Kọ U Fo re Ileleikristi A Rehọ Eware nọ E rẹ Whaha Udihọ?

Uyo nọ Ebaibol na ọ kẹ

Jesu o fi uzi ovo họ kẹ ilele riẹ hẹ inọ a yẹ emọ hayo a yẹ hẹ. Yọ ikọ riẹ a fi uzi utioye họ gbe he. Oria ovo o rrọ Ebaibol na ha nọ o nwane ta vevẹ inọ o thọ re a rehọ eware nọ e rẹ whaha udihọ. Evaọ ẹme nana, uzi nọ o rrọ obe Ahwo Rom 14:12 na u fo nọ ma re lele: “Mai kpobi ma ti . . . gu ọvuọ ẹkẹunu riẹ kẹ Ọghẹnẹ.”

Fikiere, ahwo nọ a rọo no a rẹ jiroro na kẹ omobọ rai sọ a re yẹ emọ hayo a re yẹ hẹ. A rẹ jẹ jiroro unu emọ nọ a re yẹ gbe oke nọ a re ro yẹ emọ na. Otẹrọnọ ọzae avọ aye a gwọlọ rehọ eware nọ e rẹ whaha udihọ, orọnikọ enọ a rẹ rọ kpare eva ha, oyena yọ ẹme obọrai. Ohwo ọvo o re gu ai ẹdhọ họ.—Ahwo Rom 14:4, 10-13.