Gwọlọ Oria nọ U Dhẹ Oma

Kọ whọ gwọlọ riẹ eware buobu nọ who te bi wuhrẹ Ebaibol kẹ omara? O tẹ rrọ ere, eware nọ ma be te ta na e sai fiobọhọ kẹ owhẹ.

• Kpohọ oria nọ u re kiehọ owhẹ oma. Kpohọ oria nọ ọ rrọ whroro whroro ho nọ elo ọ rrọ re whọ sae ruẹ ude ru uwuhrẹ na. Yọ o tẹ lọhọ wọ akpala nọ whọ rẹ keria gbe itebu nọ who re fi Ebaibol gbe ebe nọ who ti se na fihọ.

• Gwọlọ oria nọ whẹ ọvo ọ rẹ jọ. Evaọ “irioke frifri” Jesu ọ lẹ. Yọ “oria nọ u siomano” ọ jọ lẹ. (Mak 1: 35) Kọ o gbẹ lọhọ re whẹ ọvo ọ jọ oria ra sa ha, eme who re ru? Whọ sae vuẹ ahwo uwou ra oke nọ who re ro ru uwuhrẹ omobọ ra re a siọ owhẹ ba ekpokpo.

• Daoma re oware ovo u gbe kpokpo owhẹ hẹ. Otẹrọnọ ifonu who re ro ru uwuhrẹ omobọ ra, fi ifonu na họ epanọ u gbe ro kpokpo owhẹ hẹ. Kọ eme who re ru nọ iroro ra i te kpohọ oware jọ nọ u fo nọ who re ru evaọ udevie epanọ who bi ro ru uwuhrẹ na? Kere oware nọ o ziọ owhẹ iroro na fihọ otọ re o gbẹ thọrọ owhẹ ẹro ho, re whọ sai ru ei ẹsiẹfa. Kinọ o jẹ via nọ iroro ra e gbẹ be dhẹ whọhọ whọhọ? Siọ isase na ba re whọ dina nya wariẹ omojọ. Nọ who te ru ere no, whọ vẹ wariẹ muhọ ese.