Arọwo Kigwẹ Te Otọ Họ

KỌ WHỌ kareghẹhọ nọ who yo kpahe emoha esa enana? E, a yehọ egbẹnyusu Daniẹl nọ e se nọ eware nọ iwoma kae he a rẹ riae he. Ahwo Babilọn a se rai nọ Shedrak, Mishak gbe Abẹdinigo. Rekọ rri rae enẹna. Fikieme a gbe kigwẹ kẹ uwoho ulogbo onana ha wọhọ kohwo kohwo? J’oma kiẹ via.

Kọ whọ kareghẹhọ izi nọ Jihova oma riẹ okere nọ a re se Izi Ikpe na? Orọ ọsosuọ enana họ: ‘Whọ rẹ gọ eghẹnẹ efa evue-vo ho rekọ mẹ ọvo.’ Emoha nọ erọ etenẹ na uzi onana a bi koko na, dede nọ orọ oware nọ olọhọ eruo ho.

Nebukadneza, ovie Babilọn, o se ahwo ilogbo buobu re a rehọ ọghọ kẹ uwoho onana nọ ọ rehọ vi na. Ọ nwani ku ẹme ọ ta kẹ ahwo na kpobi họ no: ‘Okenọ wha te yo edo egba, ekpata gbe ekwakwa efa nọ a re kporo, wha ve kigwẹ te otọ gọ uwoho oro onana. Kohwo kohwo nọ okigwẹ te otọ re ọ gọ họ a re gbolie fihọ egidi errae ọroro na ababọ oke oraha.’

Okenọ Nebukadneza o yo nọ Shedrak, Mishak gbe Abẹdinigo a kigwẹ hẹ, eva e tẹ dhae gaga. Ọ tẹ rehae ze. Ọ tẹ kae uvẹ ofa re a kigwẹ te otọ. Rekọ emoha na a fievahọ Jihova. ‘Ọghẹnẹ mai nọ ma rẹ gọ ọ rẹ sai siwi omai,’ ere a ta kẹ Nebukadneza. ‘Rekọ o tẹ ma ke rọ nọ o siwi omai hi, ma rẹ sai kigwẹ kẹ uwoho oro ra ha.’

Nọ Nebukadneza o yo onana, eva e tẹ dhae gavi ere. Egidi errae ọkẹle etẹ ọ tẹ kẹ uzi nọ: ‘Wha gidi errae na họ re erehọ isiahrẹ roro gavi epanọ ejọ vẹre!’ Kẹsena ọ tẹ ta kẹ ezae nọ emae ga evaọ ogbaẹmo riẹ re a gba Shedrak, Mishak gbe Abẹdinigo re agbolai fihọ egidi errae na. Epanọ egidi errae na ọroro ga thesiwa ẹroro errae na o te kpe ezae egaga na. Rekọ ẹvẹ ojọ kẹ emoha esa na enọ a gbolo fihọ eva na?

Ovie na o te ri kpohọ egidi errae na, ozọ u te mue’i gaga. O te muhọ ẹnọ, ‘Ogbẹrọnọ imasa ma gba gbolo fihọ egidi errae ọroro na?’

‘E, ere ma ru,’ ere idibo riẹ ayo.

‘Rekọ mẹ ruẹ ezae ene nọ e be nya wariẹ họ evaọ errae na,’ ere ọ tae. ‘A gba rae he, yọ errae na e be nwa’e oma gbe he. Yọ ọrọ avene ọwọhọ ọghẹnẹ.’ Ovie na o te bi kẹle unuẹthẹ egidi errae na o te bo via: ‘Shedrak! Mishak! Abẹdinigo! Wha nya via, whai idibo Ọghẹnẹ nọ Ọmai Kpehru!’

Okenọ a nyaze, kohwo kohwo ọ tẹ ruẹ nọ anwa oma ha. Koyehọ ovie na ọ tẹ ta nọ: ‘Ajọ ajiri Ọghẹnẹ Shedrak, Mishak gbe Abẹdinigo! Ovi ukọ-odhiwu riẹ zi siwai keme arọwo kigwẹ te otọ re a gọ ọghẹnẹ ọvuọvo ho ajokpa ọrobọ rai ọvo.’

Kọ onana ogbẹrọ uvi oriruo ẹrọwọ o wo kẹ Jihova rọ k’omai nọ ma re lele?