Uzou Avọ 65

Erẹ Idhere Kpohọ Jerusalẹm

O RỌ ezi uvo ọ 32 C.E., yọ Ehaa Uwou-Udhu na o kẹlino. Anwọ Ọnyavrẹ ọrọ 31 C.E., okenọ ahwo Ju a gwọlọ nọ a re kpei, enwenọ Galili ọvo Jesu o bi jo ruiruo. Ẹsejọhọ, anwọ oke oyena ze, fikiọ ehaa esa ẹgbukpe ahwo Ju na ọvo Jesu o ro weze ziọ Jerusalẹm no.

Enẹna inievo Jesu a tẹ ta kẹe nọ: “No etenẹ vrẹ who kpobọ Judia.” Jerusalẹm họ okpẹwho ologbo Judia gbe ehri egagọ orẹwho na kpobi. Inievo riẹ a te roro nọ: “Keme ohwo nọ ọ guọlọ nọ o re dhesẹ oma riẹ via ọ rẹ lẹlẹ ru oware he.”

Dede nọ Jemis, Saimọn, Josẹf, gbe Judas a rọwo inọ oniọvo ọkpako rai, Jesu, ghinọ Mesaya na ha, a gwọlọ e riẹ re o dhesẹ ogaga igbunu riẹ via kẹ ahwo nọ i ti kokohọ ehaa na. Ghele na, Jesu ọ riẹ kpahe enwoma na. Ọ ta nọ: “Akpọ na ọ rẹ sae mukpahe owhai hi, rekọ o mukpahe omẹ epanọ me se isẹi riẹ nọ iruo riẹ i yoma.” Fikiere Jesu ọ tẹ ta kẹ inievo riẹ nọ: “Whai ọvo wha kpobọ eha na; me bi kpo obọ eha na ha.”

Ehaa Uwou-Udhu na yọ ehaa edẹ ihrẹ. A re ku ei họ evaọ ẹdẹ avọ eree avọ iruẹru urirẹ. Ehaa na u re kpokahọ ekuhọ ivuẹvu ẹgbukpe na o tẹ jẹ rọ oke oghọghọ ulogbo gbe akpẹwẹ. Edẹ buobu nọ inievo Jesu a kpohọ ehaa na no kugbe ahwo edekọ, ọye avọ ilele riẹ a tẹ lẹlẹ nya, jẹ ko oma rai dhere. A nya ofẹ edhere Sameria, ukpenọ a rẹ nya onọ ahwo buobu a be nya nọ o kẹle Ethẹ Jọdan.

Nọ Jesu avọ egbẹnyusu riẹ a te gwọlọ uwou nọ a re wohọ evaọ iwhre ahwo Sameria na, o te vi ahwo haro re a ruẹrẹ uwou fihọ. Dede na, ahwo na a tẹ se inọ a re ru oware ovo kẹ Jesu hu nọ a yo nnọ obọ Jerusalẹm o bi kpohọ. Avọ evedha, Jemis avọ Jọn a tẹ nọ nọ: “Olori, o ruọ owhẹ re [ma ta] re erae ino ehru ze te mahe ae?” Jesu ọ tẹ whọku ai fikinọ a jiroro otiọye na, a tẹ nya kpohọ iwhre ọfa.

Nọ a be nya edhere na vrẹ na, okere-obe jọ ọ tẹ ta kẹ Jesu nọ: “Owuhrẹ, me re lele owhẹ kpo koria koria nọ whọ rẹ nya.”

Jesu ọ tẹ kuyo nọ: “Iruakọ i wo ighogho, erao ora i wo iwou; rekọ Ọmọ ohwo o wo oria nọ ọ rẹ rọ uzou riẹ kpaha ha.” Jesu ọ be ta inọ okere-obe na ọ te ruẹ ọbẹwẹ otẹrọnọ o zihe ruọ olele Riẹ. Yọ ekuhọ riẹ o wọhọ inọ okere-obe na o wo omorro hrọ re ọ jẹ oghẹrẹ uzuazọ otiọye na rehọ.

Jesu ọ tẹ ta kẹ ọzae ọfa nọ: ‘Lele omẹ.’

Ọzae na ọ tẹ kuyo nọ: “Se omẹ ba re mẹ nya i ki ọsẹ mẹ tao.”

Jesu ọ tẹ kuyo nọ: “Se iri ba re i ki iri obọ rai; rekọ rọ kẹ owhẹ, nya re whọ vuẹ ovuẹ uvie Ọghẹnẹ.” O rọ vevẹ inọ ọsẹ ọzae na o ri whu hu, keme otẹrọnọ o whu no, ọmọzae na ọ hae jọ etenẹ be gaviezọ kẹ Jesu hu. O wọhọ nọ ọzae na ọ be yare iẹe re ọ kẹe oke re ọ rọ hẹrẹ uwhu ọsẹ riẹ. Ọ ruẹrẹ oma kpahe re o fi Uvie Ọghẹnẹ họ oware ọsosuọ evaọ uzuazọ riẹ hẹ.

Nọ a gbẹ rọ edhere bi kpohọ Jerusalẹm na, ọzae ọfa ọ tẹ ta kẹ Jesu nọ: “Olori me re lele owhẹ, rekọ se omẹ ba tao re me yere enọ erọ obọ uwou mẹ kodẹ.”

Evaọ uyo Jesu ọ tẹ ta nọ: “Ohwo nọ ofi obọ riẹ họ otẹkpẹ nọ o ri emu o ri te ọrọ uvie Ọghẹnẹ hẹ.” Ahwo nọ e rẹ jọ ilele Jesu a rẹ tẹro rai vi iruo Uvie na. Wọhọ epanọ udhu nọ a bi kporo o rẹ jọ gẹgẹle na otẹrọnọ ohwo nọ o bi kporo udhu na o gbe bi rri obaro riẹ hẹ, ere ohwo nọ o bi rri emu kpohọ eyero-akpọ anwae ọnana o ti zoruẹ no edhere nọ o bi su kpohọ uzuazọ ebẹdẹ bẹdẹ na no. Jọn 7:2-10; Luk 9:51-62; Matiu 8:19-22.

▪ Amono họ inievo Jesu, kọ ẹvẹ a roro kpahe iẹe?

▪ Fikieme ahwo Sameria a rọ g’eva tere, kọ eme Jemis avọ Jọn a gwọlọ ru?

▪ Didi eme esa Jesu ọ jọ edhere ta, kọ ẹvẹ o ro fiẹgbahọ ẹgwọlọ kẹ iruo omarodhidhe?