4 Wha Hae Rọvrẹ Ohwohwo

OWARE NỌ U DHESẸ

Re a rọvrẹ ohwohwo u dhesẹ nọ ohwo nọ a ruthọ na ọ rẹ kpairoro vrẹ oware nọ a ru rie na riẹriẹriẹ. Orọnikọ onana u dhesẹ hẹ inọ ohwo na o re rri oware nọ a ru rie na kakao, hayo ru wọhọ ẹsenọ a ru rie oware ovo ho.

EHRI-UZI EBAIBOL: “Wha gbẹ hai thihakọ kẹ ohwohwo jẹ rọvrẹ ohwohwo riẹriẹriẹ nọ ohwo jọ ọ tẹ maki wo oware jọ nọ u re ru ei go kpahe omọfa.”​—Ahwo Kọlọsi 3:13.

“Who te gine you ohwo, whọ rẹ tẹrovi eware nọ ohwo na o ru owhẹ thọ họ. Ukpoye, whọ rẹ kpairoro vrẹ eware nọ ọ be riẹ ru hu, whọ vẹ tẹrovi eware nọ ọ be riẹ ru.”​—Aaron.

OWARE NỌ U RO WUZOU

Who te fi ẹgo họ eva, u re ru nọ eva e gbẹ rọ were owhẹ hẹ. Yọ o rẹ sae wha ebẹbẹ fihọ orọo ra dede.

“U wo oke jọ nọ ọzae mẹ o ru omẹ oware jọ nọ o kẹ omẹ uye gaga. Nọ o wounu kẹ omẹ, mẹ ta nọ mẹ rẹ rọvrẹ riẹ vievie he. Mẹ tẹ rọvrẹ riẹ uwhremu na, rekọ o da omẹ gaga inọ mẹ kake rọvrẹ riẹ hẹ. Keme u ru nọ ma gbẹ jẹ rọ wereva kugbe ohwohwo ho.”​—Julia.

OWARE NỌ WHỌ RẸ SAI RU

KIẸ OMARA RIWI

Nọ ọzae hayo aye ra o te ru oware jọ nọ o dha owhẹ eva, nọ omara nọ:

• ‘Kọ mẹ yọ ohwo nọ eva i re kri ẹdha ha?’

• ‘Kọ oware nọ ọzae hayo aye mẹ o ru na u gine te oware nọ ọ rẹ rọ fiki riẹ wounu kẹ omẹ taure mẹ tẹ te rọvrẹ riẹ, manikọ mẹ rẹ sae kpairoro vrẹ ọvo?’

REHỌ ENỌ NANA LELE IEI TA ẸME

• Kọ nọ ma te ru ohwohwo thọ, o be hai kri gaga re ma tẹ te rọvrẹ ohwohwo?

• Eme ma rẹ sai ru re ma hae rọvrẹ ohwohwo ababọ oke oraha?

EWARE JỌ NỌ I RE FIOBỌHỌ

• Nọ ọzae hayo aye ra o te ru owhẹ oware jọ thọ, who du roro nọ o keke aro fihọ ru ei re o da owhẹ hẹ.

• Hai rri rie nọ oware na o thọe obọ, kareghẹhọ nọ “mai kpobi ma re zoruẹ unuẹse buobu.”​—Jemis 3:2.

“O rẹ raha oke he re ọzae-avọ-aye a tẹ kpairoro otẹrọnọ aimava na a ru ohwohwo thọ. Rekọ otẹrọnọ omọvo jọ o ruthọ, ohwo nọ o kiọkọ ọ rẹ gwọlọ rọvrẹ hẹ. Ohwo o gbe gine wo omaurokpotọ họ, ọ rẹ gwọlọ kake rọvrẹ hẹ nọ a tẹ maki wounu kẹe.”​—Kimberly.

EHRI-UZI EBAIBOL: “Ruẹrẹhọ vẹrẹ vẹrẹ kugbe ohwo.”​—Matiu 5:25.