9 Oghẹrẹ Ohwo nọ Whọ Rrọ

OWARE NỌ U DHESẸ

Orọnikọ odẹ ra gbe epanọ oma ra o rrọ a rẹ rọ riẹ oghẹrẹ ohwo nọ whọ rrọ họ. Uruemu ra, eware nọ whọ rọwo gbe eware nọ whọ be hai ru eye a rẹ rọ riẹ oghẹrẹ ohwo nọ whọ rrọ. Otọ ẹme na họ, eware nọ who bi roro evaọ obeva gbe enọ who bi ru nọ ahwo a be ruẹ eye i re dhesẹ oghẹrẹ ohwo nọ whọ rrọ.

OWARE NỌ U RO WUZOU

Whọ tẹ be hai roro kpahe oghẹrẹ ohwo nọ whọ rrọ, u re ru nọ whọ rẹ rọ gbaudu ru oware nọ whọ riẹ nọ u woma viukpenọ whọ rẹ kuvẹ re ehwa ra e ta họ owhẹ obọ.

“Ahwo buobu a wọhọ edọbebi nọ ahwo nọ a rẹ zẹ iwu a re ku iwu họ ro dhe. Ae ọvo a rẹ salọ iwu nọ a re kuhọ họ, amọfa a rẹ salọ kẹ ae.”​—Adrian.

“Me wuhrẹ epanọ mẹ sae rọ gbaudu ru oware nọ u fo no, o tẹ make rrọ bẹbẹ. Ahwo nọ a rẹ gwọlọ gba omẹ họ ru oware uyoma ha fikinọ a riẹ oware nọ mẹ rọwo, ae họ ahwo nọ mẹ rẹ sai lele nyusu.”​—Courtney.

EHRI-UZI EBAIBOL: “Wha gbẹ kuvẹ re uyero-akpọ nana o kpọ owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene.”​—Ahwo Rom 12:2.

OWARE NỌ WHỌ RẸ SAI RU

Daoma riẹ oria nọ whọ be jọ riẹ ru ziezi, oria nọ whọ be jọ riẹ ru tere he, gbe eware nọ whọ rọwo, re whọ rọ ere riẹ oghẹrẹ ohwo nọ whọ rrọ enẹna, gbe oghẹrẹ ohwo nọ u fo nọ whọ rẹ jọ. Whọ sae rehọ enọ nọ e rrọ obotọ na kiẹ omara riwi.

Eware nọ mẹ be riẹ ru: Onaa sa-sa vẹ me wo? Kọ eware jọ vẹ mẹ rẹ ginẹ riẹ ru gaga? (Wọhọ oriruo: Kọ mẹ yọ ohwo nọ o re leti hi? Mẹ be hae sae su omamẹ? Kọ mẹ ga obọ iruo? Kọ me re ru ọghọ?) Eware iwoma vẹ mẹ be hai ru?

OWARE JỌ NỌ U RE FIOBỌHỌ: Kọ o be hae jọ bẹbẹ kẹ owhẹ re who roro ku eware iwoma jọ nọ who ru no? O tẹ rrọ ere, whọ sae nọ ọsẹ hayo oni ra hayo ogbẹnyusu ra nọ who fievahọ re a vuẹ owhẹ eware jọ nọ whọ be ginẹ riẹ ru ziezi.

EHRI-UZI EBAIBOL: “Jọ omomọvo ọ kiẹ iruẹru obọriẹ riwi, kẹsena o ve ti wo oghọghọ no iruẹru obọriẹ ọvo ze, orọnikọ ọ rẹ rehọ omariẹ wawo omọfa ha.”​—Ahwo Galesha 6:4.

Eware nọ mẹ be riẹ ru tere he: Uruemu vẹ me wo nọ o mae gwọlọ nọ me re siobọno? Oke vẹ oma o rẹ mae wọ omẹ re me ru oware nọ u fo ho? Eware jọ vẹ o jọ gwọlọ nọ mẹ rẹ nyẹ oma?

EHRI-UZI EBAIBOL: “Ma tẹ be ta nọ, ‘Ma rẹ raha uzi hi,’ kiyọ ma be viẹ omobọ mai họ.”​—1 Jọn 1:8.

Eware nọ mẹ rọwo: Izi vẹ mẹ be hai koko evaọ uzuazọ mẹ, kọ fikieme? Kọ mẹ rọwo Ọghẹnẹ? Fikieme u ro mu omẹ ẹro nọ Ọghẹnẹ ọ ginẹ rrọ? Eware jọ vẹ mẹ ginẹ riẹ nọ u fo nọ a re ru hu, kọ fikieme me ro rri rai ere? Eme mẹ ginẹ rọwo nọ ọ te via evaọ obaro?

EHRI-UZI EBAIBOL: “Erorote ọ te sẹro ra, yọ orimuo ọ te thọ owhẹ.”​—Itẹ 2:11.