11 Ga Obọ Iruo

OWARE NỌ U DHESẸ

Ahwo nọ a ga obọ iruo a rẹ dhozọ iruo ho. Ukpoye, a rẹ gwọlọ ru iruo re a sae rẹrote omarai je fiobọhọ kẹ amọfa o tẹ make rọnọ okpiruo a bi ru hu.

OWARE NỌ U RO WUZOU

Eware buobu e riẹ nọ o gwọlọ nọ ma re ru evaọ uzuazọ, te o were omai hayo o were omai hi. Evaọ akpọ na nọ ma rrọ na, ahwo jọ a rẹ gwọlọ ru iruo egaga ha. Rekọ whọ tẹ ga obọ iruo, u re fiobọhọ kẹ owhẹ.​—Ọtausiuwoma Na 3:13.

“Mẹ ruẹ no nọ whọ tẹ ga obọ iruo, eva e rẹ were owhẹ, yọ udu o rẹ jọ owhẹ awọ. Fiki evawere yena nọ me re wo na, iruo e rẹ were omẹ gaga. Yọ ohwo nọ ọ rẹ rọ iruo riẹ zaharo ho, ahwo a rẹ kẹe adhẹẹ gaga.”​—Reyon.

EHRI-UZI EBAIBOL: “Erere o re no oghẹrẹ iruo egaga kpobi ze.”​—Itẹ 14:23.

OWARE NỌ WHỌ RẸ SAI RU

Who te ru eware nọ ma be te ta kpahe evaọ obotọ na, u ti ru nọ iruo e te rọ were owhẹ.

Hae daoma ru eware ziezi. Iruo kpobi nọ who bi ru, te iruo uwou, te ihomwhọko, hayo okọ ra, hae daoma rehọ eva ra kpobi ru iruo na. O tẹ make rọnọ who bi ru ei ziezi vẹre, gbẹ gwọlọ oghẹrẹ ofa nọ who re ro ru ei vẹrẹ je woma viere. Whọ tẹ ginẹ riẹ iruo ra ziezi, iruo na e te hae were owhẹ oma.

EHRI-UZI EBAIBOL: “Kọ whọ ruẹ ohwo nọ o wo onaa iruo ziezi no ẹdẹ jọ? Aro ivie o re dikihẹ; o re dikihẹ aro ahwo gheghe he.”​—Itẹ 22:29.

Who roro kpahe omara ọvo ho. Nọ whọ tẹ be hae riẹ iruo ra ru ziezi, u re fiobọhọ kẹ amọfa. Wọhọ oriruo, whọ tẹ ga obọ iruo evaọ uwou na, u re ru nọ uye o gbẹ rọ bẹ amọfa ha evaọ uwou na.

EHRI-UZI EBAIBOL: “Ẹkẹ evawere e mae rrọ vi emio.”​—Iruẹru Ikọ 20:35.

Daoma ru vrẹ iruo nọ a kẹ owhẹ. Nọ who te bi ru iruo, ukpenọ who re ru umutho iruo nọ a kẹ owhẹ na ọvo, daoma rọ iroro obọra ru vrẹ ere. Whọ tẹ be hai ru enẹ, u ti fiobọhọ kẹ owhẹ, keme whọ te rọ ere wuhrẹ epanọ whọ rẹ rehọ iroro obọra ru eware evaọ uzuazọ.​—Matiu 5:41.

EHRI-UZI EBAIBOL: “Re oware uwoma nọ who bi ru o gbẹ jọ orọ ọgbahọ họ, rekọ onọ u no owhẹ eva ze.”​—Filimọn 14.

Ru utho nọ ẹgba ra o te. Ginọ uzẹme nọ ohwo nọ ọ ga obọ iruo o re ru iruo gaga rekọ oyena u dhesẹ nọ ọ rẹ rọ iruo ro kpe omariẹ no ho. O re ru utho ẹgba riẹ, ọ vẹ jẹ daoma wo oke nọ o re ro serihọ.

EHRI-UZI EBAIBOL: “Umutho eriosehọ u woma vi iruo egaga nọ e wọhọ ofou nọ a bi le.”​—Ọtausiuwoma Na 4:6.