Wuhrẹ Emọ Ra

Ọ Gwọlọ Fi Obọ Họ

KỌ WHỌ ruẹ ohwo jọ nọ ọ jẹ mọ gaga no ẹdẹjọ?— Kọ o jọ owhẹ oma nọ dodokọ whọ rẹ sai ru oware jọ ro fi obọ họ kẹe?— Kọ o hae jọnọ ohwo orẹwho ofa hayo egagọ efa, whọ hae gwọlọ fi obọ họ kẹe ghele?— Oware wọhọ ikpe idu esa (3,000) nọ i kpemu, ọmọtẹ ọsese jọ nọ ọ jọ ohwo Izrẹl o ru oware utioye. Joma ta ẹme kpahe oghẹrẹ nọ o rọ via.

Evaọ oke anwae, orẹwho Izrẹl nọ ọmọtẹ na ọ jọ avọ orẹwho Siria nọ o kẹle rai a jẹ hai fi ẹmo gaga. (1 Ivie 22:1) Ẹdẹjọ nọ ahwo Siria a wọ ẹmo ziọ Izrẹl, a te mu ọmọtẹ ọsese nana. A tẹ whae lele oma kpobọ Siria, ọ tẹ jẹ jọ obei gbodibo kẹ aye Neaman, oletu ogbaẹmo Siria. Neaman o wo ekpehre ẹyao jọ nọ a re se oti, nọ o rẹ lẹliẹ iwo oma ohwo yẹ kie.

Odibo ọmọtẹ na ọ tẹ vuẹ aye Neaman epanọ ẹyao ọzae riẹ ọ sai ro kpo. Ọ ta kẹe nọ: ‘O hẹ jọnọ obọ Sameria Neaman ọ rrọ, Elaesha ọruẹaro Jihova o he siwi oti riẹ.’ Ẹhẹ, oghẹrẹ nọ odibo ọmọtẹ na ọ ta ẹme kpahe Elaesha o lẹliẹ Neaman rọwo inọ ẹsejọhọ ọruẹaro na ọ sai ti gine siwi oti riẹ. Fikiere, Neaman o te mi Bẹn-hedad ovie Siria uvẹ, kẹsena tei te idibo riẹ jọ a tẹ wọ owọ erẹ ugbothabọ nọ u te oware wọhọ emaele udhusoi (100) nyae gwọlọ Elaesha.

Nọ a te obei, a tẹ kake nyae ruẹ ovie Izrẹl nọ a re se Jehoram. A tẹ kẹe ileta nọ Bẹn-hedad ovie rai o kere kẹ ai ro sei, onọ o ta nọ jọ o fi obọ họ kẹ Neaman. Rekọ Jehoram o fi ẹrọwọ họ Jihova hayo Elaesha ọruẹaro na ha. Fikiere nọ Jehoram ọ ruẹ ileta nọ i no obọ Bẹn-hedad ze, o te je roro nọ ọ be rehọ ileta nana si ẹmo ze. Nọ Elaesha o yo kpahe onana, ọ tẹ ta kẹ Jehoram ovie na nọ: “Jọ ọ nya bru omẹ ze.” Elaesha ọ gwọlọ dhesẹ via inọ Ọghẹnẹ o wo ogaga nọ o re ro siwi ẹyao Neaman.—2 Ivie 5:1-8.

Nọ Neaman avọ enyenya gbe ekẹkẹ riẹ a te uwou Elaesha, Elaesha o te vi odibo riẹ bru ei inọ: ‘Nyae họ isiahrẹ eva ethẹ Jọdan, ẹyao ra o ti kpo.’ Eva e dha Neaman. O je roro nọ Elaesha o ti no uwou ze, ọ vẹ te robọ kpahe iẹe re ẹyao na ọ ruẹsi kpo. Ukpoye kọ odibo riẹ ọvo ọ ruẹ! Fikiere Neaman o te ku oma rẹriẹ bi zihe kpo avọ ofu.—2 Ivie 5:9-12.

Eme whọ hai ti ru o hẹ jọnọ whẹ yọ omọvo idibo Neaman?— Whaọ, idibo riẹ a nọ riẹ nọ: ‘Otẹrọnọ oware ulogbo jọ Elaesha ọ ta nọ who ru na, kọ who gbe he ru ei? Kinọ ọ jẹ ta nọ whọ nyae họ ọvo re whọ fo na, kọ whọ gbẹ nya?’ Neaman ọ tẹ gaviezọ ẹme rai. Ọ tẹ ‘nyai duwu oma riẹ họ ame asiahrẹ eva ethẹ Jọdan, . . . oma riẹ o tẹ wariẹ wọhọ oma ọmọfofa.’

Neaman o te zihe bru Elaesha jẹ ta kẹe nọ: “Ri, mẹ riẹ no nọ Ọghẹnẹ ọfa ọ rọ eva akpọ na soso vi Ọghẹnẹ Izrẹl he.” Ọ tẹ ya eyaa kẹ Elaesha nọ o ti gbe “dhidhe emahọ, hayo idhe efa kẹ ẹdhọ họ rekọ rọ kẹ ỌNOWO na.”—2 Ivie 5:13-17.

Kọ whọ gwọlọ fi obọ họ kẹ ohwo jọ wuhrẹ kpahe Jihova gbe eware igbunu nọ ọ rẹ sai ru wọhọ epanọ ọmọtẹ ọsese na o ru na?— Okenọ Jesu ọ jọ otọakpọ, ọzae jọ nọ o wo ẹyao oti o fi ẹrọwọ họ iẹe, ọ ta nọ: ‘O tẹ ruọ owhẹ, whọ sai gine fi obọ họ kẹ omẹ.’ Kọ whọ riẹ uyo nọ Jesu ọ kpahe kẹe?— Ọ ta nọ: “Oruomẹ.” Jesu o siwi ẹyao riẹ wọhọ epanọ Jihova o siwi ẹyao Neaman na.—Matiu 8:2, 3.

Kọ whọ riẹ kpahe akpọ ọkpokpọ nọ Jihova ọ te rọ ze nọ uvumọ ohwo ọ te jọ mọ họ, nọ a te jọ rria bẹdẹ bẹdẹ na?— (2 Pita 3:13; Eviavia 21:3, 4) O tẹ rrọ ere, kiyọ whọ rẹ vuẹ amọfa kpahe eware igbunu nana!

Enọ:

○ Ẹvẹ ọmọtẹ ọsese jọ nọ ahwo orẹwho Neaman a mu o ro fi obọ họ kẹ Neaman?

○ Fikieme Neaman ọ gbẹ jẹ rọ kake rọwo ru lele epanọ Elaesha ọ ta ha, rekọ eme o ru rie nwene iroro?

○ Eme u fo nọ who re gine ru evaọ aruorokele ọmọtẹ ọsese nana?

○ Eme o ruọ Jesu nọ o re ru, kọ eme o ru nọ uzuazọ u ti ro woma gaga evaọ akpọ ọkpokpọ Ọghẹnẹ?