Uzou Avọ 75

Ehri Evawere

EVAỌ etoke odibọgba riẹ evaọ Galili, Jesu o ru iruo igbunu, yọ enẹna ọ tẹ wariẹ enana evaọ Judia. Wọhọ oriruo, o le idhivẹri no ọzae jọ oma onọ o jẹ whaha iẹe ẹmeọta. U te gbe ogbotu na unu, rekọ otu ewọsuọ a tẹ kpare avro ọvo na wọhọ onọ a kpare evaọ Galili. A ta nọ: “Fiki [Beelzẹbọb] olori ukumuomu, o bi ro le izi-igbegbe no.” Amọfa a gwọlọ imuẹro nọ e rro viere no obọ Jesu ze ro dhesẹ ohwo nọ ọ ghinẹ rrọ via, yọ a tẹ be gwọlọ dawo iẹe be nọe re o dhesẹ oka no odhiwu ze.

Nọ ọ riẹ oware nọ a bi roro no, Jesu ọ tẹ rehọ oghẹrẹ uyo nọ ọ kẹ ahwo Galili na rọ kẹ ahwo Judia. O muẹrohọ inọ uvie nọ o hẹriẹ oma kpobi o re ti kie. Ọ tẹ nọ nọ: “Re Setan ọ tẹ ghale oma riẹ re, ẹvẹ uvie riẹ u re ti dikihẹ?” O te dhesẹ edhere awa nọ otu ewọsuọ riẹ a rọ nọ ọ ta nọ: ‘Rekọ mẹ tẹ be rehọ uziobọ Ọghẹnẹ le izi-igbegbe na no, kiyọ uvie Ọghẹnẹ o vrẹ owhai no.’

U fo re ahwo nọ e be ruẹ iruo igbunu Jesu a kuyo kẹe wọhọ epanọ ahwo a kuyo ikpe-udhusoi buobu nọ i kpemu nọ a ruẹ iruo igbunu Mosis. A bo nọ: “Onana uziobọ Ọghẹnẹ.” “Uziobọ Ọghẹnẹ” họ onọ u kere Ijaje Ikpe na fihọ ekpala itho re. Yọ “uziobọ Ọghẹnẹ”—ẹzi ọfuafo riẹ, hayo ogaga iruo—họ onọ o lẹliẹ Jesu le idhivẹri no je bi siwi enọ e be mọ na. Fikiere Uvie Ọghẹnẹ o ghinẹ vrẹ otu ewọsuọ enana no, keme Jesu, ọnọ a salọ wọhọ Ovie Uvie yena, ọ rọ udevie rai.

Jesu o te dhesẹ inọ ẹgba nọ o bi ro le idhivẹri no na yọ imuẹro ogaga riẹ nọ o rro vi orọ Setan, nwane wọhọ epanọ ọgba ọ rẹ nyaze jẹ g’obọ vi oroiro uwou-ovie riẹ nọ o wo ekwakwa-ẹmo. Ọ tẹ jẹ wariẹ ọtadhesẹ nọ ọ ta evaọ Galili kpahe ẹzi ogbegbe. Ẹzi na o no oma ọzae jọ, rekọ nọ ọzae na ọ gbẹ rehọ emamọ eware vọ eghogho na ha, ẹzi na o te zihe ze avọ izi ihrẹ efa, uyero ọzae na u te yoma vi orọ ọsosuọ riẹ.

Nọ ọ be gaviezọ kẹ iwuhrẹ enana, oma o tẹ wọ aye jọ evaọ ogbotu na bo ruarua nọ: “Edhede nọ o yẹ owhẹ o wo oghale, gbe evie nọ who vie!” Nọ o rọ isiuru aye ohwo Ju kpobi re ọ jọ oni ọruẹaro na yọ maerro ọrọ Mesaya na, ma wo otoriẹ oware nọ o soriẹ ze nọ aye na ọ jẹ t’ẹme ọnana. Ẹsejọhọ o roro nọ eva e be were Meri thesiwa fikinọ oni Jesu ọ rọ.

Ghele na, Jesu ọ tẹ kpọ aye na vi vẹrẹ vẹrẹ kpahe uvi ehri evawere. Ọ kuyo nọ: “Ijo, ukpoye, eva e were ahwo nọ i yo ẹme Ọghẹnẹ je bi ru ei!” (NW ) U no Jesu unu ze ẹdẹvo ho inọ oni riẹ, Meri, a rẹ kẹe obọdẹ ọghọ jọ. Ukpoye, o dhesẹ nọ re a jọ odibo Ọghẹnẹ oye a je duku evawere, orọnikọ ọgbakugbe iwo hayo eware jọ nọ ohwo o wo t’obọ họ.

Wọhọ epanọ o ru evaọ Galili, Jesu ọ tẹ jẹ whọku ahwo Judia fikinọ a be yare oka no odhiwu ze. Ọ ta kẹ ai nọ a te kẹ ai oka ọvuọvo ho ajokpa oka Jona. Jona ọ jọ oka evaọ edẹ esa nọ ọ jọ eva eri na gbe usiuwoma ajọwha riẹ, onọ o wọ ahwo Ninẹve kpohọ ekurẹriẹ. Jesu ọ tẹ ta nọ: “Wha ri, ọnọ ọ ro vi Jona ọ rọ etenẹ.” Epọvo na re, areghẹ Solomọn u gbe ovie-aye Sheba unu. Jesu ọ tẹ jẹ ta nọ: “Wha ri, ọnọ ọ ro vi Solomọn ọ rọ etenẹ.”

Jesu ọ ta nọ okenọ ohwo ọ tẹ rehọ ukpẹ tu, o re fi ei họ otọ ururu hayo otọ ekete he rekọ o re fi ei họ ehru adada ukpẹ re ahwo a ruẹse ruẹ elo na. Ẹsejọhọ o bi dhesẹ inọ ewuhrẹ gbe eruo iruo igbunu evaọ iraro ahwo egeva enana nọ e rọ ogbotu riẹ na o wọhọ esino elo ukpẹ. Ibiaro ahwo itieye na e rọ lọlọhọ họ, e rọ liọliọ họ, fikiere ẹjiroro iruo igbunu riẹ na o bi rugba ha.

U ri kri hi nọ Jesu o le idhivẹri nọ e jẹ whaha ọzae jọ ẹmeọta no. U fo re onana o wọ ahwo nọ i wo ẹro ọlọlọhọ, onọ o liọ, re a jiri iruo oruaro otiọna re a je whowho emamọ usi na! Ghele na, evaọ oma otu ewọsuọ enana, onana o via ha. Fikiere Jesu o te ku ei họ nọ: ‘Fikiere who ru re elo nọ ọ rọ eva ra ọ jọ ebi hi. Keme elo ọ tẹ vọ oma ra soso, u gbe wo abọ nọ o bi hi, oma na kpobi o vẹ te jọ nwranwranwra, wọhọ epanọ ukpẹ avọ ẹnwranwra riẹ o re lo kẹ owhẹ na.’ Luk 11:14-36; Ọnyano 8:18, 19; 31:18; Matiu 12:22, 28.

▪ Didi uyo ahwo na a kẹ kpahe ọzae nọ Jesu o siwi na?

▪ Eme họ “uziobọ Ọghẹnẹ,” kọ ẹvẹ Uvie Ọghẹnẹ o rọ vrẹ ahwo nọ e be gaviezọ kẹ Jesu no?

▪ Eme họ ehri uvi evawere?

▪ Ẹvẹ ohwo o re ro wo ẹro ọlọlọhọ?