Uzou Avọ 63

Ohrẹ Ọkpọvio Ọfa

NỌ JESU avọ ikọ riẹ a gbẹ rọ evaọ uwou na evaọ Kapaniọm, a t’ẹme ọfa vi avro ikọ na kpahe ohwo nọ ọ mae rro. Ẹsejọhọ onana yọ oware nọ o via re evaọ okenọ a je kpozi ọ Kapaniọm, okenọ Jesu ọ jọ kugbe ai hi. Jọn ukọ na ọ niyẹrẹ nọ: “Ma ruẹ ohwo jọ nọ ọ be rehọ odẹ ra le izi-igbegbe [no], rekọ ma tẹ [daoma] whaha iẹ, epanọ o bi lele omai hi.”

Ẹsejọhọ Jọn o rri ikọ na wọhọ ẹko ahwo obọdẹ nọ i bi siwi ahwo, enọ i wo odova jọ. Fikiere o te roro nọ ọzae na o bi ru iruo igbunu na thọ fikinọ ọ rọ usu rai hi.

Ghele na, Jesu ọ tẹ hrẹ nọ: “Wha whaha iẹ he; keme ohwo ọvo nọ ọ rẹ rehọ odẹ mẹ ru iruo ilogbo ọ jẹ sae nwane ta ẹme oyoma mẹ ọ rọ họ. Keme ọnọ ọ rọ suọ omai hi, yọ ọ rọ ọmai. Keme uzẹme mẹ ta kẹ owhai, kohwo kohwo nọ ọ rẹ te rehọ egho ame kẹ owhai da fiki epanọ wha rọ ahwo Kristi, osa riẹ o rẹ sai vrẹ vievie he.”

U du gwọlọ nọ ọzae ọnana ọ nyaze ti lele Jesu re ọ tẹ jọ abọ riẹ hẹ. A te rehọ ukoko Ileleikristi na mu hu, fikiere utu rai nọ ọ rọ họ u dhesẹ nọ ọ rọ ukoko jọ nọ o hẹriẹ oma ha. Ọzae na o ghine wo ẹrọwọ fihọ odẹ Jesu yọ fikiere ọ tẹ sai le idhivẹri no. O je ru oghẹrẹ oware uwoma nọ Jesu ọ ta nọ u fo osa. Jesu o dhesẹ nọ evaọ ere oruo, o ti ku osa riẹ fiẹ hẹ.

Rekọ ẹvẹ otẹrọnọ ọzae na o zoruẹ fiki eme gbe owojẹ ikọ na? O rẹ jọ okpoware! Jesu o muẹrohọ nọ: “Kohwo kohwo nọ o ru emaha esese enana, enọ erọwo omẹ na, ọjọ raha uzi, u he woma kẹ e re a gba utho ulogbo hiẹ e ohọe, a gbolo ie fihọ eva abade.”

Jesu ọ ta nọ ilele riẹ a re si oware nọ o ghare kẹ ai wọhọ obọ, owọ, hayo ubiẹro no oma rai onọ o be wha ezoruẹ se ai. O rẹ mai woma re ma ku eware eghaghae enana fiẹ re ma ruọ Uvie Ọghẹnẹ vi ukpenọ ma re wo ai a ve gbolo omai fihọ Gehenna (ezuzu nọ o jẹ to nọ o kẹle Jerusalẹm), onọ u dikihẹ kẹ ọraha ebẹdẹ bẹdẹ.

Jesu ọ tẹ jẹ vẹvẹ unu nọ: “Wha yọrọ oma rai re wha siọ omọvo emaha enana jọ ba ẹjẹfiẹ; keme, mẹ takẹ owhai nọ, eva obọ odhiwu, ikọ rai ebe ruẹ ovao Ọsẹ mẹ nọ ọrọ obọ odhiwu kẹse kẹse.” O te dhesẹ epanọ “emaha” na e ghare te nọ ọ ta kpahe ọzae nọ o wo igodẹ udhusoi rekọ ọvo o te vru. Jesu ọ tẹ ta nọ ọzae na ọ rẹ nya siọ 99 na ba e gwọlọ ọvo nọ o vru na, yọ ọ tẹ rue riẹ ọ rẹ ghọghọ kẹe vi 99 na. Jesu o te ku ei họ nọ: “Whaọ ere Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.”

Ẹsejọhọ avọ iroro avro ikọ riẹ evaọ omoma rai, Jesu ọ tẹ ta nọ: “Wha wo uwhei eva oma rai, re whai ohwo ọ rehọ udhedhẹ lele ohwo ria.” Emu nọ o wo awere he ọ rẹ mae were nọ a te fi uwhei họ iẹe. Fikiere, uwhei ẹwoho u re ru ẹme nọ ohwo ọ ta mae lọhọ re a jẹe rehọ. Ohwo o te wo uwhei otiọye na u re fiobọhọ yọrọ udhedhẹ.

Rekọ fiki ọ sebaẹgba ohwo-akpọ, ẹsejọ ẹwhọ ọgaga ọ rẹ sae roma via. Jesu ọ tẹ jẹ kẹ ohrẹ kpahe oghẹrẹ nọ a re ro ku ai họ. Jesu ọ ta nọ: “Re omoni ra o te ru owhẹ thọ, nya nọ owhẹ avọ iẹ ọvo a rọ, re who dhesẹ oruthọ riẹ kẹe. O te yo ẹme ra, yọ who wo omoni ra rehọ no.” Jesu ọ tẹ hrẹ inọ, otẹrọnọ ọ gaviezọ kẹ owhẹ hẹ, “rehọ omọvo hayo imava gboma, re isẹri imava hayo imasa i ru ẹme na kpobi gba.”

Jesu ọ ta nọ, whọ tẹ dao utho ẹgba ra kpobi no whọ vẹ tẹ rehọ ẹme na bru ‘ukoko na,’ koyehọ, ro bru esẹro nọ e rọ ukoko na enọ e rẹ sai bruoziẹ ọgbagba. Jesu o te ku ei họ nọ, otẹrọnọ ọrahauzi na o re yo ẹme rai hi, “jọ ọ jọ wọhọ [ọgẹdhọ] hayo omiazọhọ, eva obọ ra.”

Evaọ oziẹobro otiọye na, u fo re esẹro na a lele ehrẹ nọ e rọ Ẹme Jihova. Fikiere, taure a tẹ ruẹ nọ ohwo o ruthọ je fo kẹ uye-okẹ, oziẹobro na o rẹ jọ ‘onọ a bru no evaọ obọ odhiwu.’ Yọ taure a tẹ te jọ ‘akpọ rae’ no, koyehọ, a ruẹ nọ ohwo na ọvowa, yọ a ‘rae riẹ no evaọ obọ odhiwu.’ Evaọ oziẹobro otiọye na, Jesu ọ ta nọ, “oria nọ imava hayo imasa a rehọ odẹ mẹ koko họ, mẹ rẹ jọ etẹe eva udevie rai.” Matiu 18:6-20; Mak 9:38-50; Luk 9:49, 50.

▪ Fikieme o gbẹ j’oja evaọ edẹ Jesu re a jọ usu riẹ hẹ?

▪ Ẹvẹ e ru zoruẹ ohwo ọsese u yoma te, kọ ẹvẹ Jesu o dhesẹ nọ ahwo esese itieye na a wuzou te?

▪ Ẹsejọhọ eme o wha uduotahawọ Jesu kẹ ikọ riẹ ze inọ a wo uwhei eva oma rai?

▪ Eme họ otofa oziẹ nọ a ‘bru’ no gbe onọ a ‘ra’ no?