹ omobọ riẹ re. Eruẹaruẹ Ebaibol nọ ọ be hai wuhrẹ o be lẹliẹ ẹrọwọ riẹ ga. Ọ ta nọ: “Me te se eruẹaruẹ Ebaibol jọ, jẹ ruẹ epanọ eruẹaruẹ na i ro rugba tọkọ toni, u re gbe omẹ unu yọ o rẹ lẹliẹ ẹrọwọ mẹ ga.”c

“O TE SEBA ERUGBA HA”

16. Fikieme ẹme nọ Jihova ọ ta kẹ Habakọk o sai ro fiobọhọ kẹ omai nẹnẹ? (Ahwo Hibru 10:36, 37)

¹⁶ U kri no nọ idibo Jihova jọ a be rọ hẹrẹ ẹdẹ nọ Jihova ọ te rọ raha akpọ omuomu nana. Jihova ọ ya eyaa nọ o ti ru ere, rekọ u re lehie ohwo-akpọ ẹro ẹsejọ. Ere o jọ kẹ ọruẹaro Ọghẹnẹ nọ a re se Habakọk. O tẹ whae ze nọ Jihova ọ rọ ta kẹe nọ: “Eruẹaruẹ na e be hẹrẹ oke nọ a fihọ kẹe, yọ oke nọ u ti ro rugba u te otọ no, o te ta ọrue he. O tẹ make be raha oke dede, gbe rẹro riẹ! Keme o te seba erugba ha. U ti rugba evaọ ẹruoke!” (Hab. 2:3) Kọ Habakọk ọvo who roro nọ Ọghẹnẹ ọ rọ fiki riẹ ta ẹme yena? Kọ ẹme yena ọ gbẹ sai fiobọhọ kẹ omai nẹnẹ re? Ẹzi Ọghẹnẹ ọ kpọ Pọl ukọ na kere ọkpọ ẹme otiọye na se Ileleikristi nọ i bi rẹro oke nọ eyaa Ọghẹnẹ i ti ro rugba. (Se Ahwo Hibru 10:36, 37.) Fikiere, o tẹ make rọnọ ma hẹrẹ akpọ ọkpokpọ na bẹ no, joma kareghẹhọ nọ eyaa Ọghẹnẹ i “ti rugba evaọ ẹruoke!”

17. Ẹvẹ ẹme nọ Jihova ọ ta kẹ Habakọk u ro fiobọhọ kẹ oniọvo-ọmọtẹ mai jọ?

¹⁷ Idibo Jihova buobu a bi “rẹro” ẹdẹ nọ Jihova ọ te raha akpọ omuomu nana. Yọ ere ọ ta nọ ma rẹro riẹ. Oniọvo-ọmọtẹ jọ nọ a re se Louise nọ o mu Jihova họ ẹgọ evaọ ukpe 1939 ọ ta nọ: “Evaọ oke yena, me roro nọ taure me te ti no ekọleji nwrotọ, yọ Amagidọn o fi no, rekọ o via ere he. Anwọ oke yena ze na, mẹ be hai se iku ahwo wọhọ Noa, Abraham, gbe Josẹf nọ a hẹrẹ oke krẹkri taure oware nọ Ọghẹnẹ ọ ya eyaa riẹ ọ tẹ te via. Yọ iku rai i bi fiobọhọ kẹ omẹ gaga. Eyaa Ọghẹnẹ nọ me bi rẹro riẹ na i bi fiobọhọ kẹ omẹ gbe amọfa kareghẹhọ nọ akpọ ọkpokpọ nọ ọ ya eyaa riẹ na ọ kẹle gaga no.” Ma riẹ nọ inievo efa nọ e gọ Jihova kri no a te rọwo nọ uzẹme oniọvo na ọ ta na.

18. Ẹvẹ emama Ọghẹnẹ nọ ma be ruẹ e sae rọ lẹliẹ omai fievahọ eyaa akpọ ọkpokpọ na?

¹⁸ Ginọ uzẹme inọ akpọ ọkpokpọ na ọ re ze he. Ma be ruẹ e riẹ obọnana ha. Rekọ eware jọ e riẹ nọ ma be ruẹ obọnana. Ma be ruẹ isi na, ire, erao gbe ahwo. Ohwo ọvo ọ rẹ vro vievie he inọ eware nana e riẹ hẹ. Rekọ oke jọ o jariẹ nọ eware nana e jariẹ hẹ. Kọ eme o ru nọ eware nana e rọ riẹ? Jihova ọye ọ ma rai. (Emu. 1:1, 26, 27) Epọvo na re, Ọghẹnẹ ọ ya eyaa nọ ọ te rọ akpọ ọkpokpọ ze. O ti ru eyaa yena gba. Nọ akpọ ọkpokpọ na ọ tẹ ze no, ma te rria bẹdẹ bẹdẹ avọ omokpokpọ. Oke nọ Ọghẹnẹ o fihọ o te te, ma te ruẹ akpọ ọkpokpọ na wọhọ epanọ ma be ruẹ eware nọ Ọghẹnẹ ọ ma fihọ akpọ na nẹnẹ na.—Aiz. 65:17; Evia. 21:3, 4.

19. Eme who re ru re ẹrọwọ ra ọ ga?

¹⁹ Taure Ọghẹnẹ ọ tẹ te rehọ akpọ ọkpokpọ na ze, hae daoma ra kpobi re who ru eware nọ e rẹ lẹliẹ ẹrọwọ ra ga. Hai roro didi kpahe idhe ẹtanigbo na, jẹ hae kareghẹhọ inọ yọ obọdẹ oware jọ nọ Jihova o ru kẹ omai. Hai roro kpahe epanọ Jihova o wo ẹgba te. Hai ru eware nọ e rẹ lẹliẹ owhẹ si kẹle Jihova kẹse kẹse. Who te bi ru ere, whọ te jọ usu ahwo nọ “e rọ ẹkwoma ẹrọwọ gbe odiri reuku eyaa na.”—Hib. 6:11, 12; Rom 5:5.