Uzou Avọ 67

A Sai Mu Ei Hi

NỌ EHAA Uwou-Udhu na o gbẹ be nyaharo na, isu egagọ na a te vi iletu iporisi re a nya i mu Jesu. Ọ daoma re ọ dhẹ dhere he. Ukpoye, Jesu ọ tẹ ruabọhọ ewuhrẹ evaọ ẹgbede, ta nọ: “Umuthoke mẹ avọ owhai a gbẹ te jọ, mẹ vẹ te nya bru ọnọ o vi omẹ ze; wha rẹte guọlọ omẹ wha sae ruẹ omẹ hẹ; oria nọ mẹ rọ wha sae tha ha.”

Ahwo Ju a wo otoriẹ ẹme na ha, fikiere a tẹ be jọ udevie oma rai ta nọ: “Bovẹ ohwo ọnana ọ rẹte nya nọ ma gbẹ rue riẹ e he? Kọ ọ be te nya kpobọ udevie ahwo Griki nọ evaha re o wuhrẹ ahwo Griki? Didi otọ eme enana nọ ọ ta na, ‘Wha rẹte guọlọ omẹ, wha sae ruẹ omẹ hẹ’, gbe ‘Oria nọ mẹ rọ wha sae tha ha’?” Rekọ Jesu ọ be ta kpahe uwhu riẹ nọ o be tha gbe ẹkparomatha riẹ kpohọ uzuazọ evaọ obọ odhiwu, oria nọ ewegrẹ riẹ a sai te he.

Ẹdẹ avọ ihrẹ gbe orọ urere ehaa na u te no. K’ohiohiẹ k’ohiohiẹ ehaa na, ozerẹ jọ ọ jẹ hẹ jọ evaọ Ẹtẹre Siloam jẹ ame, o ve ku ei re o su kpohọ obotọ agbada-idhe na. Ẹsejọhọ be kareghẹhọ ahwo na kpahe iruẹru ekẹdẹ kẹdẹ ọnana, Jesu o te bo via nọ: “Ohwo nọ uruame u bi kpe, o bru omẹ ze te da. Ọnọ ọ rọwo omẹ epanọ ikerakere na e ta na, ‘Ame uzuazọ ọ rẹ vọ via eva riẹ.’ ”

Evaọ uzẹme, Jesu ọ be jọ etenẹ ta kpahe eware nọ e te via evaọ oke eku-ku ẹzi ọfuafo na. Evaọ ukpe nọ u lele i rie eku-ku ẹzi ọfuafo ọnana o tẹ roma via eva Pẹntikọst. Evaọ etẹe, etẹre ame uzuazọ i je su ze nọ ilele 120 a ro mu odibo họ ẹgba kẹ ahwo na. Rekọ ri bọo oke oyena, ẹzi ọ jariẹ hẹ evaọ iroro na inọ a rọ ẹzi ọfuafo wholo je se olele Kristi ọvuọvo kpohọ uzuazọ obọ odhiwu hu.

Evaọ uyo kẹ uwuhrẹ Jesu, ahwo jọ a te muhọ ẹta nọ: “Ọnana họ ọruẹaro na,” ẹsejọhọ a be ta kpahe ọruẹaro ologbo ọnọ ọ rro vi Mosis nọ a yeyaa riẹ nọ ọ be tha na. Amọfa a tẹ ta nọ: “Ọnana họ Kristi na.” Rekọ ejọ a tẹ vro nọ: “Kọ Galili Kristi o re ti no tha? Manikọ ikerakere na e ta nọ Kristi o reti no uyẹ Devidi tha, eva ẹwho Bẹtelẹhẹm, iwhre nọ Devidi ọ jọ?”

Fikiere ogbotu na a tẹ hẹriẹ. Ahwo jọ a gwọlọ mu Jesu, rekọ ohwo ọvo nọ ọ kpare obọ kru rie ọ rọ họ. Okenọ iletu iporisi na a zihe ababọ Jesu, ilori izerẹ gbe otu Farisi na a tẹ nọ ae nọ: “Eme wha gbẹ rehọ iẹ ze he?”

Iletu na a tẹ kuyo nọ: “Ohwo ọvo ọ re ta ẹme wọhọ ohwo ọnana ha!”

Avọ evedha, isu egagọ na a te mu ẹkoko họ ese, avọ ọtaraha, gbe ekela. A te bi jijehwẹ nọ: “A su owhai thọ re? Kọ okpohwo jọ ọ rọwo riẹ manikọ ohwo otu Farisi jọ? Rekọ otu ọnana nọ e riẹ uzi ha na, a bọwo rai ehao.”

Kẹsena Nikodimọs, ohwo Farisi gbe osu ahwo Ju (koyehọ, ohwo Sanhẹdrin na), o te yiwi ta ewoma Jesu. Whọ rẹ sae kareghẹhọ inọ ikpe ivẹ gbe ubro nọ i kpemu, Nikodimọs o bru Jesu ze evaọ aso o te fi ẹrọwọ họ iẹe. Enẹna Nikodimọs ọ tẹ ta nọ: “Kọ uzi mai u re bruoziẹ ohwo no re a te yo ẹme riẹ, re a riẹ epanọ o ru?”

Eva e tẹ dha otu Farisi na thesiwa inọ omọvo rai jọ ọ be thọ Jesu. A tẹ whọku ei nọ: “Whẹ ọ rọ Galili re? Du, whọ te ruẹ nọ ọruẹaro o re no Galili tha ha.”

Dede nọ Ikereakere na e nwane ta gbiae inọ ọruaro o re no Galili ze he, e riobọhọ Kristi na wọhọ nọ o ti no etẹe tha, ta inọ a te jọ ofẹ ọnana “ruẹ elo ologbo.” Ofariẹ, a yẹ Jesu evaọ Bẹtlẹhẹm, ọ tẹ jẹ rọ ọmọ Devidi. Dede nọ ẹsejọhọ otu Farisi na a riẹ kpahe onana, ae họ enọ e wha ẹvaha iroro ethọthọ họ ahwo na oma kpahe Jesu. Jọn 7:32-52; Aizaya 9:1, 2; Matiu 4:13-17.

▪ Eme ọ rẹ via k’ohiohiẹ k’ohiohiẹ ehaa na, kọ ẹvẹ Jesu o ro si ẹjiroro kpohọ onana?

▪ Fikieme iletu na a gbe ro mu Jesu hu, kọ eme họ uyo isu egagọ na?

▪ Ono họ Nikodimọs, kọ eme họ uruemu riẹ kpahe Jesu, kọ ẹvẹ ibe otu Farisi riẹ a ru rie?

▪ Didi imuẹro e riẹ inọ Kristi o ti no Galili ze?