Uzou Avọ 110

Odibọgba eva Etẹmpol na U Kuhọ No

JESU ọ be roma via evaọ etẹmpol na eva oke urere. Evaọ uzẹme, o bi ku odibọgba otọakpọ riẹ họ ajokpa eware nọ e te via evaọ etoke ẹdhoguo gbe ekpe riẹ, onọ u kiọkọ edẹ esa na. Ọ tẹ ruabọhọ ọwhọkuo ikere-ebe gbe otu Farisi na.

Isiasa o whowho nọ: “Uye u te owhai, ikere-ebe gbe otu Farisi, eviẹwẹ!” (NW ) Orọ ọsosuọ, o se uye fihọ ai uzou fikinọ a be wozẹ “uke egho gbe udo, rekọ eva rai e vọ avọ uji-utho gbe ofruriọ.” Fikiere ọ tẹ hrẹ nọ: “Kake wozẹ eva egho gbe udo na tao re uke riẹ o jẹ fo u re.”

O te je se uye fihọ uzou ikere-ebe gbe otu Farisi na fiki egbogbo gbe eviẹhọ eva rai onọ a be rọ ẹghẹ ẹfuọ okafe sino. Ọ ta nọ: “Wha wọhọ iki nọ a ralọ fuafo nọ ehru rai i re wowoma, rekọ o bọ eva rai evọ avọ igbenhwa ahwo owhuowhu gbe egbegbe kpobi.”

Uwhremu na, eviẹhọ rai u te dhesẹ oma via evaọ unevaze rai re a bọ iki kẹ eruẹaro na re a jẹ ralọ ai re a ruẹsi dhesẹ nọ a rọ ziezi. Ghele na, wọhọ epanọ Jesu o dhesẹ via, a rọ “emọ ahwo nọ i kpe eruẹaro na.” Uzẹme, ohwo nọ o yiwi rovie eviẹhọ rai via kpobi ọ rọ awa!

Be taharo, Jesu ọ tẹ fodẹ eme ọwhọkuo nọ e mae ga kpobi. Ọ ta nọ: “Eraomuomu, whai emọ ibi na, ẹvẹ wha sae te rọ va obrukpe Gehena abọ?” (NW ) Gehena yọ ukiekpotọ nọ a je ku ezuzu fihọ evaọ Jerusalẹm. Fikiere Jesu ọ be ta nnọ fikinọ a rọ muomu, ikere-ebe gbe otu Farisi na a te ruẹ-uye ọraha ebẹdẹ bẹdẹ.

Rọ kpahe ahwo nọ o bi vi vrẹ wọhọ ahwo ẹro riẹ, Jesu ọ ta nọ: “Wha re ti kpe ejọ, jẹ kare ejọ [veghe], wha rẹ te jọ evaọ iwou-egagọ rai fa ejọ, je kpokpo ai no ẹwho ruọ [ẹwho], re azẹ enọ ikiẹrẹe kpobi nọ i hwẹ evaọ akpọ na e ze uzou rai, nọ umuo azẹ Ebẹle oruọzewọ na ri te [azẹ] Zakaraya ọmọ Barakia [ọnọ a jọ Iruẹru-Ivie Avivẹ se Jehoyada], ọnọ wha kpe i evaọ udevie aruẹri gbe umukpẹ-aruẹri na. Uzẹme mẹ ta kẹ owhai, eware enana kpobi i re ti te oge ọnana.”

Fikinọ Zekaraya ọ whọku isu Izrẹl a tẹ “gba ẹgware emuemu kpahe iẹ, a tẹ rehọ itho fi ei kpe evaọ ọgwa uwou ỌNOWO na.” Rekọ, wọhọ epanọ Jesu ọ ruẹaro, Izrẹl ọ te hwosa kẹ azẹ okiẹrẹe nọ a bi kpe na. A hwa riẹ ikpe 37 evaọ obaro, evaọ 70 C.E., okenọ egbaẹmo Rom a raha Jerusalẹm yọ ahwo Ju nọ a whu a bu vi ima ọvo.

Nọ Jesu o roro kpahe oware imuozọ onana, ọ tẹ be ruawa. Ọ tẹ wariẹ whowho nọ: “O Jerusalem, Jerusalem, ẹwho nọ o kpe eruẹaro, jẹ rehọ itho fi e nọ a vi bru ei! Bro ẹse mẹ guọlọ nọ me re koko emọ ra họ, wọhọ epanọ ovuhu o re koko emọ riẹ họ otọ ibekpe riẹ nọ owha rọwo kẹ omẹ hẹ! Wha ri, a siọ uwou rai ba kẹ owhai ofofe.”

Jesu o te fibae nọ: “Wha gbẹ sae te ruẹ omẹ ofa ha, bẹsenọ wha rẹ te ta nọ, ‘Ọnọ ọ be rehọ odẹ Ọnowo na tha o wo oghale.’ ” Ẹdẹ ọyena ọ te jọ ọzino Kristi nọ ọ te ziọ Uvie obọ odhiwu riẹ ahwo a vẹ rọ ibiaro ẹrọwọ rue riẹ.

Jesu ọ tẹ kparoma kpohọ oria nọ ọ sae jọ ruẹ etehe unevaze na evaọ etẹmpol na gbe ogbotu nọ i bi fi igho họ eva riẹ. Edafe na a bi fi igho buobu họ eva. Rekọ aye-uku jọ ọ tẹ nyaze o te fi anini esese ivẹ họ eva riẹ.

Nọ o se ilele riẹ, Jesu ọ tẹ ta nọ: “Uzẹme mẹ ta kẹ owhai, aye-uku oyogbere ọnana o fihọ vi ai kpobi nọ a bi fihọ emetehe-okẹ na.” U gbe rai unu epanọ onana o sae rọ jọ ere. Fikiere Jesu o te ru ei vẹ nọ: “Keme ai kpobi epanọ a wo bu te a bi ro fihọ, rekọ ọye, onọ ukiọkọ [kẹe], o fi enọ o wo kpobi họ, makọ eyero riẹ.” Nọ ọ ta eme enana no, Jesu o te no etẹmpol na, orọ urere.

Avọ igbunu kẹ epanọ etẹmpol na ọ rro je wo erru te, omọvo ilele riẹ jọ o te bo nọ: “Owuhrẹ ri, itho igbunu gbe iwou igbunu!” Evaọ uzẹme, a ta nnọ itho na i theri te imita 11, kẹre vi imita 6, je kpehru vi imita 5!

Jesu ọ tẹ kuyo nọ: “[Wha] ruẹ iwou ilogbo nana? Utho ovo nọ a te seba ehru ofa, nọ a ti gele fihọ otọ họ o rọ [họ].”

Nọ ọ ta eme enana no, Jesu avọ ikọ riẹ a tẹ fa Ukiekpotọ Kidrọn na vrẹ a tẹ gadiẹ Ugbehru Olivi. Etenẹ a sae jọ ruẹ etẹmpol urirẹ na ziezi. Matiu 23:25–24:3; Mak 12:41–13:3; Luk 21:1-6; 2 Iruẹru-Ivie 24:20-22.

▪ Eme Jesu o ru evaọ iweze urere riẹ kpohọ etẹmpol na?

▪ Ẹvẹ eviẹhọ ikere-ebe gbe otu Farisi na u ro dhesẹ oma via?

▪ Eme họ otofa ‘ẹdhoguo Gehena’?

▪ Fikieme Jesu ọ jẹ ta nnọ aye-uku na ọ zọhọ vi edafe na?