Uzou Avọ 98

Ilele na A rọ Avro nọ Uwhu Jesu u bi Si Kẹle Na

JESU avọ ilele riẹ a kẹle Ethẹ Jọdan no, oria nọ a jọ fa no ẹkwotọ Pẹrea kpohọ Judia. Amọfa buobu a rọ usu kugbei bi kpohọ Ọnyavrẹ ọ 33 C.E. na, onọ a ti ru unwenọ oka ọvo kẹle na.

Jesu ọ kobaro ilele na, yọ uduowha riẹ u gbe rai unu. Kareghẹhọ nọ eka jọ nọ i kpemu no na okenọ Lazarọs o ro whu nọ Jesu ọ gwọlọ ruọ Pẹrea evaọ Judia, Tọmas ọ tudu họ edekọ na nọ: “Ma nya re ma whu kugbe i re.” Jẹ kareghẹhọ inọ okenọ Jesu ọ kpare Lazarọs ze no, ahwo Sanhẹdrin na a tẹ jiroro nnọ a re kpe Jesu. Agbẹta nọ ozọ o rọ rrọ ilele na ẹro na nọ a wariẹ be rueva Judia na.

Re ọ ruẹrẹ ai họ kẹ oware nọ o rọ obaro, Jesu ọ tẹ rehọ 12 na kpohọ oria nọ u siomano, ọ tẹ ta kẹ ai nọ: “Ri, ma bi kpo obọ Jerusalem na; a re ti vivie Ọmọ ohwo kẹ ilori izerẹ gbe otu ikere-obe; a re ti bru kpe ei re o whu, a rẹ te rehọ iẹ kẹ otu Egedhọ. A re ti se i ẹkoko, a ve nhweya ku ei, a rẹ te fa e, a ve kpe i, nọ edẹ esa e gba no ọ vẹ te kparoma.”

Onana họ orọ avọ isiasa evaọ emerae jọ nọ e vrẹ na nọ Jesu ọ rọ ta kẹ ilele riẹ kpahe uwhu gbe ẹkparomatha riẹ. Yọ dede nọ a be gaviezọ kẹe, a bi wo otoriẹ hẹ. Ẹsejọhọ fikinọ a rọwo inọ a ti zihe uvie Izrẹl ziọ otọakpọ na, yọ a bi rẹro oruaro gbe orro nọ a te reawere riẹ evaọ uvie otọakpọ kugbe Kristi.

Usu ahwo nọ a kperẹ Ọnyavrẹ na họ Salomi, oni Jemis gbe Jọn ikọ na. Jesu o se ezae enana “emọ egbrara,” ababọ avro fiki uruemu ojaja rai. U kri no nọ ivẹ enana a ro wo iroro ọkwa ologbo evaọ Uvie Kristi, yọ a ta isiuru rai kẹ oni rai no. Oni rai o te bru Jesu ze kẹ ai, o te digwẹ kẹe, ọ tẹ yare oware jọ.

Jesu ọ tẹ nọ nọ: “Eme whọ guọlọ?”

Ọ tẹ kuyo nọ: “Ta re emezae ivẹ mẹ enana a keria, ọjọ obọze ra, ọjọ ẹkpẹlobọ ra eva uvie ra.”

Avọ ovuhumuo ehri ayare na, Jesu ọ tẹ ta kẹ Jemis avọ Jọn nọ: “Wha riẹ oware nọ wha yare na ha. Wha rẹ sae da egho no mẹ be te da?”

A tẹ kuyo nọ: ‘Ma rẹ sae dae.’ Dede nọ Jesu ọ nwane vuẹ ai no inọ ọ rọ ovao dhe ukpokpoma ulogbo gbe uwhu, a wo otoriẹ eme riẹ hẹ nọ ọ fodẹ “egho” nọ ọ be te da.

Ghele na, Jesu ọ ta kẹ ai nọ: “Egho mẹ wha te ghinẹ dae, rekọ obọze gbe ẹkpẹlobọ mẹ ẹkeria, o rọ nọ mẹ rẹ kẹ hẹ, rekọ ohwo nọ Ọsẹ mẹ ọ ruẹrẹ eriẹ kẹ.”

Ikọ ikpe edekọ na a tẹ te riẹ oware nọ Jemis avọ Jọn a be yare, eva e tẹ dhae. Ẹsejọhọ Jemis avọ Jọn a kobaro evaọ avro ọsosuọ nọ ikọ na a vro kpahe ohwo nọ ọ mae rro. Ayare rai ọnana o te dhesẹ inọ a ti fi ohrẹ Jesu kpahe ẹme ọnana họ iruo ho. U yoma kẹhẹ, isiuru rai kẹ orro o gbẹ rọ gaga.

Fikiere re o ku ẹbẹbẹ ọnana họ gbe evedha nọ o wha ze no, Jesu o te se 12 na kugbe. Avọ ohrẹ oyoyou nọ ọ rọ kẹ ai, ọ tẹ ta nọ: “Wha riẹ nọ ikpahwo egedhọ a rẹ rọ oma ru ilori kẹ ae, ahwo ologbo rai a te jọ ududu kẹ ae. Ere a re ti ruẹ udevie rai hi; rekọ ohwo nọ ọ rẹ te jọ udevie rai rua, ọ rẹ te jọ odibo rai. Ohwo nọ ọ rẹ te jọ aro udevie rai, ọ rẹ te jọ ọrigbo rai.”

Jesu o fi oriruo nọ a rẹ raro kele họ kẹ ai no, wọhọ epanọ ọ ta: “Epanọ Ọmọ ohwo ọ ze re a gba odibo kẹ e he, rekọ ọ rẹ gba odibo, ọ vẹ rọ uzuazọ riẹ ta ibuobu.” Orọnikọ Jesu ọ gbodibo kẹ amọfa ọvo ho rekọ o ti ru ei te epanọ o ti ro whu kẹ ahwo-akpọ! U fo re ilele na a wo uruemu Kristi onana orọ amọfa nọ a rẹ gwọlọ ga ukpenọ amọfa a rẹ gae re a jẹ jọ ọsese ukpenọ a rẹ gwọlọ ọkwa okpehru. Matiu 20:17-28; Mak 3:17; 9:33-37; 10:32-45; Luk 18:31-34; Jọn 11:16.

▪ Fikieme ozọ u je bi mu ilele na?

▪ Ẹvẹ Jesu ọ rọ ruẹrẹ ilele riẹ họ kẹ eware nọ e rọ obaro?

▪ Didi ayare a yare Jesu, kọ ẹvẹ u ro kpomahọ ikọ edekọ?

▪ Ẹvẹ Jesu o ro yeri kugbe ẹbẹbẹ na evaọ udevie ikọ riẹ?