Mẹ Gba Riẹ Mu nọ Me re Yoẹme kẹ Jihova

Ọsẹ gbe oni ologbo mẹ a wuhrẹ kpahe eyaa Ọghẹnẹ gbe Uvie riẹ evaọ ukpe 1906, nọ ẹyao jọ nọ a re se diphtheria o kpe ọmọzae rai obọ. Edọktọ rai ọ jọ Ọmọ-Uwuhrẹ Ebaibol, keme ere a jẹ hai se Isẹri Jihova evaọ oke yena. Edọktọ na ọ ta usi uwoma kẹ ae kpahe eware nọ Ọghẹnẹ ọ ya eyaa nọ o ti ru evaọ obaro gbe ẹruore ẹkparomatha na. Fikiere ọsẹ gbe oni ologbo mẹ, oni mẹ gbe oniọvo oni mẹ, a te zihe ruọ Emọ-Uwuhrẹ Ebaibol.

Evaọ ikpe buobu, imoni mai nana a kru ga ziezi evaọ egagọ Jihova. Makọ evaọ oke nọ a ro dhesẹ ividio nọ a re se “Photo-Drama of Creation” na evaọ Chicago, evaọ ubrotọ Illinois evaọ United States, imoni mai nọ e rrọ eyae a jọ usu ahwo nọ a je dhesẹ ekpala kẹ ahwo nọ a rẹ keria. Rekọ o da omẹ gaga inọ oni mẹ ọvo họ ohwo nọ ọ ruabọhọ jẹ gọ Jihova. Onana o kẹ oni mẹ uye gaga keme aikpobi na a kpekpe wumuo ho, yọ a jẹ gọ Jihova ri bọo etoke ikpe 1930. Oriruo oni mẹ o fiobọhọ kẹ omẹ gaga keme ọ talamu Jihova, yọ epọvo na oriruo ọsẹ mẹ o fiobọhọ kẹ omẹ re. Ọ gọ Jihova bọo ẹdẹ uwhu riẹ.

A yẹ omẹ evaọ ukpe 1927, yọ mẹ họ ọmọ ọsosuọ evaọ usu emọ ezeza nọ ọsẹgboni mẹ a yẹ. Mai kpobi na ma kru ga ziezi evaọ egagọ Jihova. Iruo ekapenta ọsẹ mẹ o je ru, yọ ma jẹ rria kẹle okpẹwho Chicago. Ma wo udhu nọ ma rẹ kọ eware fihọ, yọ ma re thuru ehọ gbe edọgumọ.

Iruo e rẹ were omẹ. Oware jọ nọ mẹ jẹ hai ru họ, mẹ rẹ rọ ẹguede ko esọso ahwo uviuwou mẹ nọ e bẹre no. Evaọ oke yena ahwo a re ku esọso nọ i wo ighogho no kufiẹ hẹ. A rẹ rọ ẹguede ko ae. Rekọ enẹna, ahwo a gbẹ be rọ ẹguede ko eware tere he. Eware iko nọ me wuhrẹ na, u fiobọhọ kẹ omẹ keme me ko eware gaga nọ me te ohwo no.

Ọsẹgboni Mẹ A Fi Emamọ Oriruo Hotọ kẹ Omẹ

Ọsẹ mẹ ọ daoma ruẹ nọ ahwo uviuwou mai a kru ga evaọ egagọ Jihova. Fikiere ewuhrẹ o re vo omai hi, ma re kpohọ usi uwoma ẹsikpobi je se isase okpẹdẹ na kẹdẹ kẹdẹ. Evaọ owọwọ Ẹdẹ-Ọmaha kpobi, ma rẹ rọ Uwou-Eroro Na ru ewuhrẹ uviuwou mai.

Re ma sae ta usi uwoma kẹ ahwo nọ a be rria kẹle omai, ọsẹ mẹ o te fi esaebọdo nọ ikpẹ i re lo evaọ eva riẹ fihọ unwido uwou mai. Inievo ukoko na họ ahwo nọ a ru rie kẹe, yọ ọ rẹ jariẹ dhesẹ uzoẹme ovuẹ ogbotu hayo obe ukoko na jọ. Ikpẹ nọ e rrọ esaebọdo na i re lo je fu, re ahwo nọ a be nyavrẹ a riẹ nọ a bi dhesẹ oware jọ evaọ etẹe. Ọsẹ mẹ o te je fi esaebọdo ivẹ họ omoto mai.

Ọsẹ mẹ ọ rọ ẹme gbe uruemu riẹ wuhrẹ omai emọ riẹ epanọ u wuzou te re ma yoẹme kẹ Jihova. Yọ oni mẹ ọ jẹ hai fiobọhọ kẹe gaga. Nọ oniọvo-ọmọtẹ mẹ nọ ọ mae maha o te ikpe isoi no, oni mẹ o te mu iruo ọkobaro oke-kpobi họ, yọ o ru iruo ọkobaro na bọo ẹdẹ uwhu riẹ. Ọsẹgboni mẹ a daoma kẹ omai ziezi.

Oghẹrẹ nọ eware e rrọ enẹna ere e jọ evaọ oke yena ha. Ma wo etẹlẹvisiọno ho, fikiere mẹ avọ inievo mẹ ma rẹ keria otọ re ma gaviezọ kẹ iredio nọ a tẹ be ta kpahe eware nọ e were omai. U te no ere no, ahwo uviuwou mai a rẹ gaviezọ kẹ evuẹ Ebaibol nọ ukoko na o rẹ kẹ evaọ iredio.

Ikokohọ Ilogbo, Egramafonu, gbe Ebe Ilogbo nọ A Kere Eme Fihọ

O rẹ were omai re ma kpohọ ikokohọ Isẹri Jihova. Evaọ okokohọ ologbo jọ nọ a ru evaọ ukpe 1935, ma wuhrẹ nọ “ogbotu obuobu” nọ a fodẹ evaọ obe Eviavia 7:9, 14 na, nọ a te zọ evaọ oke “uye ulogbo na,” a te rria otọakpọ na bẹdẹ bẹdẹ evaọ aparadase. Taure ukpe 1935 u te ti te, ọsẹgboni mẹ a jẹ hae re ebrẹdi jẹ da udi Emu Owọwọ na. Rekọ nọ okokohọ na ọ vrẹ no, ọsẹ mẹ ọvo ọ tẹ jẹ re ebrẹdi jẹ da udi na. Oke yena oni mẹ ọ rọ riẹ nọ ọ te rria otọakpọ na bẹdẹ bẹdẹ, ọ rrọ usu ahwo nọ a ti kpobọ odhiwu hu.

Evaọ okokohọ ologbo jọ nọ a ru evaọ 1941, evaọ St. Louis, evaọ Missouri, Brọda Joseph Rutherford nọ ọ jẹ kobaro evaọ iruo na o te siobọno obe jọ nọ a re se Children. Ahwo a tehe abọ gaga! Ikpe 14 mẹ jọ oke yena, yọ mẹ họ-ame evaọ ukpe nọ o vrẹ na. Mẹ kareghẹhọ nọ mẹ avọ emaha efa ma dhe uhie họ kpobọ eplatfọmo re a ghale obe na kẹ omai.

Oke yena, oghẹrẹ nọ ma jẹ hae rọ ta usi uwoma u wo ohẹriẹ no oghẹrẹ nọ ma be rọ ta usi uwoma enẹna. Evaọ etoke ikpe 1930 na, ma jẹ hae rọ egramafonu kporo ovuẹ Ebaibol nọ a rekọdo no kẹ ahwo evaọ usi uwoma. Taure ma te ti kporo ẹthẹ ohwo, ma rẹ thahe egramafonu na kpahe jẹ ruẹrẹ ẹe họ evaọ oghẹrẹ nọ ọ sai ro kporo. Nọ ohwo nọ o wo uwou na o te rovie ẹthẹ, ma vẹ ta ẹmẹme kpẹkpẹe, ma ve kporo ovuẹ Ebaibol nọ o theri te iminiti ene gbe ubro, kẹsena ma vẹ kẹe obe. Ahwo nọ a jẹ rria kẹle omai a jẹ gaviezọ ziezi. Ohwo ọvo ọ kpahe ẹme ọgaga kẹ omai hi. Nọ me te ikpe 16 no, me te mu iruo ọkobaro họ. Ọsẹ mẹ ọ tẹ kẹ omẹ egramafonu obọmẹ nọ mẹ jẹ hae wha kpohọ usi uwoma. Mẹ avọ oniọvo-ọmọtẹ jọ nọ a re se Lorraine ma jẹ hae kpohọ usi uwoma kugbe.

Edhere ọfa jọ nọ ma jẹ hae rọ ta usi uwoma họ, mai kpobi ma re dhe uhie họ evaọ edhere re ma ta usi uwoma kẹ ohwo kpobi nọ ma ruẹ. Ma re kere eme fihọ ebe ekẹkẹe ivẹ, ma ve thuru ufi fihọ ae nọ ma rẹ jẹ họ uriohọ, ọjọ ọ rẹ jọ obaro ọfa ọ vẹ jọ obemu. Ma re kere eme fihọ ae wọhọ, “Egagọ yọ Agbefẹ gbe Iwhayo” gbe “Ruiruo kẹ Ọghẹnẹ gbe Kristi Ovie na.”

Eware nọ ma jẹ hai wuhrẹ evaọ ewuhrẹ i fiobọhọ kẹ omai ruẹrẹ oma kpahe kẹ ọwọsuọ gbe oware nọ ma rẹ ta nọ a tẹ nọ omai unu. Yọ a ginẹ wọso omai. Wọhọ oriruo, evaọ oke ọsosuọ nọ ma ro mu ahwo emagazini họ ẹkẹ evaọ oria nọ a rẹ jọ zẹ eware nọ o re zurie gaga, ipolisi a mu omai a tẹ rọ omoto wọ omai kpobọ ogba rai. A siobọno omai nọ euwa buobu e vrẹ no, rekọ eva were omai inọ ukpokpoma nana u te omai fikinọ ma yoẹme kẹ Jihova.

Mẹ Rọo, Ma Kpohọ Isukulu Giliad, A te je Se Ọzae Mẹ kẹ Iruo Isoja

Nọ oke jọ o vrẹ no, Lorraine o te dhesẹ omẹ kẹ oniọvo-ọmọzae jọ nọ a re se Eugene Rosam. Avọ oniọvo na a riẹ ohwohwo evaọ okokohọ jọ nọ a ru evaọ Minneapolis, obọ Minnesota. Eugene ọ whẹro evaọ Key West, evaọ Florida. Oke nọ ọ jọ ekọleji, a le rie no isukulu fikinọ ọ rọwo so ile orẹwho hayo yere obiala ha. Ọ tẹ nwani mu ọkobaro họ. Ẹdẹ jọ ọ tẹ nyaku ọmọtẹ jọ nọ a gbẹ jọ eklase. Fikinọ Eugene ọ riẹ obe gaga, ọmọtẹ na ọ tẹ nọe oware nọ a ro lei no isukulu. Eugene ọ rọ Ebaibol kiyo enọ riẹ kpobi, fikiere ọmọtẹ na ọ tẹ rọwo nọ o re wuhrẹ Ebaibol na. Eware nọ o wuhrẹ i duobọtei gaga fikiere o te kurẹriẹ.

Mẹ avọ Eugene ma rọo evaọ ukpe 1948. Ma tẹ nwani mu iruo ọkobaro họ evaọ Key West. Evaọ obọ emuhọ 1952, a te zizie omai kpohọ Isukulu Giliad, eklase avọ 18. A je wuhrẹ omai ẹvẹrẹ Spanish evaọ eklase na, fikiere ma roro nọ a ti vi omai kpohọ ẹwho nọ a be jọ ta ẹvẹrẹ Spanish. Rekọ o via ere he. Nọ ma jọ Isukulu Giliad na yọ a bi fi Ẹmo Korea na, a te se ọzae mẹ kẹ iruo isoja. Oware nana u gbe omai unu gaga keme evaọ etoke Ẹmo Akpọ Avivẹ, a kẹ riẹ obe nọ ọ sae rọ siọ iruo isoja ba fikinọ ọ be ta usi uwoma. Fiki use nana nọ a se ọzae mẹ na, a tẹ vuẹ omai nọ ma daji United States. Onana o lẹliẹ omẹ viẹ gaga. Rekọ nọ ikpe ivẹ e vrẹ no, a tẹ kẹ ọzae mẹ obe nọ ọ sae rọ siọ iruo isoja ba. Oware nana nọ o via na o wuhrẹ omai obọdẹ oware jọ inọ edhere jọ o gbe rovie he, Jihova ọ rẹ gbẹ edhere ọfa, yọ ere o ru kẹ omai. O gwọlọ nọ ma re wo odiri.

Ma Jọ Iruo Ọsẹro Okogho, Kẹsena Ma te Kpobọ Canada!

Nọ ma ru iruo ọkobaro evaọ ukoko ẹvẹrẹ Spanish evaọ Tucson nọ ọ rrọ Arizona te oke jọ no, a te zizie omai kpohọ iruo ọsẹro okogho evaọ 1953. Nọ oke o be nyaharo na, ma ru iruo ọsẹro okogho na evaọ ubrotọ Ohio, California, gbe New York City. Evaọ 1958, ma te mu iruo ọsẹro ubrotọa họ evaọ California gbe Oregon. Iwou inievo na ma jẹ hae rria. Kẹsena evaọ 1960, ma te kpobọ Canada, yọ ọzae mẹ ọ jọ owuhrẹ evaọ Isukulu Odibọgba Uvie na rọkẹ ekpako ukoko. Ma jọ Canada bọo ukpe 1988.

Oware jọ nọ o via nọ o rẹ thọrọ omẹ ẹro ho nọ ma jọ Canada na họ, iku ahwo uviuwou jọ nọ mẹ avọ oniọvo-ọmọtẹ jọ ma ta usi uwoma kẹ. Oni uwou na nọ a re se Gail ma kake nyaku, ọ tẹ vuẹ omai nọ eva e be were emezae ivẹ riẹ hẹ keme ọsẹ ologbo rai o whu. A jẹ nọe nọ, “Fikieme o ro whu? Kọ diẹse o kpohọ?” Oni rai ọ sae ruẹ uyo ovo kẹ ae he. Fikiere ma tẹ rọ Ebaibol kuyo enọ na, je se eria Ebaibol nọ e rẹ sasa iẹe oma kẹe.

Evaọ oke yena, ọzae mẹ ọ jọ ọsẹro okogho nọ o je rri ukoko yena, fikiere oka ọvo ma jọ etẹe. Rekọ oniọvo-ọmọtẹ nọ ma gbe kpohọ usi uwoma ẹdẹ yena ọ wariẹ zihe bru Gail. Emamọ iyẹrẹ i no rie ze. Gail o kurẹriẹ, yọ ọzae riẹ Bill gbe emezae esa rai, Christopher, Steve, gbe Patrick a kurẹriẹ re. Christopher ọ rrọ ọkpako ukoko evaọ Canada. Steve ọ rrọ owuhrẹ evaọ isukulu ukoko na jọ evaọ Palm Coast, evaọ Florida. Yọ Patrick ọ rrọ omọvo Ogbẹgwae Uwou Ogha Thailand. Anwọ ikpe buobu ze na, mẹ avọ ọzae mẹ gbe ahwo uviuwou yena ma kpekpe gaga. Eva e were mẹ gaga nọ mẹ rrọ usu ahwo nọ a fiobọhọ kẹ ae kurẹriẹ ze te gọ Jihova!

Ogbẹgwae Ẹmeọta-Kugbe Ahwo Iwou-Imu

Nọ ma jọ Canada na, Jihova o rovie emamọ uvẹ iruo ologbo ọfa fihọ kẹ ọzae mẹ. Me gbiku na ze.

Evaọ ikpe buobu nọ i kpemu, ahwo a riẹ oware nọ ma gbẹ rọwo nọ a se azẹ fihọ omai oma ha ha, fikiere a rọwo ikpehre eware buobu nọ a ta kpahe omai. A jẹ jọ ebe-usi evaọ Canada kere ikpehre eware kpahe Isẹri Jihova inọ emọ rai a bi whu keme esẹgbini rai a rọwo nọ a se azẹ fihọ emọ rai oma ha. Ọzae mẹ ọ jọ usu ahwo nọ a je fiobọhọ kẹ ahwo riẹ nọ iku nana e rrọ uzẹme he.

Evaọ ukpe 1969, a ru okokohọ akpọ soso evaọ Buffalo, evaọ New York. Taure a te ti ru okokohọ na, ọzae mẹ avọ inievo-emezae efa a nya kpohọ ispito ilogbo nọ e rrọ oria na, re a vuẹ ae nọ Isẹri Jihova nọ i bu te enwenọ idu udhuvẹ gbikpe (50,000), a ti no Canada avọ United States ziọ okokohọ na. A nyabru ae re edọktọ nọ e rrọ ispito nana a riẹ oware nọ ma gbe ro se azẹ fihọ oma ha, gbe epanọ a sai ro siwi inievo mai ababọ azẹ otẹrọnọ oware jọ o via evaọ etoke okokohọ na. Inievo na a kẹ edọktọ na ebe nọ a kere kpahe usiwo nọ a re ru ababọ azẹ, enọ edọktọ a riẹ ziezi. Edọktọ na a gaviezọ kẹ ae, o tẹ whae ze nọ ọzae mẹ avọ inievo nọ i kiọkọ na a jẹ rọ nya kpohọ ispito nọ e rrọ Canada re a ru epọvo na re. A te je fiobọhọ kẹ ekpako ikoko nọ e rrọ Canada re a riẹ oware nọ a re ru nọ oware jọ o tẹ via idudhe nọ a rẹ rọ fiki riẹ wọ ohwo kpohọ ọspito.

Ẹmẹrera na, emamọ iyẹrẹ i te je noi ze. Enẹ nọ a je ru na, o wha riẹ ze nọ ukoko na u ro ru oware jọ nọ ma roro ho. Jomẹ ta oware riẹ ze.

Ukpe jọ evaọ etoke ikpe 1980 rite 1990 na, brọda Milton Henschel nọ ọ jọ oria nọ u wuzou iruo Isẹri Jihova evaọ Brooklyn, evaọ New York, ọ tẹ rọ ifonu se ọzae mẹ. Ọ vuẹ ọzae mẹ nọ a be hae jọ United States lele edọktọ buobu ta ẹme kpahe epanọ a sai ro siwi Isẹri Jihova ababọ azẹ, yọ Utu Ẹruorote na o gwọlọ nọ a re ru ei evaọ erẹwho efa re. Fikiere mẹ avọ ọzae mẹ ma tẹ kwa kpohọ Brooklyn. Evaọ amara Ọvo 1988, Utu Ẹruorote na o tẹ to ẹko-iruo jọ họ nọ a re se Ẹko-Iruo Evuẹ Kpahe Usiwo Imu. Uwhremu na, a tẹ rọ ọzae mẹ avọ inievo-emezae ivẹ efa ro mu re a hai wuhrẹ ahwo kpahe epanọ a sai ro siwi Isẹri Jihova ababọ azẹ. A kaki mu ei họ evaọ United States, kẹsena a te kpohọ erẹwho efa. U kri hi, a tẹ to Ẹko-Iruo Evuẹ Kpahe Usiwo Imu họ evaọ iwou egha kpobi, gbe Ogbẹgwae Ẹmeọta-Kugbe Ahwo Iwou-Imu evaọ ikpewho buobu. Jihova ọ rehọ ẹko-iruo nana ghale ukoko na keme Isẹri Jihova buobu avọ emọ rai a wo erere no iruo rai ze no. Okenọ ọzae mẹ o te bi wuhrẹ ahwo kpahe epanọ a sai ro siwi Isẹri Jihova ababọ azẹ je weze kpohọ ispito, me re ru iruo evaọ Ebẹtẹle nọ ọ rrọ orẹwho na. Yọ ẹsibuobu me re ru iruo evaọ ikichini hayo oria nọ a re jo ko eware.

Oware nọ O Da Omẹ Gaga

Evaọ 2006, ọzae oyoyou mẹ na o te whu, yọ o da omẹ gaga. Me gbe wo ohwo nọ ọ rẹ jọ kugbe omẹ hẹ. Rekọ eme o fiobọhọ kẹ omẹ? Me ru eware jọ nọ i fiobọhọ kẹ omẹ thihakọ ẹbẹbẹ nana. Wọhọ oriruo, mẹ rẹ lẹ se Jihova je se Ebaibol na ẹsikpobi. Mẹ rẹ gaviezọ kẹ egagọ uviuwou nọ a re ru kẹdẹ kẹdẹ evaọ Ebẹtẹle. Me re se uzou Ebaibol nọ a rọ uzoẹme isase okpẹdẹ na no ze. Yọ mẹ rẹ daoma ru iruo mẹ evaọ Ebẹtẹle evaọ oria nọ a rẹ jọ ko eware. Mẹ rẹ rọ iruo na zaharo ho. Evaọ ikpe jọ nọ e vrẹ, me wo uvẹ nọ me ro fiobọhọ ko ekọtini nọ a rọ whẹ erru họ eplatfọmo evaọ Egwa Okokohọ nọ e rrọ New Jersey gbe New York. Enẹna me bi ru iruo evaọ Ebẹtẹle Fishkill, me re ko eware je ru emeware esese efa.b

Oware nọ me rri nọ o mai wuzou evaọ uzuazọ họ, re ohwo o you Jihova je yoẹme kẹe avọ ukoko riẹ. (Ahwo Hibru 13:17; 1 Jọn 5:3) Eva e were omẹ nọ mẹ avọ ọzae mẹ ma rọ egagọ Jihova karo evaọ uzuazọ. Fikiere me fievahọ Jihova nọ ọ te kẹ omai uzuazọ ebẹdẹ bẹdẹ evaọ aparadase, yọ mẹ te wariẹ ruẹ ọzae mẹ.—Jọn 5:28, 29.