Ọgbaẹmo na avọ Ọmọtẹ Ọsese Na

Ọmọtẹ ọsese Izrẹl jọ ọ jẹ rria ẹwho jọ nọ a re se Siria, rekọ ẹwho nana o thabọ gaga no uwou riẹ. Egbaẹmo Siria a mu rie kpohọ igbo siọ ahwo uviuwou riẹ ba, yọ enẹna ọ be gbodibo kẹ aye oletu ogbaẹmo ahwo Siria nọ a re se Neaman. Ọmọtẹ ọsese na ọ jẹ gọ Jihova, dede nọ ahwo nọ ọ jẹ rria kugbe a jẹ gọ Jihova ha.

Neaman o wo ẹyao jọ nọ a re se oti, yọ ẹyao na ọ jẹ kẹe uye gaga. Ọmọtẹ ọsese na ọ gwọlọ nọ o re fiobọhọ kẹe. Ọ tẹ ta kẹ aye Neaman nọ: ‘Mẹ riẹ ohwo jọ nọ ọ rẹ sai siwi ẹyao ọzae ra na. Evaọ obọ Izrẹl, Jihova o wo ọruẹaro jọ nọ a re se Elaesha. Ọ sai siwi ẹyao ọzae ra.’

Aye Neaman ọ tẹ vuẹ ọzae riẹ ẹme nọ ọmọtẹ ọsese na ọ ta kẹe na. Fikinọ Neaman ọ gwọlọ nọ ẹyao riẹ na o kpo, ọ tẹ nyabru Elaesha evaọ obọ Izrẹl. Neaman o je roro nọ Elaesha o ti dede iei rehọ wọhọ okpohwo. Ukpenọ Elaesha ọvo ọ nyabru Neaman ze, o te vi odibo riẹ bru Neaman re ọ vuẹe oware nọ o re ru. Odibo Elaesha ọ tẹ ta kẹ Neaman nọ: ‘Nyae họ isiahrẹ evaọ ethẹ Jọdan na, ẹyao ra o ti kpo.’

Onana o lẹliẹ eva were Neaman vievie he. Ọ tẹ ta nọ: ‘Me je roro nọ ọruẹaro nana o ti se odẹ Ọghẹnẹ riẹ, yọ o bi veghe obọ riẹ kpemu kparo evaọ ehru oti na re o siwi ei. Ukpoye ọ tẹ ta nọ mẹ nyae họ evaọ ethẹ Izrẹl jọ. Ma wo ithẹ nọ i woma vi ọnana evaọ obọ Siria. Kọ mẹ gbẹ sae jarae họ?’ Eva e tẹ dha Neaman gaga, o te muofu no uwou Elaesha.

Rekọ idibo Neaman a tẹ ta kẹe nọ o roro oware na te ziezi. A ta kẹe nọ: ‘Kọ who gbe ru oware kpobi nọ ọ vuẹ owhẹ re ẹyao ra o kpo? Oware olọlọhọ gheghe ọruẹaro na ọ vuẹ owhẹ na. Kọ who gbe ru ei ghele?’ Neaman ọ tẹ gaviezọ kẹ idibo riẹ. O te kpobọ ethẹ Jọdan nyai duwu oma họ ame isiahrẹ. Nọ Neaman o duwu oma họ ame orọ avọ isiahrẹ, ẹyao riẹ o te kpo. Eva e tẹ were iẹe gaga, ọ tẹ nyai yere Elaesha. Neaman ọ tẹ ta nọ: ‘Obọnana mẹ riẹ no nọ Jihova họ Ọghẹnẹ uzẹme na.’ Ẹvẹ who roro nọ o jọ ọmọtẹ ọsese Izrẹl na oma, nọ ọ ruẹ Neaman nọ o zihe ze avọ ẹyao riẹ nọ o kpo no?