Ileleikristi—Wha Wereva Fiki Oghẹrẹ Ohwo Nọ Wha Rrọ!

“Ọnọ obi seha, ọ rọ Ọnowo na seha.”—1 AHWO KỌRINT 1:31.

1. Oghẹrẹ uruemu vẹ ahwo a bi dhesẹ kpahe egagọ?

“ABABỌ-OSEGBOJA.” Kẹle na, ohwo jọ nọ ọ rẹ ta ẹme kpahe egagọ ọ rehọ ẹme ọyena dhesẹ oghẹrẹ uruemu nọ ahwo buobu a wo kpahe egagọ rai. Ọ ta nọ: “Uruemu nọ ahwo a be mai dhesẹ kpahe egagọ enẹna o gbẹ rrọ egagọ vievie he—o rrọ oghẹrẹ uruemu nọ a re dhesẹ gbagba wọhọ ‘ababọ-osegboja.’ ” Nọ ọ jẹ fotọ ẹme na haro, o dhesẹ uruemu ababọ-osegboja wọhọ “ababọ uvi isiuru nọ ohwo o re wo kẹ egagọ riẹ.” Ọ ta nọ ahwo buobu a “rọwo Ọghẹnẹ . . . ; a be daezọ riẹ tere he ọvo.”

2. (a) Fikieme u gbe ro gbe omai unu hu inọ ahwo a bi dhesẹ ababọ-osegboja kpahe egagọ? (b) Enwoma vẹ e rẹ sai te uvi Ileleikristi nọ a te bi dhesẹ ẹzi ababọ-osegboja?

² U re gbe ahwo nọ a bi wuhrẹ Ebaibol unu hu inọ ahwo a bi dhesẹ ababọ-osegboja kpahe egagọ. (Luk 18:8) Yọ ma te rri eware nọ e be via evaọ egagọ, uruemu ababọ-isiuru yena o rrọ oware nọ a re rẹro riẹ. U kri no nọ egagọ erue i bi ro su ahwo-akpọ thọ, yọ eware nọ a bi ru u ru nọ ahwo a gbẹ be sai ro fi eva họ ai hi. (Eviavia 17:15, 16) Dede na, uruemu eva-ivẹ gbe ababọ-osegboja nọ o vọ oria kpobi na o rrọ oware enwoma kẹ uvi Ileleikristi. U re yoma gaga nọ ma te bi dhesẹ ẹzi ababọ-osegboja kpahe ẹrọwọ mai je wo ehoo kẹ egagọ Ọghẹnẹ gbe uzẹme Ebaibol na. Jesu ọ vẹvẹ unu kpahe uruemu nọ ohwo ọ rẹ rọ rroro hayo dhẹ hẹ eva okenọ ọ rehọ unuovẹvẹ kẹ Ileleikristi ikpe-udhusoi ọsosuọ nọ e jọ Laọdisia nọ: “[Wha] roro hayo edhẹ hẹ. O hae were omẹ re [wha] roro hayo re [wha] dhẹ. . . . Wha rẹ ruọruọ.”—Eviavia 3:15-18.

Evuhumu Oghẹrẹ Ahwo nọ Ma Rrọ

3. Didi oghẹrẹ ahwo Ileleikristi a rrọ, nọ o rẹ lẹliẹ ai wereva?

³ Re a ruẹsi mugba kẹ ababọ-osegboja nọ a re wo kẹ eware abọ-ẹzi, u fo nọ Ileleikristi a re wo eriwo ọgbagba ọrọ oghẹrẹ ahwo nọ a rrọ, yọ a rẹ wereva hrọ kpahe oka evuhu rai. Wọhọ idibo Jihova gbe ilele Jesu Kristi, ma rẹ sae jọ Ebaibol na ruẹ oghẹrẹ nọ a dhesẹ omai. Mai yọ “isẹri” Jihova, “otu nọ i bi ru iruo kẹ Ọghẹnẹ,” nọ ma be rehọ osegboja vuẹ amọfa “usiuwoma” na. (Aizaya 43:10; 1 Ahwo Kọrint 3:9; Matiu 24:14) Mai yọ ahwo nọ a wo ‘uyoyou kẹ ohwohwo.’ (Jọn 13:34) Ileleikristi uzẹme yọ ahwo nọ a “wo areghẹ te epanọ a sae [rọ] hẹriẹ uwoma no uyoma.” (Ahwo Hibru 5:14) Mai yọ ahwo nọ a bi “lo wọhọ ikpẹ eva akpọ na.” (Ahwo Filipai 2:15) Ma be daoma “yọrọ uruemu ezi [eva] udevie otu Egedhọ.”—1 Pita 2:12; 2 Pita 3:11, 14.

4. Ẹvẹ odibo Jihova ọ sai ro vuhu oghẹrẹ ohwo nọ ọ rrọ họ?

⁴ Uvi idibo Jihova a riẹ oghẹrẹ ahwo nọ a rrọ họ re. “A rọ e rọ akpọ na ha,” wọhọ epanọ Osu rai, Jesu Kristi, ọ jọ ọrọ akpọ na ha na. (Jọn 17:16) A si oma no “ahwo Egedhọ” nọ “otoriẹ rai u re biebi, nọ i vru [no] uzuazọ nọ Ọghẹnẹ ọ kẹ rae.” (Ahwo Ẹfẹsọs 4:17, 18) Fikiere, ilele Jesu a “se edhọ-egọ avọ urusio akpọ na ba . . . [je bi] yeri uzuazọ uwowolẹ, avọ ẹrẹreokie, gbe uzuazọ Ọghẹnẹ u yero eva akpọ nana.”—Taitọs 2:12.

5. Eme uduotahawọ na inọ ma “rọ Ọnowo na seha,” u dhesẹ?

⁵ Evuhumu oghẹrẹ ahwo nọ ma rrọ gbe usu nọ ma wo kugbe Osu Ehrugbakpọ na o rẹ wọ omai “rọ Ọnowo na seha.” (1 Ahwo Kọrint 1:31) Oghẹrẹ ehaise vẹ ye? Wọhọ Ileleikristi uzẹme, ma be wereva nọ ma ro wo Jihova wọhọ Ọghẹnẹ mai. Ma be nya lele ohrẹ nana: “Jọ ọnọ o bi ru omoro, jọ o ru omoro evaọ onana, inọ, o vuhumu, re ọ jẹ riẹ omẹ, nọ mẹ họ ỌNOWO na nọ o re dhesẹ uyoyou, je ruiruo nọ i kiete avọ ẹrẹreokie eva akpọ na.” (Jerimaya 9:24) Ma wo “omoro” fiki uvẹ-ọghọ nọ ma rọ riẹ Ọghẹnẹ gbe uvẹ-ọghọ nọ ọ be rọ rehọ omai fi obọ họ kẹ amọfa.

Use-Abọ Na

6. Fikieme o jẹ rrọ bẹbẹ kẹ ahwo jọ re a wo eriwo ọgbagba kpahe oka evuhu rai wọhọ Ileleikristi?

⁶ Uzẹme, ẹsikpobi o rẹ jọ lọlọhọ họ re ma yọrọ oka evuhu mai ziezi wọhọ Ileleikristi. Ọmoha jọ nọ a yọrọ whẹro wọhọ Oleleikristi ọ kareghẹhọ nọ okejọ o jariẹ nọ o wo elọhoma abọ-ẹzi, ọ ta nọ: “Ẹsejọ o jọ omẹ iroro inọ mẹ riẹ oware nọ mẹ jẹ rrọ omọvo Isẹri Jihova ha. A rehọ uzẹme Ebaibol na wuhrẹ omẹ no emaha ze. Mẹ jẹ hai roro ẹsejọ nọ onana yọ oghẹrẹ egagọ efa jọ gheghe wọhọ edekọ.” Ẹsejọhọ amọfa a kuvẹ no re omaweromẹ akpọ na, ekwakwa awhusi, gbe oghẹrẹ akpọ-oyere ọgbọna nọ u dhesẹ eriwo Ọghẹnẹ hẹ o kpọ oghẹrẹ ohwo nọ a rẹ jọ. (Ahwo Ẹfẹsọs 2:2, 3) Ileleikristi jọ e rẹ sai wo avro kpahe omobọ rai ẹsejọ, hayo wariẹ kiẹ itee rai gbe eware nọ a rọ karo riwi.

7. (a) Oghẹrẹ oma okiẹriwi vẹ u fo kẹ idibo Ọghẹnẹ? (b) Oghẹrẹ oma okiẹriwi vẹ o rẹ sai su kpohọ enwoma?

⁷ Kọ o thọ re ohwo ọ rọ oma tọtọ kiẹ oma riẹ riwi ẹsikpobi? Ijo. Whọ sae kareghẹhọ nọ Pọl ukọ na ọ ta udu họ Ileleikristi awọ inọ a kiẹ oma rai riwi ẹsikpobi, ọ ta nọ: “Wha nọ oma rai, sọ wha ghine kru orọwọ rai. Wha dawo oma rai.” (2 Ahwo Kọrint 13:5) Ukọ na ọ be jọ etenẹ ta udu họ Ileleikristi awọ inọ a rehọ ubiẹro owowa kiẹ oma rai riwi sọ a wo omoyẹlẹ abọ-ẹzi jọ, avọ iroro epanọ a rẹ rọ jẹ emamọ owọ nọ a rẹ rọ kpọ enana vi. Evaọ ẹkiẹriwi sọ o gine kru ẹrọwọ na, o gbahọ nọ Oleleikristi ọ rẹ kiẹ vuhumu sọ eme gbe iruemu riẹ e rọwo kugbe orọwọ riẹ. Dede na, nọ ma gbẹ riẹe kpọ họ, ọkiẹriwo nọ ma rẹ rọ gwọlọ riẹ “oghẹrẹ ohwo” nọ ma rrọ hayo gwọlọ iyo enọ nọ i kpomahọ usu mai kugbe Jihova hayo ukoko Ileleikristi na ha, o rẹ sae jọ ufofe jẹ wha enwoma abọ-ẹzi ze.a Ma gwọlọ ‘zue okọ ẹrọwọ mai’ vievie he!—1 Timoti 1:19.

A Ko Omai Dhere no Use-Abọ Họ

8, 9. (a) Ẹvẹ Mosis o ro dhesẹ avro nọ o wo kpahe oma riẹ? (b) Eme Jihova o ru kpahe ozodhẹ Mosis? (c) Ẹvẹ imuẹro uketha nọ Jihova kẹ na i kpomahọ owhẹ?

⁸ Kọ u fo re Ileleikristi nọ i wo avro kpahe omobọ rai ẹsejọ a roro nọ orai u re no, inọ a sai ru te oware nọ a gwọlọ mi ai hi? Vievie! Evaọ uzẹme a rẹ sai wo omosasọ nọ a tẹ riẹ inọ iroro avro itieye na e rrọ oware okpokpọ họ. Idibo Ọghẹnẹ oke anwae nọ i wo ẹrọwọ a jọ udu rai wo avro ẹsejọ. Mosis nọ o dhesẹ ẹrọwọ ọgaga, omurokpotọ, gbe omarọkẹ yọ oriruo jọ. Okenọ a kẹe iruo jọ nọ o wọhọ nọ e gbẹdẹ hrọ, avọ oma ehoo, Mosis ọ tẹ nọ inọ: “Mẹ ono?” (Ọnyano 3:11) O wọhọ nọ uyo nọ o jariẹ eva họ, ‘Mẹ yọ ohwo ọvo ho!’ hayo ‘Mẹ sai ru iruo yena ha!’ Abọ sa-sa ọrọ oghẹrẹ uzuazọ nọ Mosis o yeri notọ ze o sae lẹliẹe roro inọ o te he: Ọ jọ ohwo orẹwho erigbo. Ahwo Izrẹl a se riẹ. Ọ jọ ohwo nọ ọ rẹ ta ẹme kpẹlẹ kpẹlẹ. (Ọnyano 1:13, 14; 2:11-14; 4:10) Ọ jọ othuru-igodẹ, oghẹrẹ iruo nọ ahwo Ijipti a jẹ hai rri tọtọtọ. (Emuhọ 46:34) Agbẹta nọ o ro rri omariẹ nọ o te ohwo nọ o re si ahwo Ọghẹnẹ no igbo ze he na!

⁹ Jihova ta udu họ Mosis awọ ẹkwoma eyaa ilogbo ivẹ jọ nọ ọ ya kẹe: “Me re lele owhẹ jọ; gbe onana o rẹ te jọ oka kẹ owhẹ, nọ, me vi owhẹ: Okenọ whọ rehọ ahwo na no Ijipti ze ino, wha vẹ te gọ Ọghẹnẹ evaọ ugbehru-itho onana.” (Ọnyano 3:12) Ọghẹnẹ be ta kẹ odibo riẹ nọ o bi se enẹ hemu na nọ Ọ te jọ kugbei ẹsikpobi. Ofariẹ, Jihova be rehọ ere ta nọ o ti siwi ahwo riẹ hrọ. Nọ anwọ ige buobu ze na, Ọghẹnẹ ya eyaa uketha itieye na no. Wọhọ oriruo, re a tẹ nwane ruọ ẹkwotọ Eyaa na, ọ rehọ ẹkwoma Mosis ta kẹ orẹwho Izrẹl nọ: “Wha wo ogaga avọ emamọ aruọwha . . . Ọnowo na Ọghẹnẹ rai ọ rẹ te jọ kugbe owhai; o re ti ru owhai kie he hayo ọ rẹ sia owhai gbe he.” (Iziewariẹ 31:6) Jihova tẹ jẹ kẹ Joshua imuẹro nọ: “Ohwo ọvo nọ ọ rẹ sae za owhẹ dhe evaọ edẹ uzuazọ ra kpobi ọ rọ họ; . . . mẹ rẹ sai fi owhẹ họ otọ họ, hayo siọ owhẹ ba ha.” (Joshua 1:5) Ọ tẹ jẹ ya eyaa kẹ Ileleikristi nọ: ‘Mẹ sae se owhai ba hayo kiukeku owhai gbehe.’ (Ahwo Hibru 13:5) U fo re uketha ulogbo utioye nọ ma wo na o lẹliẹ omai wereva inọ ma rrọ Ileleikristi!

10, 11. Eme o fi obọ họ kẹ Asaf, ohwo Livae na kpọ eriwo riẹ vi kpahe aghare ọrọ egagọ riẹ kẹ Jihova?

¹⁰ Nọ oware wọhọ ikpe-udhusoi akuasoi e ruemu no anwọ edẹ Mosis, Asaf ohwo Livai jọ nọ o wo ẹrọwọ, ọ rehọ oruọzewọ kere kpahe avro nọ ọye omariẹ o wo kpahe aghare elele uzuazọ ẹgbakiete. Nọ ọ jẹ ya evaọ ẹgọ Ọghẹnẹ ghelọ edawọ sa-sa, Asaf ruẹ ahwo jọ nọ a jẹ rehọ Ọghẹnẹ se ẹkoko dede na yọ eware i bi woma kẹ ai. Ẹvẹ oware nọ Asaf rọ ẹro ruẹ na u ro kpomahọ iẹe? Ọ ta nọ: “Mẹ oma mẹ, ukiọkọ omojọ awọ mẹ o vru no edhere, evawọ mẹ ukiọkọ omojọ izoruẹ. Kemena eva mẹ e ghinẹ wọ kpahọ otu omovia, okenọ mẹ ruẹ ewoma nọ ọ rọ kẹ ahwo omuomu.” O te mu avro họ ewo evaọ udu riẹ kpahe erere nọ o re te ohwo nọ ọ rrọ odibo Jihova. Asaf o je roro inọ: “Dede nọ mẹ wozẹ eva mẹ fo, jẹ wozẹ abọ mẹ evaọ ẹrẹreokie, yọ u wo erere kẹ omẹ hẹ. Keme na kẹdẹ kẹdẹ a be fa omẹ eviaviẹ.”—Olezi 73:2, 3, 13, 14.

¹¹ Eme Asaf ru kpahe iroro idhọvẹ nana? Kọ ọ gbenu inọ o wo iroro itieye he? Ijo. Ọ ta iroro riẹ via kẹ Ọghẹnẹ evaọ olẹ, wọhọ epanọ ma rẹ ruẹ evaọ Olezi avọ 73 na. Aruẹri etẹmpol nọ o kpohọ họ oware nọ u nwene iroro Asaf. Etẹe o jo vuhumu nọ kpakọ uzuazọ uyero ofa nọ u woma vi egagọ omarọkẹ Ọghẹnẹ o rrọ họ. Avọ ovuhumuo abọ-ẹzi riẹ nọ ọ wariẹ ru kpokpọ no, o te ti vuhumu inọ Jihova o mukpahe eyoma gbe inọ ọ te kẹ irumuemu na uye evaọ ẹruoke riẹ. (Olezi 73:17-19) Avọ eriwo ọyena, Asaf te wo ovuhumuo ọgaga kpahe uvẹ-ọghọ nọ o wo wọhọ odibo Jihova. Ọ ta kẹ Ọghẹnẹ nọ: “Mẹ rọ kugbe owhẹ ẹsikpobi; whọ rọ obọze ra kru omẹ. Whọ rehọ areghẹ ra su omẹ, nọ oye o vrẹ no, whọ te rehọ omẹ ze oruaro ra.” (Olezi 73:23, 24) Asaf tẹ te wariẹ wo evawere kpahe Ọghẹnẹ riẹ.—Olezi 34:2.

A Riẹ Oghẹrẹ Ahwo nọ A Rrọ Dẹẹ

12, 13. Kẹ iriruo ahwo jọ nọ a gbiku rai fihọ Ebaibol na nọ usu rai kugbe Ọghẹnẹ o kẹ rai evawere.

¹² Edhere jọ nọ ma rẹ rọ bọ oka evuhu Oleleikristi mai ga họ ẹkwoma ẹkiẹriwi gbe aruorokele ẹrọwọ idibo Ọghẹnẹ nọ i wo omurokpotọ, enọ i wo evawere kpahe usu rai kugbe Ọghẹnẹ ghelọ ebẹbẹ nọ i te rai. Roro kpahe Josẹf, ọmọzae Jekọp. Eva okenọ ọ jọ ọmaha, a rehọ ẹghẹ zẹe wọhọ ọrigbo kpohọ Ijipti, ugbothabọ no akotọ ọsẹ riẹ nọ ọ rrọ odibo Ọghẹnẹ gbe oria nọ ọ jọ wo omakugbe osasa avọ obufihọ ahwo uviuwou riẹ hẹ. Nọ ọ jọ Ijipti, uvumọ ohwo jariẹ nọ Josẹf rẹ nyabru kẹ ọkpọvio Ọghẹnẹ hẹ, yọ iyero buobu e jariẹ nọ ọ riẹriẹ ovao dhe nọ e dawo ẹfuọ uruemu gbe ẹrorọsuọ Ọghẹnẹ riẹ. Dede na, ọ daoma gaga yọrọ oka evuhu riẹ wọhọ odibo Ọghẹnẹ, yọ ọ yọrọ ẹgbakiete riẹ kẹ oware nọ ọ riẹ nọ o gba. O rri omariẹ inọ o wo uvẹ-ọghọ nọ ọ rọ rrọ odibo Jihova yọ oma o vo riẹ hẹ re o dhesẹ eriwo riẹ via.—Emuhọ 39:7-10.

¹³ Ikpe-udhusoi akwa-eree nọ i lele i rie, u wo ọmaha ọmọtẹ Izrẹl jọ nọ o zihe ruọ ọrigbo kẹ Neaman, osu ogbaẹmo ahwo Siria. Dede na, oghẹrẹ ohwo nọ ọ rrọ wọhọ odibo Jihova o thọrọ ọmọtẹ na ẹro ho. Okenọ uvẹ na u rovie fihọ, ọmọtẹ na ọ rehọ aruọwha se isẹri ziezi kpahe Jihova okenọ ọ fodẹ Elaesha wọhọ ọruẹaro Ọghẹnẹ uzẹme na. (2 Ivie 5:1-19) Ikpe jọ nọ i lele i rie, ghelọ ogbekuo nọ ọ jotọ, Josaya Ovie ọmaha na o mu aruẹrẹ họ nọ o kpọ iruẹru egagọ nọ e jotọ vi, ọ ruẹrẹ etẹmpol Ọghẹnẹ, je ru orẹwho na zihe bru Jihova ze. Ọ wereva kpahe ẹrọwọ gbe egagọ riẹ. (2 Iruẹru-Ivie, uzou avọ 34 gbe 35) Oghẹrẹ ohwo nọ a rrọ wọhọ idibo Jihova o thọrọ Daniẹl gbe egbẹnyusu Hibru esa riẹ nọ e jọ Babilọn ẹro vievie he, ghelọ itunyẹ gbe edawọ nọ i te rai, a kru ẹgbakiete rai. Avro ọ riẹ hẹ, oma u mu rai inọ ae yọ idibo Jihova.—Daniẹl 1:8-20.

Jọ Oma O Were Owhẹ Fiki Oghẹrẹ Ohwo nọ Whọ Rrọ

14, 15. Re ma rehọ oghẹrẹ ohwo nọ ma rrọ wọhọ Ileleikristi seha, eme o gwọlọ?

¹⁴ Idibo Ọghẹnẹ nana a kparobọ fikinọ a rehọ edikihẹ rai kugbe Ọghẹnẹ wọhọ oware nọ a re ro seha. Kọ ẹvẹ o rrọ kẹ omai nẹnẹ re? Ẹvẹ ma sae rọ rehọ oghẹrẹ ohwo nọ ma rrọ wọhọ Ileleikristi seha?

¹⁵ Orọ ọsosuọ, onana o kẹre te obọdẹ ovuhumuo nọ ma re wo inọ mai yọ omọvo ahwo nọ a rehọ odẹ Jihova se, nọ i wo eghale gbe ọjẹrehọ riẹ. Ọghẹnẹ o wo avro ho kpahe ahwo nọ a rrọ eriẹ. Pọl ukọ na nọ ọ rria eva etoke nọ ozighi egagọ ọ jọ, o kere nọ: “Ọghẹnẹ ọ riẹ otu nọ erọ eriẹ.” (2 Timoti 2:19; Ikelakele 16:5) Jihova rẹ rehọ “otu nọ erọ eriẹ” seha. Ọ ta nọ: “Ọnọ rehọ obọ te owhẹ ọ rehọ obọ te ọmọ-ẹro mẹ.” (Zekaraya 2:8) U re vevẹ inọ Jihova you omai. U fo nọ uyoyou udidi o wọ omai nya usu kugbei ro dhesẹ nọ ma wo uyoyou kẹe re. Pọl o kere nọ: “Ọ nọ o you Ọghẹnẹ ọye Ọghẹnẹ ọ rẹ riẹ.”—1 Ahwo Kọrint 8:3.

16, 17. Fikieme Ileleikristi, te emaha te ekpako, a jẹ wereva kpahe ukuoriọ abọ-ẹzi rai?

¹⁶ U fo re emoha nọ a yọrọ notọ ze wọhọ Isẹri Jihova a kiẹ oma rai riwi sọ a bi ru oka ohwo nọ a rrọ wọhọ Ileleikristi muẹro ziezi ẹkwoma usu omobọ ohwo nọ a re wo kugbe Ọghẹnẹ. A rẹ roma da ẹrọwọ esẹgbini rai hi. Pọl o kere kpahe omomọvo idibo Ọghẹnẹ nọ: “Eva aro olori riẹ ọvo o je dikihẹ hayo ekie.” Fikiere Pọl o te fibae nọ: “Mai kpobi ma ti . . . gu ọvuọ ẹkẹunu riẹ kẹ Ọghẹnẹ.” (Ahwo Rom 14:4, 12) U re vevẹ, nọ ohwo ọ tẹ rrọ ukoko na fikinọ etẹe ahwo uviuwou riẹ a rrọ, oyena ọvo o rẹ sai ru nọ o je wo usu okpekpe nọ o rẹ tọ kugbe Jihova ha.

¹⁷ Ma wo ikuigbe idibo Jihova buobu no anwọ emuhọ ze. U no anwọ oke Ebẹle, ọzae ẹrọwọ na ze—oware wọhọ ikpe idu ezeza nọ i kpemu—rite “otu obuobu” ọrọ Isẹri Jihova oke mai na gbe idibo Jihova buobu efa nọ e te reawere uzuazọ ebẹdẹ bẹdẹ evaọ obaro. (Eviavia 7:9; Ahwo Hibru 11:4) Mai họ enọ e mae kemu eva usu idibo ẹrọwọ nana nọ i no anwae ze na. Ukuoriọ abọ-ẹzi nọ ma wo o rro kẹhẹ!

18. Ẹvẹ eware nọ ma se gboja gbe itee mai i ro ru omai wo ohẹriẹ no akpọ na?

¹⁸ Oka evuhu Oleleikristi mai o tẹ jẹ kẹre te ugogo eware nọ ma se gboja, ekwakwa-aghae, itee, iruemu nọ i dhesẹ omai wọhọ Ileleikristi. Oye họ “Edhere na,” edhere uzuazọ obokparo ọvuọvo gbe edhere uzuazọ uyero nọ o rẹ were Ọghẹnẹ. (Iruẹru 9:2; Ahwo Ẹfẹsọs 4:22-24) Ileleikristi e rẹ “jawo koware koware” a vẹ jẹ “yọrọ onọ uwoma ga”! (1 Ahwo Tẹsalonika 5:21) Ma wo otoriẹ uvevẹ orọ ohẹriẹ ulogbo nọ o rrọ udevie Ileleikristi gbe akpọ nọ ọ hẹriẹ oma no Ọghẹnẹ na. Jihova ru omai riẹ ohẹriẹ nọ o rrọ udevie egagọ uzẹme gbe egagọ erue vevẹ. Ọ rehọ ẹkwoma Malakae, ọruẹaro riẹ, whowho nọ: “Wha ve ti vuhu enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.”—Malakae 3:18.

19. Uruemu vẹ Ileleikristi uzẹme a re wo vievie he?

¹⁹ Nọ ehaise evaọ odẹ Jihova u wuzou tere evaọ akpọ nana nọ o reghe no na, eme ọ rẹ sai fi obọ họ kẹ omai wereva inọ mai yọ idibo Ọghẹnẹ jẹ yọrọ obọdẹ oka evuhumu Oleleikristi mai? Ma te ruẹ eware jọ nọ i re fi obọ họ kẹ omai ru onana evaọ uzoẹme nọ o rrọ aro na. Nọ who ti wuhrẹ kpahe enana, u ti mu owhẹ ẹro nọ: Ileleikristi uzẹme a re wo uruemu “ababọ-osegboja” vievie he.

[Oruvẹ-obotọ]

Kọ Whọ Kareghẹhọ?

• Ẹvẹ Ileleikristi a sae rọ rehọ “Ọnowo na seha”?

• Eme who wuhrẹ no oriruo Mosis gbe Asaf ze?

• Ahwo vẹ a jọ Ebaibol na fodẹ nọ a wo evawere kpahe egagọ rai kẹ Ọghẹnẹ?

• Re ma rehọ oka evuhu Oleleikristi mai seha, eme u dhesẹ?

[Uwoho nọ o rrọ ẹwẹ-obe avọ 6]

Mosis wo avro kpahe omobọ riẹ ẹsejọ

[Iwoho nọ e rrọ ẹwẹ-obe avọ 7]

Idibo Jihova erọ oke anwae buobu a wo omawere kpahe oghẹrẹ ahwo nọ a rrọ