Uzou Avọ 96
Jesu avọ Osu Ọmoha nọ Ọ rọ Ọdafe
EPANỌ Jesu ọ be rọ nya ẹkwotọ Pẹrea vrẹ kpohọ Jerusalẹm na, ọmoha jọ ọ tẹ dhẹ bru ei ze o te kie fihọ aro riẹ. A se ọzae na osu, ẹsejọhọ u dhesẹ nọ o wo ọkwa ologbo jọ evaọ uwou-egagọ na hayo inọ ọ tubẹ rọ omọvo Sanhẹdrin na dede. Ofariẹ, o fe gaga. Ọ tẹ nọ nọ: “Owuhrẹ [owoma], eme me re ruẹ re mẹ reuku uzuazọ ebẹdẹ bẹdẹ?”
Jesu ọ tẹ kuyo nọ: ‘Eme who je se omẹ owoma? Ọvuọvo o woma ha, ajokpa Ọghẹnẹ ọvo.’ Ẹsejọhọ ọmoha na ọ rehọ ubiẹme ọ ‘owoma’ na sei wọhọ odẹ-ọkwa, fikiere Jesu o te ru ei riẹ nọ Ọghẹnẹ ọvo o fo kẹ odẹ-ọkwa otiọye na.
Jesu ọ tẹ gbẹ taharo nọ: “Whọ tẹ guọlọ nọ whọ ruọ uzuazọ, who koko izi na.”
Ọzae na ọ tẹ nọ nọ: “Evẹ?”
Nọ ọ fodẹ izi isoi evaọ Ijaje Ikpe na, Jesu o te yo nọ: “Who kpe ohwo ho, who bruẹnwae he, who tho uji hi, who [se] isẹi erue he, rehọ adhẹ kẹ ọsẹ ra avọ oni ra.” Je fi ujaje nọ o mae tube wuzou gbei, Jesu ọ tẹ ta nọ: “Who you omọfa epanọ who you oma ra.”
“Me koko enana kpobi no emaha ze,” ere ọzae na ọ kuyo avọ oruọzewọ kpobi. “Eme o gbe kiọkọ kẹ omẹ?”
Nọ ọ gaviezọ kẹ ayare oruọzewọ ọzae na, Jesu o te you rie. Rekọ Jesu o te muẹrohọ oma nọ ọzae na ọ rọ kẹ ekwakwa efe ọ tẹ fodẹ ẹgwọlọ ọnana kẹe: “Oware ovo u kiọkọ kẹ owhẹ: Kpo, zẹ eware kpobi nọ who woi, whọ rọ kẹ iyogbere, who re ti wo efe eva obọ odhiwu. Whọ nyaze, lele omẹ.”
Jesu o te rri, ababọ avro avọ ohrọ, nọ ọzae na ọ kparoma o te kuomarẹriẹ, ọ tẹ nyavrẹ avọ ọkora ologbo. Efe riẹ o tu rie aro no kẹ uvi efe. Jesu ọ tẹ ta nọ: “Ẹvẹ o rẹ bẹ te re enọ i fe e ruọ uvie Ọghẹnẹ!”
Eme ọ Jesu i te gbe ilele riẹ unu. Rekọ u gbe rai unu viere nọ ọ fodẹ uzi jọ kẹ ai: “O lọhọ kẹ kamẹl re o dhe uzou họ eghogho ẹguede vi ọdafe re ọ ruọ uvie Ọghẹnẹ.”
Ilele na a tẹ gwọlọ riẹ nọ: “Ono a rẹ sai siwẹ?”
Nọ o rri rai, Jesu o te yo nọ: “Rọkẹ ahwo, o re bẹbẹ, rekọ o rọ obọ Ọghẹnẹ ere he: keme Ọghẹnẹ ọ rẹ sai ru eware kpobi.”
Nọ a muẹrohọ inọ a salọ edhere nọ o wo ẹhẹriẹ no orọ osu ọmoha ọdafe na, Pita ọ tẹ ta nọ: “Ri, ma siọ eware kpobi ba ma te lele owhẹ.” Fikiere ọ tẹ nọ nọ: ‘Kọ eme ma ti wo?’
Jesu ọ tẹ yeyaa nọ: “Eva akpọ nọ tha nọ Ọmọ ohwo ọ te keria agbara uvie oruaro, whai enọ i lele omẹ, wha rẹ te keria egbara uvie kpogbivẹ ti guẹdhọ erẹwho kpogbivẹ Izrẹl.” Ẹhẹ, Jesu o bi dhesẹ inọ a te jọ otọakpọ wariẹ eware bọ re eware e jọ oghẹrẹ nọ e jọ vẹre evaọ ọgbọ Idẹn. Yọ Pita avọ ilele edekọ a ti wo osohwa nọ a ti ro su Aparadase otọakpọ soso kugbe Kristi. Uzẹme, osohwa oruaro oyena u te kẹ omolahiẹ kpobi!
Rekọ, makọ enẹna osohwa o riẹ, wọhọ epanọ Jesu ọ rọ ẹgba ta na: “Uzẹme mẹ ta kẹ owhẹ, ohwo ọvo ọ rọ họ, ọnọ ọ siọ uwou ba, hayo imoni emezae, hayo imoni emetẹ, hayo oni, hayo ọsẹ, hayo emọ, hayo etọ fiki mẹ gbe usiuwoma, rekọ o re wo ekpahọ udheusoi enẹna, iwou, gbe imoni emezae, gbe imoni emetẹ, gbe ini, gbe emọ, gbe etọ, gbe ẹlahiẹ; gbe uzuazọ ebẹdẹ bẹdẹ eva akpọ nọ ọ be tha.”
Wọhọ epanọ Jesu ọ yeyaa, oria nọ ilele riẹ a kpohọ kpobi evaọ akpọ na, a re lele ibe Ileleikristi reawere usu nọ o kpekpe jẹ mae ghare vi onọ a rẹ reawere riẹ kugbe uviuwou obọ rai. Osu ọmoha ọdafe na o ku osaohwa ivẹ enana fiẹ gbe uzuazọ ebẹdẹ bẹdẹ evaọ Uvie Ọghẹnẹ obọ odhiwu.
Uwhremu na, Jesu o te fibae nọ: “Rekọ ibuobu nọ e karo i re ti whruemu; i whruemu e rẹ te karo.” Eme họ otofa ẹme riẹ na?
Otofa ẹme riẹ na họ ahwo buobu nọ e “karo” be reawere ekwa egagọ, wọhọ osu ọmoha ọdafe na, a te ruọ Uvie na ha. A ti ‘whremu.’ Rekọ ibuobu, kugbe ilele omarokpotọ Jesu, enọ otu Farisi nọ e jọ ẹro obọ rai kiẹrẹe na a be jẹfiẹ wọhọ enọ i ‘whremu’—wọhọ ahwo otọakpọ na, hayo ‛am ha·’aʹrets—a te “karo.” Re a “karo” u te dhesẹ inọ a ti wo uvẹ nọ a rẹ rọ jọ ibe isu kugbe Kristi evaọ Uvie na. Mak 10:17-31; Matiu 19:16-30; Luk 18:18-30.
▪ Didi oghẹrẹ osu o wọhọ nọ ọzae ọmoha ọdafe na ọ rọ?
▪ Fikieme Jesu ọ jẹ se nọ a sei owoma ha?
▪ Ẹvẹ oware nọ o via kẹ osu ọmoha na u ro dhesẹ enwoma efe?
▪ Didi osaohwa Jesu ọ yeyaa riẹ kẹ ilele riẹ?
▪ Ẹvẹ enọ i whremu e rọ karo, gbe enọ e karo a ro whremu?