Ọre Na O Mudhe

RRI Joshua. Ọ be ta nọ: ‘Ọre, mudhe!’ Ọre na o te ghine mudhe. Ọ daji udevie ehru na okpẹdẹ ọsoso. Jihova o rurie via! Rekọ jọ ma ruẹ oware nọ Joshua ọ rọ gwọlọ nnọ ọre na o gbe lo.

Nọ ivie iyoma isoi eva otọ Kenan a muọ Ahwo-Gibiọn họ ẹhọre no, Ahwo-Gibiọn a te vi ọzae jọ nya evuẹ Joshua re ofiobọhọ kae. Ọ tẹ ta nọ, ‘Nya bru omai ze vẹrẹ! Ti siwi omai! Ivie nọ erọ obọ ewho ikpehru na kpobi a nyaze te họre idibo ra.’

Joshua avọ otu ohọre riẹ a tẹ nwane nya ovaọvo. A nya aso na soso re. Nọ a ro te Gibiọn, egbaẹmo ivie isoi na ozọ u te mua’i a te muhọ ẹdhẹkpo. Koyehọ Jihova o ru ithakpa kie no ehru ze, egbaẹmo rai nọ iwhu fiki ithakpa nọ ije kiai a bu vi enọ otu ohọre Joshua a kpe.

Joshua sae ruẹ nọ obọ nana ọre o bi ti kie diwi no. Ebi o bi ti mu, egbaẹmo ọ ikpele ivie isoi na a vẹ te va abọ. Fiki oyena Joshua ọ rọ lẹ kẹ Jihova ọ jẹ ta nọ: ‘Ọre, mudhe!’ Nọ ọre ogbebi ro lo na, Ahwo-Izrẹl a tẹ sai fi ẹmo na re, jẹ kpare obọ.

Ivie iyoma efa buobu e rọ eva Kenan nọ imukpahe ahwo Ọghẹnẹ. O rehọ Joshua avọ egbaẹmo riẹ ikpe ezeza re akparobọ viọ ivie 31 eva otọ na. Nọ a ru onana no, Joshua ọ tẹ ruẹ nọ a rẹ ghale otọ Kenan rehọ kẹ erua nọ e gwọlọ ẹkuotọ.

Ikpe buobu evrẹ no, Joshua ọ tẹ kpako te ikpe 110 o te whu uwremuna. Nọ ọye avọ egbẹnyusu riẹ a rọ rọ uzuazọ na, ahwo na a je yẹme kẹ Jihova. Rekọ nọ ahwo ezi nana awhu no, ahwo na a te mu eware iyoma họ eruo a tẹ ruọ eva uye. Oke nana a rọ ghinẹ gwọlọ obọfihọ Ọghẹnẹ.