Uzou Avọ 85

Ẹgwọlọ Ọnọ O Vru No

ORỌ Jesu oja gaga re ọ gwọlọ jẹ ruẹ enọ e te roma kpotọ gọ Ọghẹnẹ. Fikiere ọ tẹ jẹ gwọlọ t’ẹme kẹ ohwo kpobi nọ ọ ruẹ kpahe Uvie na, kugbe erahaizi nọ e viodẹ. Oghẹrẹ ahwo itieye na a te bi kẹle re a gaviezọ kẹe.

Nọ a muẹrohọ onana, otu Farisi gbe ikere-ebe na a tẹ be poviẹ Jesu inọ ọ be nyusu kugbe ahwo nọ a rri fihọ tọtọtọ. A jẹ go nọ: “Ohwo ọnana ọ rehọ erahaizi o te [bi] lele ai re-emu.” Ẹvẹ a rri onana kpotọ vi ọghọ rai te! Otu Farisi gbe ikere-ebe na a re ru imiwhrori na wọhọ ovu nọ ọ rọ otọ awọ rai. Evaọ uzẹme, a rẹ rehọ ubiẹme ahwo Hibru na ‛am ha·’aʹrets, “ahwo otọ [otọakpọ] na,” ro dhesẹ oghẹrẹ nọ a rri ahwo nana tọtọ te.

Evaọ abọdekọ riẹ, Jesu ọ rehọ ọghọ kẹ ohwo kpobi, avọ ẹwo, gbe ohrọ. Fikiere, oma o tẹ jẹ kpakpa imiwhrori enana buobu, kugbe ahwo nọ a riẹ nọ a bi ru eyoma gaga, re a gaviezọ kẹe. Rekọ ẹvẹ ẹpoviẹ nọ otu Farisi na a be poviẹ Jesu fikinọ ọ be daoma kẹ ahwo nọ a rri tọtọtọ na o rọ?

Jesu ọ kuyo kẹ unoma rai ẹkwoma ọtadhesẹ jọ. Ọ rehọ iroro otu Farisi na t’ẹme, wọhọ epaọ ẹsenọ a kiẹrẹe a te je wo ufuoma evaọ uthuru Ọghẹnẹ, yọ ahwo etọtọ nọ a bi se ‛am ha·’aʹrets na a ghoro vru no. Gaviezọ nọ ọ nọ nọ:

“Whai ọvẹ o re wo udhe igodẹ usoi, re ọvo jọ o te vru, kọ ọ gbẹ se udhe one gbe kpogbizi na ba eva ẹwọ, re ọ nya e guọlọ ọnọ o vru na bẹsenọ ọ rẹ rue riẹ? Nọ ọ rue riẹ, ọ vẹ wọe wha ẹkoko riẹ, ọ vẹ ghọghọ. Nọ o kpozi obọ uwou o re se ezọ gbe ahwo ogbe riẹ, ọ vẹ ta kẹ ae nọ, ‘Wha lele omẹ ghọghọ, keme mẹ ruẹ ogodẹ mẹ nọ o vru na no.’ ”

Jesu ọ tẹ fotọ iku riẹ, ta nọ: “Mẹ ta kẹ owhai nọ, Ere a rẹ ghọghọ obọ odhiwu fiki ọrahaizi ọvo nọ o kurẹriẹ, vi nọ a ghọghọ fiki udhe one gbe ikpogbizi ikiẹrẹe, e nọ i wo eva-ikurẹriẹ hẹ.”

Otu Farisi na a rri oma rai kiẹrẹe fikiere a du wo ẹgwọlọ ekurẹriẹ hẹ. Okenọ otu rai jọ a poviẹ Jesu ikpe jọ nọ i kpemu no fikinọ ọ be re emu kugbe imiazọhọ gbe erahaizi, ọ tẹ ta kẹ ai nọ: “Keme mẹ ze ti se ikiẹrẹe he, rekọ erahaizi.” Otu Farisi nọ a jọ ẹro obọ rai kiẹrẹe na, enọ e rọwo nọ a du wo ẹgwọlọ ekurẹriẹ hẹ na, a be wha oghọghọ te odhiwu hu. Rekọ erahaizi nọ i ghine kurẹriẹ e rẹ wha oghọghọ te odhiwu.

Re o ru ei ga viere inọ ezihetha erahaizi nọ i vru o rẹ wha oghọghọ ulogbo ze, Jesu ọ tẹ fodẹ ọtadhesẹ ọfa jọ. Ọ ta nọ: “Didi aye o re wo idọlọ-efuafo ikpe, nọ ọvo jọ o te vru, kọ o gbe tu ukpẹ, o hwere uwou, ọ guọlọ iẹe ẹrera bẹsenọ ọ rẹ rue riẹ [hẹ]? Nọ ọ rue riẹ o ve se ezọ gbe ahwo ogbe riẹ ọ vẹ ta nọ, ‘Wha lele omẹ ghọghọ, keme mẹ ruẹ onọ u vru na no.’ ”

Jesu ọ tẹ jẹ fotọ riẹ epọvo na. Ọ tẹ gbẹ nyaharo ta nọ: “Ere oghọghọ o rẹ jọ aro ikọ Ọghẹnẹ fiki ọrahaizi ọvo nọ o kurẹriẹ.”

Ẹvẹ ọdawẹ oyoyou enjẹle Ọghẹnẹ enana kẹ erahaizi nọ i vru vẹre o gbunu te! Onana o mae rọ ere keme imiwhrori enana, etọtọ nọ a bi se ‛am ha·’aʹrets na a ve ti wo abọ evaọ Uvie Ọghẹnẹ obọ odhiwu. Fikiere, a vẹ te jọ obọ odhiwu wo ọkwa nọ o kpehru vi orọ enjẹle na omarai! Rekọ ukpenọ a re ihri hayo roro nọ a rri rai vo, enjẹle omarokpotọ enana a wo ovuhumuo inọ ahwo-akpọ erahaizi enana a rẹriẹ ovao ku je thihakọ iyero evaọ uzuazọ no onọ u ti ru ai te kẹ iruo ivie gbe izerẹ obọ odhiwu enọ i wo ọdawẹ gbe ohrọ. Luk 15:1-10; Matiu 9:13; 1 Ahwo Kọrint 6:2, 3; Eviavia 20:6.

▪ Fikieme Jesu ọ jẹ rọ nyusu kugbe erahaizi nọ a riẹ, kọ didi ẹpoviẹ u no obọ otu Farisi na ze?

▪ Ẹvẹ otu Farisi na a rri imiwhrori na fihọ?

▪ Didi ọtadhesẹ Jesu o fihọ iruo, kọ eme ma sai wuhrẹ no oyena ze?

▪ Fikieme oghọghọ enjẹle na o jẹ rọ oware igbunu?