Ẹmo Nọ A Rẹ Rọ Eme Fi Fikieme O jẹ Da?

“Eme ọ rẹ wha ẹmo-ofio tha, jegbe eme ọ rẹ wha ohọre ze udevie rai?”—JEMIS 4:1.

ORỌNIKỌ ogbaẹmo ahwo Rom Jemis nọ o kere eme obehru na ọ kpọ onọ onana bru hu, enọ i je fi emo avọ obokparọ oke yena; yọ orọnikọ oware nọ o jẹ wha ohọre orọ utu ọkparesuọ orọ ahwo Ju ze eva ikpe-udhusoi ọsosuọ ekele mai na ọ jẹ ta ẹme kpahe gbe he. Jemis ọ jẹ ta ẹme kpahe ẹwhọ nọ ọ rẹ sae tubẹ jọ udevie imava ọvo. Fikieme? Fikinọ wọhọ ẹmo, ẹwhọ nọ ọ rẹ jọ udevie ahwo ọ rẹ wha okpẹtu ze. Muẹrohọ ikuigbe Ebaibol nana.

Emọ Jekọp ọsẹ-ode na a mukpahe oniọvo rai Josẹf ga te epanọ a rọ zẹe kpohọ igbo. (Emuhọ 37:4-28) Sọl ovie Izrẹl na ọ jẹ gwọlọ kpe Devidi. Fikieme? Fikinọ ọ jẹ re Devidi ihri. (1 Samuẹle 18:7-11; 23:14, 15) Evaọ ikpe-udhusoi ọsosuọ, eyae Ileleikristi ivẹ jọ, Evodia avọ Sintiki a fi ẹvohẹ họ udhedhẹ ukoko soso fiki ẹwhọ rai.—Ahwo Filipai 4:2.

Evaọ kẹlena, ahwo a rehọ egbọdọ hayo ọwhunu ku egrẹ rai họ no. Ẹsibuobu omọvo evaọ usu imava nọ i wo egrẹ na o re whu hayo nwoma nọ o rẹ koka họ iẹe evaọ edẹ uzuazọ riẹ kpobi. Nẹnẹ, ẹsibuobu ahwo nọ a rẹ jẹ egrẹ a be rehọ unu ru okwakwa ẹmo rai ẹkwoma eme edada nọ a rẹ ta kẹ ọrivẹ rai nọ a gbe wo ẹwhọ. Dede nọ ẹmeunu ọ rẹ sae nwani kpe ohwo ho, eme edada e rẹ sai duobọ te ohwo iroro jẹ raha emamọ odẹ ohwo. Ẹsibuobu ọnọ ọ so ẹwhọ na ze he na ọ rẹ ruẹ edada erọ oghẹrẹ “ẹmo-ofio” nana.

Roro kpahe oware nọ o via ikpe jọ nọ i kpemu, okenọ ozerẹ ichọche Aglican jọ ọ bọwo ozerẹ ọfa ota inọ o bi mu raha igho ichọche. Ẹwhọ rai o te do lahwe, kẹsena ichọche nọ a be rẹrote na e tẹ hẹriẹ kpohọ itu sa-sa. Okenọ ozerẹ nọ a rrọ abọ riẹ hẹ ọ tẹ be kẹ ovuẹ, ahwo utu jọ a gbe kpohọ ichọche ẹdẹ yena ha. Egrẹ nọ ọ jọ udevie rai ọ ga te epanọ a jẹ hai ro gbolo ovao kẹ omoma rai nọ a te kpohọ ichọche. Okenọ a ta kẹ ozẹrẹ nọ ọ bọwo ọdeko ota na inọ ọye omariẹ o ru uruemu ọfariẹ-ogbe jọ, egrẹ na ọ tẹ ga viere.

Olou-uk’Ọghẹnẹ ọrọ obọ Canterbury ọ tẹ be lẹ izerẹ ivẹ nana inọ a ku ẹme na họ, o dhesẹ ẹwhọ rai na wọhọ “ẹyao-ọta” gbe “oware atẹwẹ nọ u re si ọghọ no odẹ Olori Mai.” Evaọ 1997 o tẹ ruọ ọjọ evaọ usu izerẹ ivẹ na inọ o re no ọkwa. Ọrọ avivẹ o kru ọkwa riẹ bẹsenọ o ro te unu ikpe nọ o gbahọ nọ o re ro no ọkwa ozerẹ na. Dede na, ọ jọ ọkwa na te uminiti urere, o te ti serihọ no iruo ozerẹ evaọ August 7, 2001, nọ ọ kpako te ikpe 70 no. Obe usu na, The Church of England Newspaper o ta inọ ẹdẹ nọ o ro serihọ no ọkwa o jọ ẹdẹ ehaa ọ Victricius, “Ọrezi” na. Ono họ Victricius “Ọrezi” na? Yọ ibishọpo ikpe-udhusoi avene jọ, ọnọ a ta inọ a fa eviaviẹ fikinọ ọ rọwo nọ o re fi ẹmo ho. Nọ u je dhesẹ ohẹriẹ nọ o rrọ imava nana, obe usi na o ta nọ: “[Ozerẹ nọ o serihọ no ọkwa riẹ na] o lele ozerẹ ọfa ichọche na whọ, ọ rọ aro kele uruemu Victricius “Ọrẹzi” na ha, ọnọ ọ se inọ o re wobọ evaọ ẹmo-ofio ho.”

Izerẹ yena a hae te nwa amọfa gbe omarai oma ha o hẹ jọnọ a fi ohrẹ nọ o rrọ Ahwo Rom 12:17, 18 na hiruo, onọ o ta nọ: “Wha rehọ eyoma hwosa eyoma kẹ ohwo ọvo ho, rekọ wha wo ẹjiroro eware nọ ikiehọ eva aro ahwo kpobi. Otẹ make bẹ, epa umutho nọ orọ owhai oma na, wha rehọ iẹe lele ahwo kpobi ria dhedhẹ.”

Kọ whẹ oma ra? Nọ omọfa o te ru owhẹ eva dha, kọ egrẹ ọ rẹ wọ owhẹ rehọ unu fi ẹmo? Manikọ whọ rẹ whaha eme edada je rovie uvẹ fihọ kẹ udhedhẹ uruo? Nọ who te ru omọfa eva dha, kọ who re gbolo ovao kẹ ohwo yena je bi rẹro nọ ẹbẹbẹ na o ti notọ kẹ omariẹ nọ omoke jọ o tẹ vrẹ no? Manikọ whẹ yọ ohwo nọ ọ rẹ kaki wou unu? Te whọ rẹ yare erọvrẹ hayo whọ rẹ rọ vrẹ omọfa, udhedhẹ nọ whọ rẹ daoma ru kugbe omọfa u re ru nọ udu u je kie owhẹ vi. Ohrẹ Ebaibol na o rẹ sai fi obọ họ kẹ omai ruẹrẹhọ nọ ma tẹ maki wo ẹbẹbẹ kugbe ohwo jọ kri no.