Uzou Avọ 57

Ohrọoriọ kẹ Enọ E be Ruẹ-Uye

NỌ Ọ whọku otu Farisi na kẹ iruemu oriobọ rai no, Jesu avọ ilele riẹ a tẹ nyavrẹ. Whọ rẹ sae kareghẹhọ nọ, vẹre, omodawọ riẹ re o sioma no ai re o serihọ omojọ u brudhe okenọ ogbotu na a duku ei. Enẹna, avọ ilele riẹ, o te kpohọ ofẹ Taya gbe Saidọn, ikilomita buobu kpohọ obọ ẹkpẹlobọ-ọre. O wọhọ nọ onana ovo họ erẹ nọ Jesu avọ ilele riẹ a nya vrẹ iwhru Izrẹl.

Nọ a ruẹ uwou nọ a re wohọ no, Jesu ọ tẹ jẹ ae riẹ inọ ọ gwọlọ nọ ohwo ọvo ọ riẹ oria nọ a rọ họ. Ghele na, makọ evaọ ẹkwotọ ọnana nọ o rọ ẹkwotọ emọ Izrẹl he na, ọ sae kuomadhere he. Aye Grik jọ, ọnọ a yẹ evaọ Fonisia ọrọ Siria, ọ tẹ rue riẹ o te muhọ ẹlẹ nọ: “Olori, whẹ Ọmọ Devidi; ohrọ mẹ o re owhẹ ukumuomu o be lahiẹ ọmọtẹ mẹ gaga.” Ghele na, Jesu ọ kpọ riẹ unu hu.

Uwhremu na, ilele na a tẹ ta kẹ Jesu nọ: “Vi ei vrẹ, keme o bi bo lele omai.” Nọ ọ fodẹ oware nọ o ro vu ei wa, Jesu ọ tẹ ta nọ: “Igodẹ nọ ivru eva uwou Izrẹl ọvo a vi omẹ bru ze.”

Ghele na, o bẹ aye na ha. O te bikẹle Jesu o te digwẹ fihọ aro riẹ. Ọ tẹ lẹ nọ: ‘Olori, fiobọhọ k’omẹ!’

Ẹvẹ olẹ aye na u duobọ te Jesu udu te! Ghele na, ọ tẹ wariẹ riobọ kpohọ owha-iruo ọsosuọ riẹ, re ọ gbodibo kẹ ahwo Ọghẹnẹ Izrẹl. Eva okiọvo na, ẹsejọhọ re ọ dawo ẹrọwọ aye na, ọ tẹ fodẹ omohẹriẹ ahwo Ju kẹ ahwo erẹwho efa, vro nọ: “U fo re a rehọ ebrẹdi emaha na fi kẹ [emọ] erakọ họ.”

Eva urru ohrọoriọ nọ ọ rọ t’ẹme na gbe ẹghariẹ ova riẹ, Jesu o te ghine dhesẹ ọdawẹ nọ o wo kẹ ahwo nọ e rọ ahwo Ju hu. O tube ru Ahwo-Egedhọ nọ a ro dhesẹ erakọ na lọlọhọ okenọ o se ai nnọ ‘emọ erakọ.’ Ukpenọ o muofu, aye na ọ tẹ t’ẹme lele omohẹriẹ nọ ahwo Ju a wo ọ tẹ rehọ omurokpotọ muẹrohọ nọ: “Ere, Olori, rekọ erakọ dede e rẹ re ehẹhẹ nọ i kie no emẹjẹ olori rai.”

Jesu ọ tẹ kuyo nọ: “Aye, ẹrọwọ ra ọ rẹ ruaro! Epanọ o rọ eva ra na a ru ere kẹ owhẹ.” Yọ ere o ghinẹ via! Nọ o kpo te uwou riẹ, ọ tẹ ruẹ ọmọtẹ riẹ evaọ ehru ehwa, sasasa.

No ofẹ unueri Saidọn, Jesu avọ ilele riẹ a tẹ wọ kpohọ abọdekọ orẹwho na, kpohọ obọ ehri Ethẹ Jọdan na. O wọhọ nọ orọ oria ọkpakpafua Jọdan jọ eva ofẹ ukpehru Abade Galili a bi a tẹ rọ orọ ovatha-ọre abade na rueva ofẹ Dẹkapọlis. A tẹ jọ obei gadiẹ ugbehru, rekọ ogbotu na a tẹ rue rai a tẹ rehọ emo, enọ e ko, ituaro, idienu, gbe efa nọ e be mọ gbe enọ eka e rọ oma bru Jesu ze. A te gbolo enana fihọ aro Jesu, o te siwi ai. U te gbe ahwo na unu, nọ a ruẹ idienu nọ e be t’ẹme, gbe emo nọ e be nya, gbe ituaro nọ e be ruẹ ude; a te jiri Ọghẹnẹ Izrẹl.

Jesu ọ tẹ mae t’ẹrovi ọzae odiezọ jọ nọ ọ be rọ udugaga t’ẹme. Eva i re kru idiezọ ẹdha ha, maero evaọ ogbotu. Ẹsejọhọ Jesu o muẹrohọ eguegue ọzae ọnana. Fikiere avọ ohrọ Jesu ọ tẹ rehọ iẹe no ogbotu na. Nọ ae ọvo a rọ, Jesu o te dhesẹ oware nọ ọ gwọlọ ru kẹe. O te fi iziabọ riẹ họ ezọ ọzae na yọ nọ o nwo eya no, ọ tẹ kaobọ te ẹrọ riẹ. Kẹsena nọ o rri ehru, Jesu o te kuẹwẹ gaga ọ tẹ ta nọ: “Wha rovie.” Idudhe na, ezọ ọzae na i te rovie, o te mu ẹme họ ẹta ziezi.

Nọ Jesu o siwi ai kpobi no, ogbotu na a tẹ kuyo avọ ovuhumuo. A tẹ ta nọ: “O ru eware kpobi kiete [no], o ru makọ idiezọ yo ẹme, gbe idienu ta ẹme.” Matiu 15:21-31; Mak 7:24-37.

▪ Fikieme Jesu o gbe ro siwi ọmọ aye Grik na vẹrẹ hẹ?

▪ Uwhremu na, diẹse Jesu ọ rehọ ilele riẹ kpohọ?

▪ Ẹvẹ Jesu ọ rọ rehọ ohrọ fiobọhọ kẹ odiezọ nọ ọ be rọ udugaga t’ẹme?