Ẹyọrọ Oka Evuhu Oleleikristi Mai

“ ’Whai họ isẹri me,’ ere ỌNOWO na ọ tae.”—AIZAYA 43:10.

1. Oghẹrẹ ahwo vẹ Jihova re si kẹle oma?

NỌ WHỌ tẹ rrọ evaọ Ọgwa Uvie, roma totọ rri wariẹ. Amono whọ rẹ jọ etẹe ruẹ? Ẹsejọhọ whọ te ruẹ izoge ajọwha nọ e be roma totọ kezọ re a wuhrẹ areghẹ no Ikereakere na ze. (Olezi 148:12, 13) Ẹsejọhọ, whọ te jẹ ruẹ enọ i wuzou iviuwou nọ e be daoma ru eva were Ọghẹnẹ dedenọ a be rria akpọ nọ o wo osegboja kẹ uzuazọ uviuwou hu. Ẹsejọhọ whọ te ruẹ inievo eghaghae nọ e kpako no, nọ e dadamu be rria te omaromudhe rai kẹ Jihova ghelọ ebẹbẹ owho. (Itẹ 16:31) Aikpobi a you Jihova gaga. Yọ o dede i rai rehọ re a mu usu kugbei. Ọmọ Ọghẹnẹ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.”—Jọn 6:37, 44, 65.

2, 3. Fikieme o sae rọ jọ use-abọ re ohwo yọrọ oka evuhu Oleleikristi riẹ ziezi?

² Kọ o gbẹ rrọ evawere kẹ omai nọ ma rọ rrọ usu ahwo nọ a wo ọjẹrehọ gbe eghale Jihova? Ghele na, o rrọ use-abọ re ma yọrọ oka evuhu mai ziezi wọhọ Ileleikristi evaọ “oke ẹbẹbẹ” nana. (2 Timoti 3:1) Onana o mae rrọ use-abọ kẹ izoge nọ esẹgbini rai e rrọ ukoko na. Uzoge otiọye na jọ ọ ta nọ: “Dede nọ mẹ jẹ hai kpohọ iwuhrẹ Ileleikristi na, me wo uvumọ igogo itee abọ-ẹzi hi, yọ evaọ uzẹme, me wo uvi isiuru kẹ egagọ Jihova ha.”

³ Otunyẹ ọhwa nọ a be rẹriẹ ovao dhe ẹsikpobi, ọwhẹruọ akpọ na, gbe urusio uzioraha e rẹ sai kpokpo iroro otujọ dede nọ a wo uvi isiuru nọ a gwọlọ rọ gọ Jihova. Nọ ma tẹ be hae rẹriẹ ovao dhe otunyẹ ẹsikpobi, o rẹ sae lẹliẹ omai rehọ ẹmẹrera ku oka evuhu Oleleikristi mai fiẹ. Wọhọ oriruo, ahwo buobu evaọ akpọ na nẹnẹ a rri itee Ebaibol na wọhọ oware nọ u kiekpo no hayo oware nọ a rẹ sae nya lele evaọ oke mai na ha. (1 Pita 4:4) Ahwo jọ a re roro nọ o roja ha re a gọ Ọghẹnẹ evaọ edhere nọ ọ gwọlọ. (Jọn 4:24) Evaọ ileta riẹ rose ahwo Ẹfẹsọs, Pọl ta kpahe akpọ na inọ o wo “ẹzi” hayo uruemu jọ nọ o be kpọ ahwo. (Ahwo Ẹfẹsọs 2:2) Ẹzi ọyena ọ be wọ ahwo ru lele iroro akpọ nọ ọ riẹ Jihova ha.

4. Ẹvẹ Jesu ro fi ẹgba họ epanọ u ro fo re ma sẹro oka evuhu mai wọhọ Ileleikristi ziezi?

⁴ Dede na, wọhọ idibo Jihova nọ e roma mudhe no, ma riẹ nọ o rẹ jọ oware enwoma gaga re mai ọjọ—te ọmaha te ọkpako—o ku oka evuhu Oleleikristi riẹ fiẹ. Itee Jihova gbe eware nọ o rẹro riẹ mi omai ọvo ma sae rọ riẹ oghẹrẹ ohwo nọ ma rrọ wọhọ Ileleikristi. Ere u fo nọ o rẹ jọ keme uwoho riẹ a rọ ma omai. (Emuhọ 1:26; Maeka 6:8) Ebaibol na rehọ oka evuhu mai wọhọ Ileleikristi dhesẹ ewu nọ a re kuhọ oma, onọ ahwo kpobi a rẹ ruẹ. Jesu vẹvẹ unu kpahe oke mai na nọ: “Ri, Mẹ be tha wọhọ oji! O ghale ohwo nọ ọ jaja aro vi, nọ ọ sẹro iwu riẹ re a siẹ e ba ẹruẹ ẹbẹba!”a (Eviavia 16:15) Ma gwọlọ si obọ no ekwakwa-aghae gbe itee uruemu Oleleikristi mai hi re akpọ Setan ruẹse rehọ omai ru epanọ u je rie. O tẹ via ere kiyọ ma ku ‘ewu oma’ nana nọ ma fodẹ na fiẹ no. Uyero utioye o rẹ lẹliẹ ohwo vioja, o tẹ jẹ rrọ oware omovuọ.

5, 6. Fikieme u je wuzou re ma dikihẹ whawha evaọ abọ-ẹzi?

⁵ Obọdẹ ovuhumuo nọ ohwo o re wo kpahe oka evuhu Oleleikristi riẹ u re kpomahọ oghẹrẹ uzuazọ uyero riẹ gaga. Ẹvẹ ma rọ ta ere? Otẹrọnọ oghẹrẹ ohwo nọ odibo Jihova ọ rrọ o thọrọ e riẹ ẹro, ọ rẹ sai reghe jẹ jọ ababọ ugogo ẹjiroro hayo ute nọ o rẹ kpọe evaọ uzuazọ. Ebaibol na e vẹvẹ unu ẹsibuobu kpahe uzuazọ uyero utioye nọ iroro ohwo e rẹ rọ dọmu hu. Jemis olele na ọ vẹvẹ unu nọ: “Ohwo nọ iroro riẹ e dọmu hu ọ wọhọ ẹkporo abade nọ ofou o re kpokpo, ọ wọ fi. Keme a jọ ohwo ọyena o roro nọ oware jọ uti no obọ Ọnowo na te i obọ họ. Keme ohwo ekuiroro-ivẹ ọ rẹ jọ deghedeghe evaọ eruo riẹ.”—Jemis 1:6-8; Ahwo Ẹfẹsọs 4:14; Ahwo Hibru 13:9.

⁶ Ẹvẹ ma sae rọ yọrọ oka evuhu Oleleikristi mai? Eme ọ rẹ sai fi obọ họ kẹ omai rọ ubiẹro oghaghae rri uvẹ-ọghọ ulogbo nọ ma wo wọhọ enọ e be gọ Ọnọ Mae Rro na? Iviena roro kpahe idhere nọ e rrọ obotọ na.

Ru Oka Evuhu Oleleikristi Ra Ga Ziezi

7. Fikieme u je woma re ma yare Jihova nọ ọ kiẹ omai riwi?

⁷ Hai ru usu ra kugbe Jihova ga ẹsikpobi. Oware nọ o mae ghare kpaobọ nọ Oleleikristi o wo họ usu riẹ kugbe Ọghẹnẹ. (Olezi 25:14; Itẹ 3:32) Nọ ma te bi wo enọ jọ nọ i bi kpokpo omai udu kpahe oka evuhu Oleleikristi mai, kiyọ enẹna họ oke nọ ma rẹ rọ roma totọ kiẹ epanọ usu mai kugbe Ọghẹnẹ o ga je diwi te. Nwani fo, ọso-ilezi na ọ yare nọ: “Ri omẹ te, O ỌNOWO, re whọ dao omẹ ri; dao udu mẹ gbe iroro mẹ.” (Olezi 26:2) Eme jabọ ọkiẹriwo yena o ro wuzou? Fikinọ mai ọvo ma sae kiẹ iroro ididi eva mai fiotọ họ. Jihova ọvo ọ rẹ sae ginẹ riẹ iroro ididi mai—oghẹrẹ ohwo nọ ma rrọ eva obeva.—Jerimaya 17:9, 10.

8. (a) Ẹvẹ edawọ nọ Jihova rẹ kẹ uvẹ re i te omai e sae rọ kẹ omai erere? (b) Oware jọ vẹ u fi obọ họ kẹ owhẹ wo ẹnyaharo no wọhọ Oleleikristi?

⁸ Nọ ma tẹ yare Jihova inọ ọ kiẹ omai riwi koyehọ ma bi zizie iei nọ ọ dawo omai riwi. Ọ sae kuvẹ kẹ iyero jọ re e roma via, nọ i re dhesẹ iroro obeva mai gbe oghẹrẹ ohwo nọ ma ginẹ rrọ via. (Ahwo Hibru 4:12, 13; Jemis 1:22-25) U fo re ma jẹ edawọ itieye na rehọ keme e rẹ kẹ omai uvẹ nọ ma re ro dhesẹ epanọ ma wo omurokpotọ kẹ Jihova te. Edawọ itieye e rẹ sai dhesẹ sọ ma ‘kiete jẹ gbunu, gbe nọ oware ovo o kare omai hi.’ (Jemis 1:2-4) Onana u re ru nọ ma sae rọ rro haro evaọ abọ-ẹzi.—Ahwo Ẹfẹsọs 4:22-24.

9. Re ohwo o ru uzẹme Ebaibol na mu omobọ riẹ ẹro yọ ẹme ọ u te je omẹ? Ru ei vẹ.

⁹ Ru re uzẹme Ebaibol na u mu owhẹ ẹro. Ovuhumuo ọrọ oka evuhu mai wọhọ idibo Jihova o rẹ sai whrehe no, otẹrọnọ ma gbẹ bọ otọhotọ riẹ no eriariẹ Ikereakere na ze he. (Ahwo Filipai 1:9, 10) O gwọlọ nọ Oleleikristi kpobi—te ọmaha te ọkpako—o dhesẹ kẹ omariẹ avọ imuẹro inọ orọwọ riẹ ginọ uzẹme na wọhọ epanọ o rrọ Ebaibol na. Pọl ta udu họ Ileleikristi awọ nọ: “Jawo koware koware; yọrọ onọ uwoma ga.” (1 Ahwo Tẹsalonika 5:21) Emaha Ileleikristi nọ i wo esẹgbini nọ e be dhozọ Ọghẹnẹ a rẹ kareghẹhọ inọ ẹrọwọ esẹgbini rai o re ru ai fihọ uvi Ileleikristi hi. Devidi, ọsẹ Solomọn ta udu họ iẹe awọ nọ, ‘riẹ Ọghẹnẹ ọsẹ ra, re whọ rehọ eva ra kpobi gọe.’ (1 Iruẹru-Ivie 28:9) U te he re Solomọn o rri ọsẹ riẹ nọ ọ be bọ ẹrọwọ fihọ Jihova yọ ọye omariẹ ọ rehọ abọ muoma. O gwọlọ nọ ọ rẹ riẹ Jihova kẹ oma riẹ, yọ ere o gine ru. Ọ yare Jihova nọ: “Kẹ omẹ areghẹ gbe ẹriẹ nọ mẹ rẹ rọ nyatha nyakpo eva aro ahwo ọnana.”—2 Iruẹru-Ivie 1:10.

10. Fikieme o gbẹ rọ thọ họ re a nọ enọ oruọzewọ avọ emamọ ẹjiroro?

¹⁰ Eriariẹ họ otọhotọ ẹrọwọ ọgaga. Pọl ta nọ: “Ohwo o [te] yo ere ọ rẹ rọ rọwa.” (Ahwo Rom 10:17) Eme họ otofa ẹme Pọl na? Ẹme nọ ọ be ta na họ, ma rẹ bọ ẹrọwọ gbe evaifihọ mai ga kpahe Jihova, eyaa riẹ, gbe ukoko riẹ ẹkwoma eyo hayo ewuhrẹ Ẹme Ọghẹnẹ. Ẹkwoma enọ oruọzewọ nọ ma rẹ nọ kpahe Ebaibol na, ma rẹ sai duku iyo nọ e rẹ kẹ ọbọga. Ofariẹ, ma rẹ ruẹ ohrẹ Pọl nọ o rrọ Ahwo Rom 12:2 inọ: “Wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.” Ẹvẹ ma sai ro ru oyena? Ẹkwoma ewuhrẹ kpahe hayo “ẹriẹ uzẹme” na. (Taitọs 1:1) Ẹzi Jihova rẹ sai fi obọ họ kẹ omai wo otoriẹ izoeme egaga dede. (1 Ahwo Kọrint 2:11, 12) U fo re ma lẹ kẹ obufihọ Ọghẹnẹ otẹrọnọ ma be kaki wo otoriẹ oware jọ họ. (Olezi 119:10, 11, 27) Jihova gwọlọ nọ ma wo otoriẹ Ẹme riẹ, rọwo iẹe, jẹ nya lele iei. Ọ rẹ gaviezọ kẹ enọ oruọzewọ nọ a nọ avọ emamọ ẹjiroro.

Jọ o Jọ Ọtamuo Ra re Who Ru Ọghẹnẹ Eva Were

11. (a) Isiuru ẹkoma ohwo vẹ e rẹ sae jọ agbefẹ kẹ omai? (b) Ẹvẹ ma sai ro wo uduowha nọ ma re ro mugba kẹ otunyẹ ọhwa?

¹¹ Daoma ru Ọghẹnẹ eva were, orọnikọ ahwo-akpọ họ. Wọhọ ẹkoma ohwo-akpọ, ma rẹ gwọlọ whoma họ otu ro dhesẹ nọ ma te ahwo re. Ohwo kpobi ọ gwọlọ ogbẹnyusu yọ oma o rẹ were omai nọ ma te mu su kugbe ahwo. Eva etoke uzoge—gbe nọ ohwo ọ be kpako na—otunyẹ ọhwa o re kpomahọ ohwo gaga, avọ isiuru egaga nọ ohwo ọ rẹ gwọlọ rọ raro kele amọfa hayo ru ai eva were. Rekọ ẹsikpobi egbẹnyusu gbe ehwa mai i re wo uvi isiuru ewoma mai fihọ eva ha. Ẹsejọ oware nọ a gwọlọ kpobi họ, ohwo nọ o re ku oma gbe ai kpohọ eyoma oruo. (Itẹ 1:11-19) Nọ o te mu otunyẹ ọhwa nọ u fo ho họ ekie kẹ no, Oleleikristi ọ rẹ gwọlọ ko oghẹrẹ ohwo nọ ọ rrọ dhere. (Olezi 26:4) Pọl ukọ na vẹvẹ unu nọ: “Wha raro kele uruemu akpọ nọ ọ wariẹ owhai họ na ha.” (Ahwo Rom 12:2, The Jerusalem Bible) Jihova rẹ kẹ omai uduowha nọ ma gwọlọ re ma ruẹsi mugba kẹ otunyẹ kpobi nọ ọ wariẹ omai họ.—Ahwo Hibru 13:6.

12. Ehri-uzi gbe oriruo vẹ e rẹ sae kẹ omai uduowha dikihẹ ga nọ oware jọ o tẹ gwọlọ whrehe evaifihọ nọ ma wo kẹ Ọghẹnẹ?

¹² Okenọ itunyẹ otafe e tẹ be gwọlọ raha oka evuhu Oleleikristi mai, u re fo re ma kareghẹhọ nọ omarokpotọ mai kẹ Ọghẹnẹ u wuzou gaga vi ekielele iroro otu. Ehri-uzi nọ o rrọ Ọnyano 23:2 na o rẹ kẹ ọthọwẹ: “Who lele ogbotu ru umuomu hu.” Okenọ ogbotu emọ Izrẹl a vro inọ Jihova te sai ru eyaa riẹ gba ha, Kelẹb ọ se thahe thahe inọ o re lele eme ogbotu na ha. U mu rie ẹro inọ eyaa Ọghẹnẹ i te evaifihọ, yọ o wo osohwa ulogbo kẹ edikihẹ riẹ. (Ikelakele 13:30; Joshua 14:6-11) Kọ whọ te rehọ epọvo na mugba kẹ otunyẹ otu re whọ ruẹse sẹro usu ra kugbe Ọghẹnẹ?

13. Fikieme o jẹ rrọ owojẹ areghẹ re ma jẹ amọfa riẹ oghẹrẹ ahwo nọ ma rrọ wọhọ Ileleikristi?

¹³ Ru re a riẹ owhẹ wọhọ Oleleikristi. Odẹme nọ a rẹ ta inọ re a mugba kẹ oware họ ọthọwẹ nọ ọ mai woma kpobi u wuzou gaga nọ ma te bi dhesẹ oghẹrẹ ohwo nọ ma rrọ via wọhọ Ileleikristi. Nọ a wọso emọ Izrẹl nọ i wo ẹrọwọ eva edẹ Ẹzra fikinọ a be gwọlọ ru oreva Jihova, a ta nọ: “Mai idibo Ọghẹnẹ nọ o wo odhiwu gbe akpọ.” (Ẹzra 5:11) Nọ ma te fi oma hotọ kẹ owojẹ gbe ikẹ-isio ahwo egeva, ozọ o rẹ sai mu omai te epanọ ma gbẹ sai ro dhesẹ oghẹrẹ ohwo nọ ma rrọ họ. O tẹ rrọ uruemu mai inọ kẹse kẹse ma re ru ahwo kpobi eva were, ma te sai dhesẹ oghẹrẹ ohwo nọ ma rrọ via ha. Fikiere whọ jọ a ru ozọ mu owhẹ hẹ. U fo re who dhesẹ kẹ amọfa vevẹ inọ whẹ yọ omọvo Isẹri Jihova. Evaọ edhere adhẹẹ rekọ avọ uduowha, whọ sae ta kẹ amọfa kpahe eware nọ who se gboja, orọwọ ra, gbe edikihẹ ra wọhọ Oleleikristi. Jọ amọfa riẹ inọ who ru ọtamuo inọ whọ rẹ yọrọ itee ikpehru Jihova eva abọ ẹfuọ uruemu. Dhesẹ vevẹ inọ oware ovo u re ru owhẹ rolo obọ kẹ ẹgbakiete ra wọhọ Oleleikristi hi. Dhesẹ nọ eva e be were owhẹ gaga fiki ute uruemu ezi ra. (Olezi 64:10) O rẹ sae kẹ owhẹ ẹgba nọ who te dhesẹ oma via wọhọ Oleleikristi nọ ọ be yọrọ ẹgbakiete riẹ, o rẹ thọ owhẹ jẹ tubẹ lẹliẹ ahwo nọ enọ kpahe Jihova gbe idibo riẹ.

14. Kọ u fo re udu u whrehe omai fiki ọwọsuọ gbe ẹkoko? Ru ei vẹ.

¹⁴ Ẹhẹ, otujọ rẹ sai se owhẹ ẹkoko hayo wọso owhẹ. (Jud 18) Nọ amọfa a gbẹ gaviezọ họ nọ whọ tẹ be ta kẹ ae kpahe eware nọ who se gboja, whọ jọ udu whrehe owhẹ hẹ. (Izikiẹl 3:7, 8) Oghẹrẹ nọ whọ rẹ daoma te kẹhẹ, whọ te sae ta udu ahwo nọ a gwọlọ ekurẹriẹ hẹ rẹriẹ hẹ. Kareghẹhọ Fẹro. Uye hayo iruo igbunu evuevo—makọ uwhu ọmọ ọkpako riẹ dede—i ru rie rọwo ho inọ Jihova gine vi Mosis ze. Fikiere, whọ jọ ozọ ahwo-akpọ u ru owhẹ si uke kpemu hu. Ẹrorọsuọ gbe ẹrọwọ nọ ma re fihọ Ọghẹnẹ o rẹ sai fi obọ họ kẹ omai fi ozodhẹ kparobọ.—Itẹ 3:5, 6; 29:25.

Wuhrẹ no Eware nọ E Vrẹ no ze, Fi Otọhotọ họ kẹ Obaro

15, 16. (a) Eme họ ukuoriọ abọ-ẹzi mai? (b) Ẹvẹ ma sai ro wo erere nọ ma tẹ be rehọ obufihọ Ẹme Ọghẹnẹ roro kpahe ukuoriọ abọ-ẹzi mai?

¹⁵ Rri ukuoriọ abọ-ẹzi ra ghaghae. Ileleikristi a re wo erere no eroro didi kpahe ukuoriọ abọ-ẹzi rai ẹkwoma obufihọ Ẹme Ọghẹnẹ ze. Ukuoriọ nana o kẹre te uzẹme nọ o rrọ Ẹme Ọghẹnẹ, ẹruore uzuazọ ebẹdẹ bẹdẹ, gbe uvẹ-ọghọ nọ ma ro dikihẹ kẹ Ọghẹnẹ wọhọ ahwo nọ a bi whowho emamọ usi na. Kọ whọ gbẹ ruẹ abọ nọ who bi wo eva udevie Isẹri riẹ, nọ e rrọ utu idibo riẹ nọ a vi uwou inọ a ru iruo usiuwoma ota Uvie nọ u re siwi uzuazọ? Kareghẹhọ inọ Jihova ọvo ọ rọ unu riẹ ta nọ: “Whai họ isẹri me.”—Aizaya 43:10.

¹⁶ Whọ sae nọ oma ra enọ wọhọ: ‘Ẹvẹ ukuoriọ abọ-ẹzi nana o ghare omẹ obọ te? Kọ o ghare omẹ obọ te epanọ mẹ rẹ rọ rehọ oreva Ọghẹnẹ uruo karo evaọ uzuazọ mẹ? Kọ me rri rie ghare te epanọ o rẹ rọ kẹ omẹ ẹgba mugba kẹ edawọ nọ e rẹ sai ru ei vru mi omẹ?’ Ukuoriọ abọ-ẹzi mai o rẹ sae jẹ kẹ omai ufuoma abọ-ẹzi ulogbo nọ a rẹ sae jọ ukoko Jihova ọvo reawere riẹ. (Olezi 91:1, 2) Ẹkiẹriwi ikpeware nọ e via no eva ikuigbe ukoko Jihova evaọ oke mai nana o rẹ sae lẹliẹ omai vuhumu inọ uvumọ ohwo hayo oware ovuọvo o rẹ sai si idibo Jihova no otọakpọ na ha.—Aizaya 54:17; Jerimaya 1:19.

17. U te no ukuoriọ abọ-ẹzi mai no, eme ọfa o gbẹ gwọlọ?

¹⁷ Ginọ uzẹme, ma sae rọ ẹro so ukuoriọ abọ-ẹzi mai ọvo ho. O gbahọ nọ mai omomọvo ma re wo usu okpekpe kugbe Ọghẹnẹ. Nọ Pọl daoma bọ ẹrọwọ Ileleikristi nọ e rrọ obọ Filipai ga no, o te kere se ai nọ: “Fikiere, iyoyou mẹ, rọwo epanọ wha re he yo ẹme kẹse kẹse na, ere re enẹna, orọnikọ iraro mẹ ọvo ho, rekọ wha ru vi ere nọ omẹ riẹ hẹ, wha rehọ ozọ-odhẹ avọ enuho ru iruo usiwo rai via.” (Ahwo Filipai 2:12) Ma sae rọ ẹro so ẹrọwọ omọfa kẹ esiwo mai hi.

18. Ẹvẹ iruẹru Ileleikristi e sai ro dhesẹ oghẹrẹ ohwo nọ ma rrọ wọhọ Ileleikristi via ziezi?

¹⁸ Jọ owhreze evaọ iruẹru Ileleikristi. A rẹ ta inọ “iruo nọ ohwo o bi ru a rẹ rọ riẹ ohwo odẹ.” A vi Ileleikristi inẹnẹ uwou inọ a ru iruo usiuwoma ota orọ Uvie Ọghẹnẹ nọ a ro mu no. Pọl o whowho nọ: “Fiki epanọ mẹ rọ ukọ rọ kẹ otu Egedhọ mẹ dẹ oro họ odibo-ọgba mẹ oma.” (Ahwo Rom 11:13) Iruo usiuwoma ota mai u ru omai wo ohẹriẹ no akpọ na, yọ nọ ma tẹ be jariẹ wo abọ u re ru nọ ahwo a jẹ riẹ oka evuhu Oleleikristi mai ziezi. Oghẹrẹ ohwo nọ ma rrọ wọhọ Ileleikristi o rẹ sai dhesẹ oma via ziezi nọ ma tẹ be jọ owhreze evaọ iruo ukoko Ileleikristi na efa, wọhọ iwuhrẹ enya, abọ owo evaọ ebabọ iwou egagọ mai, omodawọ nọ ma re ro fi obọ họ kẹ ahwo nọ a rrọ ọbẹwẹ, gbe eware itieye na efa.—Ahwo Galesha 6:9, 10; Ahwo Hibru 10:23, 24.

Uvi Edikihẹ Oleleikristi O rẹ Wha Obọdẹ Eghale Ze

19, 20. (a) Irere vẹ i te owhẹ oma ra na no fiki Oleleikristi nọ whọ rrọ? (b) Eme ọ rẹ kẹ omai uvi imuẹro orọ oghẹrẹ ohwo nọ ma ginẹ rrọ?

¹⁹ Rehọ omoke jọ roro kpahe irere gbe eghale nọ ma be reawere rai fiki Ileleikristi uzẹme nọ ma rrọ. Ma wo uvẹ-ọghọ nọ Jihova rọ jẹ omai rehọ wọhọ idibo riẹ. Malakae ọruẹaro na ọ ta nọ: “Enọ e be dhẹ-ozọ ỌNOWO na ohwo ọ tẹ be ta [ẹme kẹ ohwo]; ỌNOWO na ọ tẹ gaviezọ je yo ẹme kẹ ae, a te kere obe ekareghẹhọ rọ kẹe kpahọ enọ e be dhẹ-ozọ ỌNOWO na, je bi roro odẹ riẹ.” (Malakae 3:16) Ọghẹnẹ sai se omai egbẹnyusu riẹ. (Jemis 2:23) Uzuazọ mai u wo aro fiki uvi ẹjiroro, gbe itee nọ e rẹ kẹ erere nọ ma bi lele. Yọ a kẹ omai ẹruore obaro ebẹdẹ bẹdẹ no.—Olezi 37:9.

²⁰ Kareghẹhọ nọ oghẹrẹ ohwo nọ whọ ginẹ rrọ gbe epanọ whọ ghare te o roma hwa oghẹrẹ nọ whọ ghare te evaọ aro Ọghẹnẹ, orọnikọ oghẹrẹ nọ amọfa a rẹ sai rri nọ whọ rrọ họ. Amọfa a sae rehọ ubiẹro itee ahwo-akpọ gheghe rri omai. Rekọ uyoyou nọ Ọghẹnẹ o wo kẹ omai gbe isiuru riẹ kpahe omai u re dhesẹ epanọ ma ginẹ ghare te—mai yọ ahwo riẹ. (Matiu 10:29-31) Ere re, uyoyou mai kẹ Ọghẹnẹ o rẹ sai ru udu kie omai vi kparobọ inọ mai yọ ahwo jọ re, yọ u re ru uzuazọ mai wo aro. “Ọ nọ o you Ọghẹnẹ ọye Ọghẹnẹ ọ rẹ riẹ.”—1 Ahwo Kọrint 8:3.

[Oruvẹ-obotọ]

Kọ Whọ Kareghẹhọ?

• Fikieme u ro wuzou re Ileleikristi e yọrọ oka evuhu abọ-ẹzi rai?

• Ẹvẹ ma sai ro ru oka evuhu Oleleikristi mai jọ gaga?

• Nọ ma tẹ rẹriẹ ovao dhe ẹsalọ ohwo nọ ma re ru eva were, eme o re fi obọ họ kẹ omai jiroro egbagba?

• Ẹvẹ emamọ oka evuhu mai wọhọ Ileleikristi o sai kpomahọ obaro akpọ mai?

[Iwoho nọ e rrọ ẹwẹ-obe avọ 13]

Nọ ma tẹ be jọ owhreze evaọ iruo ukoko Ileleikristi na o rẹ sai fi obọ họ ru oka evuhu mai wọhọ Ileleikristi ga ziezi