Ọmọtẹ Jọ Ofiobọhọ Kẹ Ohwo Ologbo

WHỌ riẹ oware nọ ọmọtẹ ọsese ọnana ọ be ta na? Ọ be ta kẹ oni-uwou na kpahe Elaesha ọruẹaro Jihova, gbe eware efa nọ Jihova ofiobọhọ kẹe ru. Oni-uwou na ọ riẹ kpahe Jihova ha keme ọ rọ Ohwo-Izrẹl he. Fikiere, jo ma ruẹ, onọ osoriẹ nọ ọmọtẹ na ọ jẹ rọ evaọ uwou oni-uwou na.

Oni-uwou na yọ Ohwo-Siria. Ọzae riẹ họ Neman, oletu ẹmo Ahwo-Siria. Ahwo-Siria a mu ọmọtẹ ọsese Izrẹl ọnana rehọ, a tẹ rehiẹe se aye Neman re ọ jọ odibo riẹ.

Neman o wo ẹyao oyoma nọ a re se oti. Ẹyao ọnana ọ rẹ sae lẹliẹ iwo oma ohwo whọlọ kie no. Fikiere onana họ oware nọ ọmọtẹ na ọrọ aye Neman ẹ ta kẹ: ‘Ohẹ jọnikọ olori mẹ ọ rẹ sae nya bru ọruẹaro Jihova obọ Izrẹl. Ọ hẹ sai siwi oti riẹ kpo.’ Uwhremuna oni-uwou na ọ tẹ ta epanọ ọmọtẹ ọsese na ọ ta kẹ ọzae riẹ.

Neman ọ gwọlọ gaga re a si yei; fikiere ọ tẹ gbamu nọ o re kpobọ Izrẹl. Okenọ o te obei, o te kpobọ uwou Elaesha. Elaesha o te vi odibo riẹ ro otafe ta kẹ Neman re ọnya ehọ evaọ Ethẹ Jọdan isiahrẹ. Onana o tẹ dha Neman eva gaga, ọ tẹ ta nọ: ‘Ithẹ nọ erọ obọ uwou iwoma vi ithẹ kpobi nọ erọ evaọ Izrẹl!’ Nọ ọ ta onana no, Neman ọ tẹ nya vrẹ.

Rekọ odibo riẹ jọ ọ tẹ ta kẹe nọ: ‘Olori, otẹrọnọ Elaesha ọ ta kẹ owhẹ nọ who ru oware ogaga jọ, who re rue’i. Kẹvẹ whọ gbẹ sae họ oma ra, wọhọ epanọ ọ ta ha?’ Neman o te yo ẹme odibo riẹ ọ tẹ nya i duwu oma riẹ họ evaọ Ethẹ Jọdan isiahrẹ. Nọ o ru ere, iwo riẹ etẹ ga jẹ kpokpọ!

Neman ọ tẹ ghọghọ gaga. O te zihe bru Elaesha ọ tẹ ta kẹe nọ: ‘Enẹna umu omẹ ẹro no nọ Ọghẹnẹ Izrẹl ọvo họ Ọghẹnẹ uzẹme evaọ otọakpọ na kpobi. Fikiere, iviena mi omẹ okẹ onana.’ Rekọ Elaesha o te yo nọ: ‘Ijo, mẹ rẹ rehiẹe he.’ Elaesha ọ riẹ nọ orẹ thọ kẹe re ọ rehọ okẹ na, keme Jihova họ ọnọ osiwi Neman. Rekọ Gehazi odibo Elaesha ọ gwọlọ okẹ na kẹ omariẹ.

Fikiere kọ ona họ onọ Gehazi o ru. Okenọ Neman ọ nyawa no, Gehazi ọ tẹ dhẹ nyai lei mu. Gehazi ọ tẹ ta nọ, ‘Elaesha o vi omẹ ze ta kẹ owhẹ nọ ọ hẹ gwọlọ eware okẹ ra na jọ rọkẹ egbẹnyusu nọ iweze ze obọna.’ Onana yọ, ọrue. Rekọ Neman ọ riẹ nọ ọrue he; fikiere ọ tẹ rehọ eware jọ kẹ Gehazi.

Okenọ Gehazi o zihe te uwou yọ Elaesha ọ riẹ oware nọ oru no. Jihova ọ ta kẹe no. Fikiere ọ tẹ ta nọ: ‘Fiki oware uyoma ona nọ who ru na, oti Neman o re ti bru owhẹ tha.’ Epanọ ma ta na, ọ tẹ nwane ze!

Eme ma rẹ sai wuhrẹ no onana kpobi tha? Orọ ọsosuọ, ma rẹ jọ wọhọ ọmọtẹ ọsese na ma vẹ tẹme kpahe Jihova. U re ru ewoma buobu. Orọ avivẹ, ma gbẹ vioma ha wọhọ epanọ Neman o ru oke ọsosuọ rekọ ma re yo ẹme idibo Ọghẹnẹ. Orọ avesa họ ma rẹ ta ọrue he, wọhọ epanọ Gehazi o ru. Kọ ma gbẹ sai wuhrẹ eware buobu no ese Ebaibol tha?