Uzou Avọ 27
Use Matiu
NỌ Ọ nwani siwi ọzae nọ okie o kie na no, Jesu o te no Kapaniọm kpohọ Abade Galili. Ogbotu ahwo a tẹ wariẹ lele iei, o te mu ai họ ewuhrẹ. Nọ ọ jẹ nya edhere na vrẹ, ọ tẹ ruẹ Matiu, ọnọ a re je se Livai, nọ ọ keria uwou azọhọ-omio. Jesu o te ziziei nọ: “Lele omẹ.”
O sae jọ nọ Matiu ọ riẹ kpahe iwuhrẹ Jesu no vẹre, nwane wọhọ epanọ Pita, Andru, Jemis, avọ Jọn a riẹ no evaọ okenọ o se ai. Yọ wọhọ e rae, Matiu ọ tẹ kuyo vẹrẹ vẹrẹ kẹ uzizie na. Ọ tẹ kparoma, nyasiọ iruo riẹ ba wọhọ omiazọhọ, o te lele Jesu.
Uwhremu na, ẹsejọhọ re o ru ehaa kẹ use riẹ, Matiu o te se ehaa ilogbo evaọ uwou riẹ. Kugbe Jesu avọ ilele Riẹ, egbẹnyusu Matiu vẹre e jariẹ. Ahwo Ju edekọ a re gbolo aro kẹ ezae enana keme a bi mi azọhọ kẹ udu-esuo Rom nọ a mukpahe gaga na. Ofariẹ, a be rehọ iwhayo mi ahwo na igho vi unu nọ azọhọ na o gwọlọ.
Nọ a muẹrohọ Jesu evaọ ehaa na kugbe oghẹrẹ ahwo enana, otu Farisi na a tẹ nọ ilele riẹ nọ: “Fikieme owuhrẹ rai avọ imiazọhọ gbe erahaizi a jẹ gbẹ be re emu?” Nọ onọ na u fi ruẹe ozọ, Jesu o te yo kẹ otu Farisi na nọ: “Enọ oma o gae a [rẹ] guọlọ ọbo ho, rekọ enọ e rẹ mọ ọvo. Wha nya kpo wha wuhrẹ otọ onana, ‘Mẹ guọlọ ohrọ orọnọ iwẹ hẹ.’ Keme mẹ ze ti se ikiẹrẹe he, rekọ erahaizi.”
U re vevẹ, Matiu o zizie imiazọhọ enana ziọ uwou riẹ re a sae gaviezọ kẹ Jesu re a je wo usiwo abọ-ẹzi. Fikiere Jesu ọ be nyusu kugbe ai re a sai wo obufihọ je te usu uwoma kugbe Ọghẹnẹ. Jesu o re gbolo aro kẹ ahwo itieye he, wọhọ epanọ otu Farisi nọ a roro nọ a kiẹrẹe na a re ru. Ukpoye, avọ ohrọoriọ ọ tẹ wọhọ ọbo abọ-ẹzi rọ kẹ ai.
Fikiere ohrọ nọ Jesu o dhesẹ kẹ erahaizi orọnikọ ọ be jẹ izieraha rai rehọ họ rekọ o bi dhesẹ ọdawẹ ọvo na nọ o wo kẹ ahwo nọ e be mọ ẹyao. Wọhọ oriruo, kareghẹhọ okenọ ọ rehọ ohrọ riobọ te ọmoti na, ta nọ: “Oruomẹ; whọ rẹ fua.” Joma dhesẹ ohrọ ẹkwoma obufihọ kẹ ahwo nọ a wo ẹgwọlọ, maero obufihọ abọ-ẹzi nọ ma rẹ kẹ ai. Matiu 8:3; 9:9-13; Mak 2:13-17; Luk 5:27-32.
▪ Diẹse Matiu ọ jọ okenọ Jesu o sei?
▪ Eme họ akiruo Matiu, kọ fikieme ahwo Ju edekọ a je gbolo aro kẹ ezae itieye na?
▪ Didi inoma a gu kpahe Jesu, kọ didi uyo ọ kẹ?
▪ Fikieme Jesu ọ jẹ rọ nya usu kugbe erahaizi?