Uzou Avọ 9

Uzuazọ Uviuwou Jesu Evaọ Oke Emaha

OKENỌ Jesu ọ be rro ze evaọ Nazarẹt na, o rọ ẹwho ọsese, nọ o viodẹ hẹ. A fa riẹ fihọ ẹkuotọ igbehru ọ oria nọ a re se Galili, onọ u thabọ no Ukiekpotọ Jẹzrẹl owowoma na ha.

Nọ Josẹf avọ Meri a rehọ Jesu no Ijipti ziọ etenẹ, ẹsejọhọ yọ ọ kpako te ikpe ivẹ no, o wọhọ nọ ọye ọvo họ ọmọ nọ Meri o wo. Rekọ u kri hi. A te yẹ Jemis, Josẹf, Saimọn, gbe Judas, yọ Meri avọ Josẹf a yẹ emetẹ re. O tẹ kawo, Jesu o te ti wo inievo emezae gbe emetẹ ezeza.

Jesu o wo imoni efa re. Ma riẹ kpahe omoni ọkpako riẹ no Jọn, ọnọ ọ be rria emaele buobu no Judia. Rekọ ọnọ ọ be rria kẹle Galili họ Salomi, ọnọ o wọhọ nọ ọ rọ oniọvo-ọmọtẹ Meri. Zẹbẹdi ọ rọo Salomi, fikiere emezae ivẹ rai, Jemis avọ Jọn, a rọ emọ oniọvo oni Jesu. Ma riẹ hẹ sọ, okenọ Jesu ọ jẹ rro ọ raha oke buobu kugbe emezae enana, rekọ uwhremu na a te zihe ruọ egbẹnyusu ekpekpe riẹ.

Josẹf o re ruiruo gaga re ọ sae ko uviuwou riẹ nọ u bi vihọ na. Ọwena ọ rọ. Josẹf ọ yọrọ Jesu wọhọ ọmọ obọ riẹ, fikiere a te je se Jesu “ọmọ ọwena na.” Josẹf o te je wuhrẹ Jesu re ọ jọ ọwena, yọ o wuhrẹ i riẹ ziezi. Fikioye jabọ ahwo a jẹ ta kpahe Jesu wọhọ, “Ọnana họ ọwena na.”

Uzuazọ uviuwou Josẹf o wariẹ egagọ Jihova Ọghẹnẹ họ. Nya lele Uzi Ọghẹnẹ, Josẹf avọ Meri a kẹ emọ rai ewuhrẹ abọ-ẹzi ‘nọ a tẹ keria uwou, nọ a tẹ rọ edhere be nya, nọ a te kiẹzẹ, gbe nọ a tẹ kparoma no.’ Uwou-egagọ jọ o jọ evaọ Nazarẹt, yọ o rẹ sai mu omai ẹro nọ Josẹf ọ jẹ hae rehọ uviuwou riẹ kpohọ etẹe kẹ egagọ ẹsikpobi. Rekọ ababọ avro a jẹ ruẹ omawere ulogbo evaọ erẹ rai kpohọ etẹmpol Jihova kẹse kẹse evaọ obọ Jerusalẹm. Matiu 13:55, 56; 27:56; Mak 15:40; 6:3; Iziewariẹ 6:6-9.

▪ O tẹ kawo bro inievo emezae gbe emetẹ Jesu o wo, kọ didi edẹ ejọ rai?

▪ Amono họ imoni esa Jesu nọ e viodẹ?

▪ Didi iruo Jesu o ti wuhrẹ uwhremu na, kọ fikieme?

▪ Didi uwuhrẹ nọ u wuzou Josẹf ọ rọ kẹ uviuwou riẹ?