Uzou Avọ 41

Ehri Avro

U KRI hi nọ a ghọe no eva uwou Saimọn, Jesu o te muọ erẹ usiuwoma ota avivẹ Galili riẹ họ. Evaọ erẹ ọsosuọ riẹ kpohọ ẹkwotọ na, ilele ọsosuọ riẹ i lele i rie, Pita, Andru, Jemis, gbe Jọn. Rekọ enẹna ikọ 12 na jegbe eyae jọ, a bi lele iei. Enana họ Meri Magdalini, Suzana, gbe Joana, ọnọ ọzae riẹ ọ rọ olori isoja ọ Herọd Ovie na.

Nọ iruo odibọgba Jesu e be kẹre na, ere avro kpahe iruẹru riẹ ọ be kẹre re. Ọzae jọ nọ idhivẹri e rọ oma, ọnọ o tuaro je dienu, a tẹ wọe bru Jesu ze. Nọ Jesu o siwi ei no, nọ o no otọ ekpokpo idhivẹri na no yọ ọ be t’ẹme jẹ ruẹ ude, u te gbe ogbotu na unu. A te muhọ ẹta nọ: ‘Thakpinọ Ọmọ Devidi na ọna ha?’

Ogbotu ahwo a te kokohọ uwou nọ Jesu ọ rọ na te epanọ tei te ilele riẹ a gbẹ be sae tubẹ riemu hu. Kugbe ahwo nọ a bi roro nọ ẹsejọhọ ọye họ “Ọmọ Devidi” nọ a yaa na, ikere-ebe gbe ahwo Farisi a riẹ enọ i no ugbobọ Jerusalẹm ze re a ru ei oma vo. Nọ imoni Jesu a yo kpahe ẹvohẹ nọ ọ wariẹ Jesu họ, a tẹ nyaze re a kru rie kpo. Fikieme?

Whaọ, makọ inievo Jesu jọ a te rọwo inọ Ọmọ Ọghẹnẹ ọ rọ họ. Ofariẹ, ẹvohẹ gbe ozighi nọ ọ wha ze no o hẹriẹ oma gaga no Jesu nọ a riẹ ọnọ ọ jẹ rro evaọ Nazarẹt na. Fikiere, a rọwo inọ oware jọ o jọ uzou Jesu thọ no. “Ọ be mọ oruẹ,” ere a ro kuei họ, a tẹ jẹ gwọlọ epanọ a re ro muei re a rehọ iẹe vrẹ.

Ghele na imuẹro na e rọ vevẹ inọ Jesu o siwi ọzae nọ o wo idhivẹri na. Otu ikere-ebe gbe ahwo Farisi na a riẹ nọ a sae vro uzẹme ọ oware onana ha. Fikiere re a ru Jesu oma vo a tẹ ta kẹ ahwo na nọ: “Ohwo ọnana o bi le izi-igbegbe no fiki [Beelzebọb] olori izi-igbegbe.”

Nọ ọ riẹ iroro rai, Jesu o te se ikere-ebe na gbe otu Farisi na ze ọ tẹ ta nọ: “Kuvie kuvie nọ o ghale oma riẹ, o rẹ te raha; kẹwho kẹwho hayo uwou nọ o ghale oma riẹ u re dikihẹ hẹ; re Setan o te le Setan no, yọ ọ ghale oma riẹ, kẹvẹ uvie riẹ u reti ro dikihẹ?”

Ẹvẹ iroro egbagba enana i fo te! Nọ otu Farisi a ta nọ ahwo rai jọ a le idhivẹri no, Jesu ọ tẹ jẹ nọ nọ: ‘Otẹrọnọ ẹkwoma Beelzebọb me ro le izi-igbegbe na no, kọ ẹkwoma ono emọ rai i bi ro le ai no?’ Koyehọ, ota nọ a be bọwo Jesu na u kie kpahe ai re. Fikiere Jesu ọ tẹ vẹvẹ unu nọ: ‘Rekọ otẹrọnọ ẹkwoma ẹzi Ọghẹnẹ me ro le izi-igbegbe na no, kiyọ uvie Ọghẹnẹ u kie owhai thọ no.’

Re o dhesẹ nọ esino idhivẹri na yọ odhesẹvia ogaga riẹ vi Setan, Jesu ọ tẹ ta nọ: “Ẹvẹ ohwo ọ rẹ ruọ uwou ọgba ọ kua eware riẹ, ogbẹrọnọ ọ rẹ kake gba ọgba na tao ho? Kẹsena ọ tẹ kua uwou riẹ. Ọnọ o kuomagbe omẹ hẹ, ọ rọ suọ omẹ, ọnọ o koko kugbe omẹ hẹ, ọ vaha.” O rọ vevẹ inọ ahwo Farisi na a rọ suọ Jesu, bi dhesẹ oma rai via wọhọ ahwo nọ Setan o vi. A be vaha emọ Izrẹl siẹe ba.

Fikiere, Jesu ọ tẹ vẹvẹ otu ewọsuọ Setan enana unu inọ “emeaghọ nọ a ta kpahe Ẹzi a rẹ te rehọ ae vrẹ hẹ.” O ru rie vevẹ nọ: “Ọnọ ọ ta ẹme oyoma kpahe Ọmọ ohwo a rẹ te rehọ iẹ vrẹe; rekọ ọnọ ọ ta ẹme oyoma kpahe Ẹzi Ẹri a rẹte rehọ iẹ vrẹe he, makọ eva akpọ nana, hayo ọ nọ ọ be tha.” Otu ikere-ebe gbe ahwo Farisi eyena a thọ uzi oyena nọ a rẹ rọ vrẹ hẹ na no fikinọ oware uvevẹ nọ a rehọ ẹzi ọfuafo Ọghẹnẹ ru a bi kpeze iei se Setan. Matiu 12:22-32; Mak 3:19-30; Luk 8:1-3; Jọn 7:5.

▪ Ẹvẹ erẹ usiuwoma ota avivẹ Jesu evaọ Galili u ro wo ohẹriẹ no orọ ọsosuọ?

▪ Fikieme imoni Jesu a rọ gwọlọ mu ei?

▪ Ẹvẹ ahwo Farisi a jẹ rọ gwọlọ daoma wha omovuọ fihọ eware igbunu Jesu, kọ ẹvẹ Jesu o ro dhesẹ ai họ eterue?

▪ Didi uzi ahwo Farisi eyena a thọ, kọ fikieme?