Si Kẹle Ọghẹnẹ
Ọ Gwọlọ nọ Eware I Kiehọ kẹ Omai
ESẸGBINI iyoyou a rẹ gwọlọ epanọ eware i re ro kiehọ kẹ emọ rai, re a yeri uzuazọ evevọwẹ gbe evawere. Epọvo na Ọsẹ obọ odhiwu mai, Jihova, ọ gwọlọ nọ eware i kiehọ kẹ omai, emọ otọakpọ riẹ. Ọ vuẹ omai oware nọ ma re ru re eware i woma kẹ omai, onọ u dhesẹ uyoyou nọ o wo kẹ omai. Wọhọ oriruo, roro kpahe ẹme nọ ọ ta kẹ Joshua, wọhọ epanọ o rrọ Joshua 1:6-9.
Muẹrohọ uwoho nọ o rrọ obọze na. Nọ Mosis o whu no, a tẹ rehọ Joshua mu osu ọkpokpọ kẹ emọ Izrẹl, nọ i bu te ima bro. Ahwo Izrẹl a be te ruọ ẹkwotọ nọ Ọghẹnẹ ọ ya eyaa riẹ kẹ esẹ-ode rai. Ọghẹnẹ ọ gwọlọ kẹ Joshua ohrẹ jọ taure a tẹ ruọ Ẹkwotọ Eyaa na. O te ru lele iei, eware i ti kiehọ kẹe. Dedena, orọnikọ fiki ewoma Joshua ọvo Jihova ọ rọ kẹe ohrẹ na ha. Ma te fi ohrẹ na họ iruo, eware i re kiehọ kẹ omai re.—Ahwo Rom 15:4.
Jihova ọ ta kẹ Joshua nọ o wo udu je kru oma ga—o jọ oware ẹsiẹvo ho rekọ isiasa soso. (Owọ avọ 6, 7, 9) Avro ọ riẹ hẹ inọ o gwọlọ udu gbe aruọwha re Joshua ọ sai su orẹwho na ruọ Ẹkwotọ Eyaa na omakọkọ. Rekọ ẹvẹ ọ sai ro wo udu gbe aruọwha?
Eme Ọghẹnẹ nọ a rọ ẹzi riẹ kere fihotọ na e rẹ sae kẹ Joshua udu gbe aruọwha. Jihova ọ ta kẹe inọ: “Yọre oma re who koko uzi kpobi nọ Mosis odibo mẹ o je kẹ owhẹ.” (Owọ avọ 7) Evaọ oke yena, o wọhọ nọ umutho ebe Ebaibol na jọ nọ a kere fihotọ no Joshua o wo.a Dedena, ewo Ikereakere na ọvo u re ru nọ eware i je kiehọ kẹ ohwo ho. Re Joshua ọ ruẹsi wo erere noi ze, o gwọlọ nọ o re ru eware ivẹ jọ.
Orọ ọsosuọ, o gwọlọ nọ Joshua ọ rẹ rehọ Ẹme Ọghẹnẹ vọ udu riẹ. Jihova ọ ta nọ: “Who re se i te aso te uvo.” (Owọ avọ 8) Obe jọ o ta nọ: “Ọghẹnẹ ọ jẹ rọ ere ta kẹ Joshua inọ ọ hae kareghẹhọ Uzi Riẹ ẹkwoma eme na nọ o re ‘gu kẹ omobọriẹ,’ ‘roro kpahe didi,’ hayo ‘fi iroro riẹ họ ẹsikpobi.’” Nọ Joshua o te bi se je roro kpahe Ẹme Ọghẹnẹ kẹdẹ kẹdẹ, u ti fi obọ họ kẹe fi ebẹbẹ nọ ọ te rẹriẹ ovao dhe kparobọ.
Orọ avivẹ, o gwọlọ nọ Joshua o re fi eware nọ ọ jọ Ẹme Ọghẹnẹ wuhrẹ họ iruo. Jihova ọ vuẹ riẹ inọ: “Yọre oma ru epanọ a kere fihọ eva riẹ; re edhere ra o kiehọ kẹ owhẹ wowoma.” (Owọ avọ 8) Oreva Ọghẹnẹ uruo u re ru nọ eware i je kiehọ kẹ Joshua. Ẹvẹ o gbẹ rọ jọ ere he? Oreva Ọghẹnẹ o rẹ seba erugba ha.—Aizaya 55:10, 11.
Joshua o ru lele ohrẹ Jihova. Onana u ru nọ o ro yeri uzuazọ evawere avọ evevọwẹ wọhọ odibo Jihova nọ o kru ẹrọwọ te urere.—Joshua 23:14; 24:15.
Kọ whọ gwọlọ yeri ọkpọ uzuazọ evevọwẹ nọ Joshua o yeri? Ere Jihova ọ gwọlọ kẹ owhẹ. Rekọ ewo Ẹme Ọghẹnẹ, Ebaibol na ọvo u te he. Oleleikristi jọ nọ ọ gọ Jihova kri no avọ ẹrọwọ, ọ ta oware jọ nọ u re fi obọ họ: “Rọ oma totọ se Ebaibol na, jọ eme riẹ e jọ udu ra ru iruo.” Whọ tẹ be rọ Ẹme Ọghẹnẹ vọ udu ra ẹsikpobi je bi fi eware nọ who wuhrẹ họ iruo, “edhere ra o [ti] kiehọ kẹ owhẹ” wọhọ epanọ o jọ kẹ Joshua na.
[Oruvẹ-obotọ]
a O wọhọ nọ ebe isoi Mosis na (Emuhọ, Ọnyano, Iruo-Izerẹ, Ikelakele, gbe Iziewariẹ), obe Job, gbe olezi ọvo hayo ivẹ họ ebe Ebaibol nọ e jariẹ evaọ etoke Joshua.