A Rọwo Kigwẹ Guzou Kpotọ Họ

Okenọ Nebukadneza ọ rọ wezẹ ewezẹ kpahe ẹmema ologbo na o vrẹ no, Nebukadneza ọ tẹ ma ẹmema igoru ologbo jọ. Ọ tẹ rọ ẹmema na vi oria nọ a re se Dura, kẹsena o te se ahwo nọ a mai wuzou evaọ Babilọn soso kokohọ, yọ o se Shedrak, Mishak, gbe Abẹdnigo re. Ovie na o te juzi nọ: ‘Nọ wha te yo edo enware, ekpata-ifi, gbe irete-ẹkpa na, wha ve kigwẹ kẹ ẹmema igoru na! Ohwo kpobi nọ o kigwẹ hẹ, a ti gbolo iei fihọ uwou-erae nọ ebruerae ọ rrọ.’ Kọ emezae Hibru esa nana a ti guzou kpotọ kẹ ẹmema na manikọ Jihova ọvo a te gọ?

Ovie na ọ tẹ ta nọ a kporo ile na. Ahwo na kpobi a te kigwẹ, a tẹ gọ ẹmema na, rekọ Shedrak, Mishak, gbe Abẹdnigo a rọwo kigwẹ hẹ. Ezae jọ nọ i muẹrohọ ae, a tẹ ta kẹ ovie na nọ: ‘Emezae Hibru esa nana a rọwo gọ ẹmema ra na ha.’ Nebukadneza o te se ai, ọ tẹ ta kẹ ai nọ: Mẹ be kẹ owhai uvẹ ofa nọ wha rẹ rọ gọ ẹmema na. Rekọ wha gbe ru ere he, me ti gbolo owhai fihọ uwou-erae nọ ebruerae ọ rrọ na. U wo ọghẹnẹ ọvuọvo nọ ọ te sai siwi owhai no abọ mẹ hẹ.’ A tẹ ta kẹe nọ: ‘Whọ tẹ make kẹ omai uvẹ ofa dede, ma te gọ ẹmema na ha. Ọghẹnẹ mai ọ rẹ sai siwi omai. Rekọ ọ gbẹ maki siwi omai hi, O ovie, ma te gọ ẹmema ra na ha.’

Eva e tẹ dha Nebukadneza gaga. Ọ tẹ ta kẹ ahwo riẹ nọ: ‘Wha ru ẹrrorro erae na ga vi epanọ o rẹ jọ vẹre isiahrẹ!’ Ọ tẹ ta kẹ isoja riẹ nọ: ‘Wha gba ezae nana re wha gbolo ai fihọ erae na!’ Nọ a je gbolo ezae Hibru esa na fihọ erae na, eri erae na ọ ga te epanọ o ro kpe isoja na no. Rekọ nọ Nebukadneza o rri eva erae na, ọ tẹ ruẹ imane nọ e be nya evaọ erae na. Ozọ u te mu ei gaga, ọ tẹ nọ iletu riẹ nọ: ‘Kọ ogbẹrọnọ ezae esa ma gbolo fihọ erae na? Rekọ mẹ be ruẹ ezae ene, yọ ọrọ avọ ene na ọ wọhọ ukọ-odhiwu!’

Nebukadneza ọ tẹ nya kẹle erae na, o te bo se ai nọ: ‘Wha nya lahwe, whai idibo Ọghẹnẹ nọ Ọ Mai kpehru na!’ Nọ ahwo a ruẹ Shedrak, Mishak, gbe Abẹdnigo nọ a nya no evaọ erae na ze yọ oware ovo o via kẹ ai hi, akpọ o te gbe ai unu. Makọ omarai, eto rai, gbe iwu rai dede, e to ho, yọ a gbore iwiri gbe he.

Nebukadneza ọ tẹ ta nọ: ‘Ọghẹnẹ Shedrak, Mishak, gbe Abẹdnigo ọ rrọ ruaro. O vi ukọ-odhiwu riẹ ze ti siwi ai. U wo ọghẹnẹ ọvuọvo nọ ọ wọhọ e riẹ hẹ.’

Wọhọ emezae Hibru esa na, kọ whọ gba riẹ mu nọ who re yoẹme kẹ Jihova makinọ uye u re noi ze?