Uzou Avọ 115

Avro O Du Lahwe

EVA emuhọ owọwọ na, Jesu ọ kẹ uwuhrẹ uwoma omarokpotọ ẹkwoma awọ ikọ riẹ nọ ọ wozẹ. Uwhremu na, ọ tẹ rehọ ehaa Ekareghẹhọ uwhu riẹ nọ o be tha mu. Whaọ, maero fiki oware nọ o nwane via no obọ na, oware ugbunu jọ o tẹ roma via. Ikọ riẹ a te mu avro ọgaga jọ họ kpahe ohwo nọ ọ mae rro evaọ udevie rai! Ẹsejọhọ, avro ọnana u siotọ kri no.

Kareghẹhọ nnọ nọ Jesu ọ rẹriẹ no evaọ ugbehru na, ikọ na a jẹ vro kpahe ọnọ ọ mae rro evaọ udevie rai. Ofariẹ, Jemis avọ Jọn a yare ekwa ilogbo evaọ Uvie na, nọ o wariẹ wha ẹwhọ se ikọ na. Enẹna, evaọ aso urere riẹ kugbe ai, ẹvẹ o rọ uweri kẹ Jesu te re ọ rue rai nọ a be jẹ whọ! Kọ eme o ru?

Ukpenọ o do ku ikọ na fiki uruemu rai, Jesu ọ tẹ wariẹ jiroro kugbe ai avọ odiri: “Ivie ahwo Egedhọ a rẹ rọ oma ru ikpahwo kẹ ae; enọ iwo udu ẹtahobọ rai a re se ai iruuwoma. Rekọ wha rẹ te jọ ere he . . . Keme ọvẹ ọmaero; ọnọ ọ keria be re emu orẹ hayo kọ ọnọ ọ be gba odibo? Kọ ogbẹ rọ nọ ọnọ ọ keria be re emu?” Kẹsena, be kareghẹhọ ai kpahe oriruo riẹ, ọ tẹ ta nọ: “Rekọ mẹ rọ udevie rai wọhọ ọnọ ọ be gba-odibo.”

Makọ sebaẹgba rai, ikọ na a talamu Jesu evaọ etoke odawọ riẹ. Fikiere ọ tẹ ta nọ: “Epanọ ọsẹ mẹ ọ rehọ uvie mu kẹ omẹ, ere me ro mu kẹ owhai re.” Ọvọ obọdẹ nana evaọ udevie Jesu avọ ilele ẹrọwọ riẹ o te ku ai gbe oma riẹ re a wo abọ evaọ esuo uvie riẹ. Umutho ahwo 144,000 ọvo a rehọ fihọ ọvọ ọnana kẹ Uvie na.

Dede nọ a rọ ẹruore ogbunu ọnana kẹ ikọ na re a wo abọ evaọ esuo Uvie na kugbe Kristi, obọnana a rọ whrehewhrehe evaọ ẹzi. Jesu ọ ta nọ: “Whai kpobi a ti zoruẹ aso ọnana fiki mẹ.” Rekọ, nọ ọ ta kẹ Pita nnọ ọ lẹ fiki riẹ no, Jesu ọ tẹ vuẹe nọ: “Oke nọ whọ wariẹ kurẹriẹ no who ve ru imoni ra ga.”

Jesu ọ tẹ ta nọ: “Emaha na ukiọkọ omojọ mẹ avọ owhai a gbẹ jọ. Wha rẹ te guọlọ omẹ; wọhọ epanọ mẹ ta kẹ ahwo Ju obonọ mẹ rẹ nya wha sae tha ha, epa ere mẹ jẹ ta kẹ owhai enẹna. Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”

Pita ọ tẹ nọ nọ: “Olori, bovẹ whọ rẹ nya?”

Jesu ọ tẹ kuyo nọ: “Obonọ mẹ rẹ nya whọ sai lele omẹ enẹna ha, rekọ whọ rẹ te rọ kpahe omẹ ẹdẹfa.”

Pita ọ tẹ gwọlọ riẹ nọ: “Olori, fiki eme mẹ gbẹ sai lele owhẹ enẹna ha? Me re siobọno uzuazọ mẹ fihọ otọ fiki ra.”

Jesu ọ tẹ nọ nọ: “Who re siobọno uzuazọ ra fiki mẹ?” “Uzẹme mẹ ta kẹ owhẹ, makọ aso inẹnẹ na, ọkpa o jeti bo isiava ha, whọ rẹte vro omẹ isiasa.”

Pita ọ tẹ vro nọ: “Makọ mẹ avọ owhẹ a gbe whuẹ dede, mẹ rẹ te vro owhẹ hẹ.” Yọ nọ ikọ edekọ na a kuomagbe be ta oghẹrẹ eme evo na, Pita o te seha nọ: “Ai kpobi a tẹ maki zoruẹ fiki ra, me re ti zoruẹ vievie he.”

Nọ ọ jẹ ta kpahe oke nọ o vi ikọ na kpohọ erẹ usiuwoma ota ọrọ Galili ababọ ekpa-usiobọ gbe ẹkpa emuore, Jesu ọ tẹ nọ nọ: “Oware jọ o kare owhai?

A te yo nọ: ‘Ijo!’

Ọ tẹ ta nọ: “Rekọ enẹna, jọ ọ nọ o wo egbe ọ tọlọ iẹe, ere jegbe ekpa re. Ọnọ o wo ọpia ha, je ọ zẹ ewu riẹ, re ọ dẹ ọjọ. Keme mẹ ta kẹ owhai nọ ekere ọnana a re ti ru ei gba hrọ eva oma mẹ: ‘A te kele iei gbe erahaizi;’ keme a re ti ru eme na kpobi gba, enọ a kere kpahe omẹ na.”

Jesu ọ be ta kpahe oke nọ a te kare iẹe kugbe irumuomu, hayo erahaizi. O te bi je dhesẹ nnọ a ti kpokpo ilele riẹ gaga. Ilele na a tẹ ta nọ: ‘Olori, rri! egbọdọ ivẹ e rọ etenẹ.’

Ọ tẹ kuyo nọ: “Ojọ ere.” Wọhọ epanọ ma te ruẹ na, egbọdọ nọ a wo na o te kẹ Jesu uvẹ wuhrẹ uwuhrẹ ulogbo ọfa jọ. Matiu 26:31-35; Mak 14:27-31; Luk 22:24-38; Jọn 13:31-38; Eviavia 14:1-3.

▪ Fikieme avro ikọ na u je gbunu gaga?

▪ Ẹvẹ Jesu o ro ku avro na họ?

▪ Eme ọvọ nọ Jesu ọ re kugbe ilele riẹ na u rugba?

▪ Didi ujaje kpokpọ Jesu ọ kẹ, kọ ẹvẹ u wuzou te?

▪ Didi eha Pita o se, kọ eme Jesu ọ ta?

▪ Fikieme ithubro Jesu kpahe ekpa-usiobọ gbe ẹkpa emuore i je wo ẹhẹriẹ no enọ ọ kake kẹ?