Uviuwou nọ Oware Odada O Via kẹ, Rekọ nọ A Wariẹ Mu Eva Họ Ẹwere

Nọ aye mẹ Kaye o yẹ ọmọtẹ mai nọ a re se Lauren, mẹ riẹ oware nọ me re ru re mẹ jọ emamọ ọsẹ hẹ. Yọ nọ ma maki yẹ ọmọ avivẹ mai nọ a re se Michael no, mẹ re riẹ oware nọ me re ru re mẹ jọ emamọ ọsẹ ghele he. Ọsẹgboni mẹ a jẹ hae whọ jẹ họre gaga, ukuhọ riẹ orọo rai o tẹ fa. Dede nọ mẹ gwọlọ jọ emamọ ọsẹ nọ ọ rẹ rẹrote uviuwou riẹ ziezi, mẹ riẹ epanọ mẹ sai ro ru ei hi.

Oware nọ o wha riẹ ze nọ o rọ jọ ere kẹ omẹ na họ, oke nọ mẹ jọ uzoge, mẹ jẹ hae da idi jẹ lọ imu egaga. Nọ me te ohwo no, uzuazọ mẹ o tẹ tahaku. Fikinọ mẹ jẹ hae da idi, lọ imu egaga je fi edhọ, onana u ru nọ me je ro ru eware buobu thọ. Eware i yoma te epanọ aye mẹ Kaye ọ rọ kwa siọ omẹ ba, yọ ọ wha emọ ivẹ mai lele oma. Mẹ gbẹ riẹ oware nọ me re ru hu.

Mẹ tẹ nọ aye mẹ oware nọ me re ru re ọ sae kwa zihe ze. Evaọ oke yena, yọ Osẹri Jihova jọ nọ a re se Gloria o bi wuhrẹ iẹe Ebaibol na, fikiere aye mẹ ọ tẹ ta kẹ omẹ nọ: “Wuhrẹ Ebaibol na.” Me wo otoriẹ ẹme riẹ na vevẹ hẹ, rekọ fikinọ mẹ gwọlọ nọ o zihe ze, mẹ tẹ rọwo nọ Gloria avọ ọzae riẹ Bill a sae nyaze ti wuhrẹ omẹ Ebaibol na, dede nọ mẹ gwọlọ wuhrẹ hẹ.

Uzuazọ Mẹ U Nwene

Nọ Bill avọ Gloria a nyaze obọ uwou mai, mẹ ruẹ nọ aimava na a kpekpe gaga, yọ onana u duobọte omẹ. A ta nọ emọ rai nọ i te ahwo no nọ a rrọ ehwa mẹ, a bi ru emamọ eware je fiobọhọ kẹ amọfa. Me te muhọ eroro inọ ẹsejọhọ Ebaibol na ọ sai wuhrẹ ohwo oware nọ o re ru re o wo evawere evaọ uviuwou riẹ.

Evaọ ẹdẹ yena, Bill avọ Gloria a lele omẹ ta ẹme kpahe ebẹbẹ mẹ. A dhesẹ oware nọ Ebaibol na ọ ta evaọ obe Ahwo Galesha 6:7 kẹ omẹ, nọ o ta nọ: “Oware kpobi nọ ohwo ọ be kọ, oye o ti vu re.” Mẹ tẹ ta kẹ omamẹ nọ, ‘O hae jọ nọ me bi lele ẹme nana anwẹdẹ, mẹ hae ti wo ebẹbẹ nana kpobi hi!’

Nọ oke o be nyaharo na, mẹ tẹ te ruẹ nọ fikinọ me bi ru oware nọ Ebaibol na ọ ta, uzuazọ mẹ u woma vi epanọ o jọ no. Mẹ avọ aye mẹ ma tẹ siọ isigareti ba evovo, yọ a fiobọhọ kẹ omẹ nọ mẹ rọ siọ eware iyoma efa nọ me je ru ba. Evaọ ukpe 1985, ma te yẹ ọmọ avesa mai nọ a re se David. Ma re sei Davey. Evaọ oke yena mẹ rọ riẹ oware nọ o rrọ re ohwo ọ jọ emamọ ọsẹ.

Mai Kpobi Ma jẹ Gọ Jihova

Mẹ avọ aye mẹ ma ruẹ nọ, nọ ma te bi wuhrẹ emọ mai kpahe Jihova, u re si omai kẹle Jihova re. Ma wuhrẹ eware buobu evaọ ebe ukoko na wọhọ Listening to the Great Teacher! Ofariẹ, emamọ oriruo iviuwou efa evaọ ukoko mai u fiobọhọ kẹ omai gbe emọ mai gaga.

Nọ oke o be nyaharo na, emọ mai kpobi a te ti mu iruo ọkobaro họ. Evaọ ubrobọ emuhọ ukpe 2004, ọmọtẹ mai Lauren ọ jọ ukoko ẹvẹrẹ Spanish. Oke yena yọ ọmọzae mai Michael ọ nwani no Bẹtẹl obọ fikinọ ọ gwọlọ wo aye, yọ enẹna avọ aye riẹ Diana, a gwọlọ kwa kpohọ orẹwho Guam re a jọ obei fiobọhọ evaọ iruo usi uwoma ota na. Ọmọzae mai Davey nọ ọ rrọ ikpe 19, ọ nwani mu iruo usi uwoma ota họ obọ evaọ orẹwho Dominican Republic.

Oghẹrẹ uzuazọ nọ emọ mai a salọ na o jẹ lẹliẹ eva were omai gaga. O jọ omai oma nọ eme nọ e rrọ obe 3 Jọn 4 na eye i bi rugba evaọ omamai na, onọ o ta nọ: “Oware ofa nọ o rẹ kẹ omẹ oghọghọ vi onana o rrọ họ: re me yo nọ emọ mẹ a gbẹ be nya evaọ uzẹme na.” Rekọ ma riẹ hẹ inọ oware jọ o te via nọ u ti nwene uzuazọ mai.

Oware Odada nọ O Via kẹ Omai

Evaọ edẹ 24 Ane, 2004, mẹ avọ aye mẹ gbe inievo ivẹ jọ avọ eyae rai ma kpohọ oria jọ nyae re emu. Oria na u thabọ te emaele 60, fikiere omoto mẹ ma dhẹ nya. Nọ ma re emu na no, ma tẹ dhẹ kpohọ oria ọfa nọ a sae jọ re enuawere. Nọ a ruọ otọ no, mẹ tẹ dhẹ omoto na kpohọ oria nọ a rẹ dhẹ imoto fihọ. Ohwo jọ o ti bi se ifonu mẹ. Nọ mẹ tọlọ ifonu na, mẹ tẹ ruẹ nọ oniọvo jọ o bi se omẹ na, yọ uvou riẹ u bi nuhu.

Ọ ta nọ: “Oware uyoma jọ o via. Davey o wo asidẹnte.”

Mẹ tẹ nọe nọ: “Kọ Davey ọ nwoma gaga?” Ozọ uyo nọ ọ te kẹ omẹ u je mu omẹ.

Evaọ oke ọsosuọ, ọ jẹ sae ta ẹme na no unu ze he. Kẹsena ọ tẹ vuẹ omẹ nọ Davey o whu no.

Nọ ma ta ẹme re no evaọ ifonu, mẹ tẹ lẹ se Jihova re ọ kẹ omẹ ẹgba. Kẹsena mẹ tẹ nyabru ahwo nọ a kiọkọ na, mẹ tẹ vuẹ ae nọ ma kpo keme oma ọ be riẹ omẹ ru hu. Mẹ gwọlọ vuẹ aye mẹ hẹ bẹsenọ ma re te uwou.

Iroro mẹ e gba ha evaọ auwa ọvo gbe iminiti ọgba nọ ma rọ dhẹ edhere na je zihe kpo na. Nọ ma rrọ edhere na, yọ aye mẹ ọ be rọ evawere gbiku kẹ ahwo nọ i kiọkọ kpahe Davey nọ ọ ta nọ ọ te nyaze te ruẹ omai kẹle. Taure aye mẹ ọ tẹ te riẹ nọ ọmọzae mai o whu no, yọ ahwo buobu a riẹ no. Yọ a je tube vi uwou fihọ ifonu mẹ rọ sa-sa omai oma.

Nọ ma wọ inievo nọ i kiọkọ na te obọ iwou rai no, ma te kpo. Nọ aye mẹ o rri omẹ, ọ tẹ nwane riẹ nọ oware jọ o be thọ. Ọ tẹ nọ omẹ nọ, “Eme ọ be via?” Mẹ riẹ nọ ẹme nọ me te vuẹe na ọ te wha ọkora ọgaga fihọ iẹe oma, nwane wọhọ epanọ o jọ kẹ omẹ nọ a rọ ifonu se omẹ evaọ euwa ivẹ nọ e vrẹ na.

Oghẹrẹ nọ Ma Sai ro Thihakọ

Evaọ oke nọ u kpemu, ebẹbẹ i te omẹ avọ aye mẹ no, yọ ma riẹ nọ Jihova ọ rẹ sa-sa ahwo riẹ oma. (Aizaya 41:10, 13) Rekọ oware nana nọ o via kẹ omai na, a sae gbiku epanọ o rẹ da te he. Oware nọ me je roro kpahe ẹsikpobi họ, ‘Fikieme oware utiona o rọ via kẹ Davey, nọ ọ be rọ uzuazọ riẹ kpobi ru iruo kẹ Jihova? Fikieme Jihova ọ gbẹ thọe he?’

Oware nọ o via na o kẹ emọ mai nọ i kiọkọ uye gaga re. Ọmọtẹ mai Lauren ọ jọ wọhọ oni kẹ Davey, fikiere uwhu riẹ na o da riẹ gaga. Ere ọvona o da Michael re. Dede nọ u te oware wọhọ ikpe isoi soso no nọ Michael ọ be rọ rria oboriẹ sa, ọ ruẹ nọ Davey o te ohwo no yọ ọ be daoma gaga.

Inievo ukoko na a fiobọhọ kẹ omai gaga. Wọhọ oriruo, nọ uweri ogaga o gbẹ jọ aye mẹ oma fiki uwhu ọmọ mai na, inievo ukoko na a jẹ hae nyaze obọ uwou mai te sasa omai oma je fiobọhọ kẹ omai. (Itẹ 17:17) Uyoyou nọ a dhesẹ kẹ omai o rẹ thọrọ omẹ ẹro ho!

Re ma sae thihakọ, mẹ avọ aye mẹ ma jẹ hae lẹ kugbe, se Ebaibol na, je kpohọ iwuhrẹ ukoko wọhọ epanọ ma jẹ hai ru vẹre. Ghele na, uwhu ọmọ mai na o gbẹ jẹ da omai. Rekọ ma riẹ nọ u wuzou gaga re ma ru eware nana keme i ti fiobọhọ kẹ omai kru ga ziezi evaọ egagọ Jihova.—Ahwo Filipai 3:16.

Evaọ oke yena, Michael avọ aye riẹ Diana a tẹ kwa kẹle omai, yọ Lauren ọ wariẹ zihe ziọ ukoko Oyibo nọ ma jọ na. Enẹ ma jọ kugbe imikpe jọ, yọ onana u fiobọhọ kẹ omai thihakọ. Uwhremu na nọ Lauren o wo ọzae no, ọye avọ ọzae riẹ Justin a fiobọhọ kẹ omai gaga re.

Onya nọ O jọ Bẹbẹ

Nọ Davey ọ nwani whu no, u wo oware ọfa jọ nọ ma ru nọ u fiobọhọ kẹ omai thihakọ. Ma nya onya jọ nọ o jọ bẹbẹ kẹ omai, rekọ ma wo erere noi ze. Jọ aye mẹ Kaye o gbiku na ze.

“Nọ ọzae mẹ ọ vuẹ omẹ nọ Davey o whu, uweri ogaga o tẹ da omẹ oma fia. O jọ wọhọ ẹsenọ me kie fihọ ọgọdọ odidi nọ ọ rrọ biebi. O da omẹ te epanọ mẹ gbẹ jẹ sai ru oware ovo ho. Ẹsikpobi mẹ jẹ hae viẹ. Uzẹme riẹ họ, ẹsejọ mẹ jẹ hai mu ofu kẹ Jihova gbe ohwo kpobi. O jọ wọhọ ẹsenọ oware jọ o be thọ kugbe omẹ.

“Mẹ jẹ gwọlọ nọ me re te oria nọ Davey ọ jẹ rria evaọ orẹwho Dominican Republic na. Mẹ gwọlọ nọ me re kpohọ oria nọ ọ jẹ jọ gọ Jihova taure o te ti whu. Rekọ ẹgba ọ jọ omẹ oma ha keme uweri o da omẹ oma fia. Me wo ẹgba nọ mẹ sai ro kpohọ erẹ ugbothabọ họ.

“Oniọvo jọ nọ ọ rrọ ogbẹnyusu ọkpekpe mẹ o fiobọhọ kẹ omẹ keme ọ vuẹ omẹ nọ egbẹnyusu Davey nọ e rrọ obọ Dominican Republic a bi weri Davey re, yọ a gwọlọ nọ a rẹ ruẹ ahwo uviuwou riẹ. Ẹme nọ ọ ta kẹ omẹ na ọ kẹ omẹ ẹgba nọ mẹ sae rọ ruọ arupre kpohọ obei.

“Erẹ nana nọ ma nya na o fiobọhọ kẹ ahwo uviuwou mai gaga. U ru nọ ma rọ riẹ nọ Davey o kru ga ziezi evaọ egagọ Jihova. Ọkpako ukoko ọvo nọ ọ rrọ ukoko nọ Davey ọ jọ na ọ ta nọ Davey yọ ohwo nọ a re fievahọ, keme o re ru oware kpobi nọ a ta kẹe nọ o ru.

“Nọ ma jẹ nya kpobọ uwou nọ Davey ọ jẹ rria, ahwo a nyabru omai ze, a tẹ vuẹ omai emamọ eware nọ Davey o ru kẹ ae. Mẹ riẹ nọ o re fiobọhọ kẹ amọfa vẹre, yọ eme nọ ahwo na a ta kpahe iẹe na i ru omẹ riẹ epanọ ọ jẹ ginẹ daoma te re ọ rọ aro kele oriruo Jesu.

“Ma tẹ jẹ ruẹ ọzae jọ nọ Davey ọ jẹ hai wuhrẹ Ebaibol na. Ọzae na ọ jẹ rria umuwou ọsese jọ, yọ ọ rẹ sae kpama no ehwa ha fikinọ oma o ga riẹ hẹ. Dede nọ ọzae na o yogbe gaga, inievo ukoko na a ta nọ Davey ọ jẹ hae rẹrotei jẹ rọ adhẹẹ kẹe gaga. Eme nana e lẹliẹ eva Davey were omẹ gaga!

“Erẹ nana họ erẹ nọ ọ mae bẹ kẹ omẹ nọ mẹ nya no. Rekọ u fiobọhọ kẹ ahwo uviuwou mai gbe amọfa nọ a bi weri uwhu Davey, yọ ma rọ uvẹ yena ta kpahe ẹruore ẹkparomatha nọ ma wo. Onana o lẹliẹ oma sasa omai nọ uweri na o gbẹ rọ da omai oma fia ha.”

Oriruo Davey Ọ Tuduhọ Omai Awọ

A kere iku uwhu Davey gbe iruo usi uwoma ota riẹ evaọ Dominican Republic fihọ Awake! Ọvo 8, 2005. Oke yena, ahwo uviuwou mai a riẹ epanọ iku na i ti fiobọhọ kẹ ahwo nọ a ti sei te he. Wọhọ oriruo, evaọ Asoi 2019, oniọvo-ọmọzae jọ nọ a re se Nick o se omai, ọ tẹ vuẹ omai nọ:

“Evaọ ubrobọ ekuhọ ukpe 2004, mẹ jọ ekọleji, rekọ me wo utee ọvuọvo evaọ egagọ Jihova ha. Eva e jẹ were omẹ hẹ. Mẹ tẹ lẹ se Jihova re o fiobọhọ kẹ omẹ, re mẹ sae rọ oke uzoge mẹ gọe ziezi. U kri hi, me te se iku Davey evaọ Awake! na. Mẹ tẹ nwane riẹ nọ Jihova ọ kẹ uyo olẹ mẹ na!

“Me te no ekọleji je mu iruo ọkobaro họ. Me te je fi utee họ kẹ omamẹ inọ me re wuhrẹ ẹvẹrẹ Spanish jẹ kwa kpobọ orẹwho ọfa nyae ta usi uwoma. Nọ oke o be nyaharo na, mẹ ginẹ kwa kpohọ orẹwho Nicaragua, yọ mẹ avọ aye mẹ ma kpohọ Isukulu Rọkẹ Etausiuwoma Uvie Na. Nọ ahwo a tẹ nọ omẹ oware nọ o kẹ omẹ ọwhọ nọ me ro mu iruo ọkobaro họ, iku Davey na me re gbe kẹ ae.”

Oware ofa jọ o tuduhọ omai awọ gaga nọ ma nyaku oniọvo ọmọtẹ jọ nọ a re se Abi. Ọye ọ jẹ rẹrote omai evaọ ehọtẹle nọ a fi omai họ nọ ma kpohọ Okokohọ Akpọ-Soso 2019 evaọ Buenos Aires, evaọ orẹwho Argentina. Emamọ uruemu riẹ gbe uyoyou nọ o dhesẹ kẹ omai u duobọte omai gaga. O lẹliẹ omẹ avọ aye mẹ kareghẹhọ ọmọzae mai Davey.

Nọ ma zihe kpobọ ehọtẹle nọ a fi omai họ na, ma te vi adrẹse nọ a sai ro rovie Awake! nọ a kere iku Davey fihọ na evaọ itanẹte se Abi. Nọ iminiti jọ e vrẹ no, o te vi uwou se omai. Ọ gwọlọ nọ o re lele omai ta ẹme, fikiere ma tẹ nyabru ei kpohọ oria nọ ahwo a rẹ sae jọ ta ẹme evaọ ehọtẹle na. Avọ irui-oviẹ nọ i bi su noi aro ze, Abi ọ tẹ vuẹ omai epanọ iku Davey na i ro fiobọhọ kẹe mu iruo ọkobaro họ evaọ Azie 2011, jẹ kwa kpohọ ẹkwotọ nọ ọ rrọ thethabọ nyae ta usi uwoma. Ọ ta nọ, “Oke kpobi nọ me te wo ẹbẹbẹ evaọ obonọ mẹ be jọ ta usi uwoma na, mẹ rẹ wariẹ se iku riẹ na.” Abi o tube wo Awake! na dede!

Iriruo itienana i ru omai riẹ nọ mai kpobi na uviuwou ọvo evaọ akpọ na soso. Okugbe nọ ọ rrọ udevie ahwo Jihova, a sae ruẹ e riẹ evaọ oria ofa ha!

Oware jọ nọ o tuduhọ omẹ avọ aye mẹ awọ gaga họ, iku Davey na i bi fiobọhọ kẹ ahwo buobu. Yọ ere ọvona o rrọ rọkẹ izoge kpobi nọ e be rọ ẹgba rai kpobi ru iruo kẹ Jihova. Ẹsejọhọ evaọ idhere nọ a riẹ hẹ, oriruo rai gbe ọwhọ nọ a wo kẹ iruo Jihova, u bi duobọte uzuazọ ahwo buobu, yọ onana o be wọ ahwo nana rọ ẹgba rai kpobi ru iruo Jihova.

“Evaọ Aro Riẹ Aikpobi A Rrọ Uzuazọ”

Evaọ obe Luk 20:37, Jesu ọ ta nọ Jihova o se omariẹ “Ọghẹnẹ Abraham gbe Ọghẹnẹ Aiziki gbe Ọghẹnẹ Jekọp.” Orọnikọ Jihova ọ ta nọ ọ jọ Ọghẹnẹ rai evaọ oke nọ a gbẹ jọ uzuazọ ọvo ho, rekọ ọ gbẹ rrọ Ọghẹnẹ rai nọ a maki whu no! Fikieme? Keme Jesu ọ ta evaọ owọ avọ 38 nọ: “Evaọ aro riẹ aikpobi a rrọ uzuazọ.”

Evaọ aro Jihova, idibo riẹ kpobi nọ i whu no a rrọ uzuazọ. Onana u dhesẹ nọ ọ te kpare aikpobi zihe ziọ uzuazọ! (Job 14:15; Jọn 5:28, 29) Mẹ riẹ nọ ere ọvona Jihova o bi rri Davey gbe idibo riẹ efa kpobi nọ i whu no re. Ọ te kpare ae zihe ziọ uzuazọ.

Dede nọ mẹ gwọlọ wariẹ ruẹ Davey, oware nọ o te mae were omẹ gaga họ, nọ aye mẹ o ti dede ei rehọ nọ ọ tẹ kparoma ze no. Oghẹrẹ nọ uwhu Davey na ọ be da aye mẹ te, mẹ re ruẹ ohwo nọ oware o da te ere ẹdẹvo ho. Me bi rẹro oke nọ eme nọ e rrọ obe Luk 7:15 na i ti ro rugba kẹ omai: “Ọmọzae nọ o whu no na ọ tẹ kpama keria je mu ẹme họ ẹta, Jesu ọ tẹ rehọ iẹe kẹ oni riẹ.”

Evaọ Azie 2005, me te kuomagbe aye mẹ mu iruo ọkobaro họ. Eva e were omẹ gaga inọ mẹ avọ aye mẹ, Michael avọ aye riẹ, gbe Lauren avọ ọzae riẹ, ma rrọ iruo ọkobaro na. Ma be riẹ yerikugbe ziezi evaọ uviuwou mai, yọ ma bi fiobọhọ kẹ ohwohwo jẹ tuduhọ ohwohwo awọ re ma tẹrovi akpọ ọkpokpọ nọ ọ be tha na. Ma bi rẹro oke nọ ma te wariẹ jọ kugbe Davey.