Uzou Avọ 117

Ẹrova Evaọ Ọgbọ Na

OKENỌ Jesu o ku olẹ họ no, tei te ikọ 11 ẹrọwọ riẹ a tẹ so ile ujiro kẹ Jihova. A te no ubrukpẹ ukpehru na ziotọ, a tẹ rueva ebi odhedhẹ aso na, a tẹ rọ ovao rri Ukiekpotọ Kidrọn eva ofẹ Bẹtani. Rekọ evaọ edhere na, a tẹ daji oria jọ nọ u fo, ọgbọ Getsemane. Onana o rọ Ugbehru Olivi hayo kẹle etẹe. Jesu ọ rehọ ikọ riẹ ziọ etenẹ ẹsibuobu no evaọ otọ irre olivi na.

Nọ ọ nyasiọ eree ba emu evaọ udevie ikọ na—ẹsejọhọ kẹle unu ọgbọ na—ọ tẹ ta kẹ ai nọ: “Wha keria etenẹ, nọ mẹ be lẹ eva obei na.” Ọ tẹ rehọ esa edekọ—Pita, Jemis, avọ Jọn—ọ tẹ dina go haro evaọ ọgbọ na. Jesu o te muhọ eweri avọ ẹrova. Ọ tẹ ta kẹ ai nọ: “Ẹwẹ mẹ o bi weli gaga te uwhu. Wha jọ etenẹ wha lele omẹ rroro.”—NW.

Nọ ọ dina nyaharo omojọ, Jesu o te kigwẹ yọ avọ ovao nọ ọ vẹ tuotọ o te muhọ ẹlẹ: “Ọsẹ mẹ, otẹrọnọ o sai [lọhọ] ru re egho ọnana o vrẹ omẹ; rekọ o rọ eva mẹ hẹ, rekọ o rọ eva ra.” Eme họ otofa eme riẹ? Fikieme o je bi ‘weli makọ ri te uwhu’? Kọ ọ be gwọlọ dhẹ kpemu no ẹjiroro riẹ re o whu jẹ rehọ ẹtanigbo na ze?

Vievie! Orọnikọ Jesu ọ be lẹ nnọ a thọe no uwhu hu. Eva e dha riẹ dede nọ Pita ọ hrẹ riẹ okejọ nnọ ọ siọ uwhu idheidhe na ba. Ukpoye, ọ be rova keme ọ be dhozọ nnọ edhere nọ o bi ti ro whu na—wọhọ ogbulegbu ọjẹkufiẹ na—o te wha ẹpoviẹ se odẹ Ọsẹ riẹ. Ọ ruẹ vuhumu no nnọ evaọ umutho euwa jọ a te kare iẹe fihọ ehru urre wọhọ ohwo nọ ọ mai yoma kpobi—ohwo nọ ọ la Ọghẹnẹ eka! Onana họ oware nọ o be lẹliẹe rova na.

Nọ ọ lẹ gaga no, Jesu o te zihe ze ọ tẹ ruẹ ikọ esa riẹ nọ a be wezẹ. Be vuẹ Pita, ọ tẹ ta nọ: “Emejọ! wha gbẹ sai lele omẹ roro auwa ọvo ho? Wha roro hẹ lẹ, re wha siọ ẹdawọ ba ẹruọ.” Nọ o vuhumu nnọ uye o bẹ rai raha no gbe epanọ oke u thabọ te no, ọ tẹ ta nọ: ‘O ruọ ẹzi na rekọ oma o lọhọ uwo na no.’

Jesu ọ tẹ nyavrẹ orọ avọ isiava ọ tẹ yare nnọ Ọghẹnẹ o si “egho ọnana” no kẹe, koyehọ, ẹgwọlọ hayo oreva Jihova rọ kẹe. Nọ o zihe ze, ọ tẹ wariẹ ruẹ aimasa na nọ a be wezẹ nọ o rọnọ a hae lẹ re a siọ ẹdawọ ba ẹro. Nọ Jesu ọ t’ẹme kẹ ai, a riẹ uyo nọ a rẹ kẹ hẹ.

Ukuhọ riẹ, orọ avọ isiasa, Jesu ọ tẹ nyavrẹ, dina j’owọ haro omojọ, o te kigwẹ, avọ oviẹ ogaga gbe irui, ọ tẹ lẹ nọ: “Ọsẹ, u te je owhẹ, si egho ọnana no omẹ.” O be da Jesu gaga fiki ẹpoviẹ nọ uwhu riẹ wọhọ ogbulegbu o te wha se odẹ Ọsẹ riẹ. Whaọ, re a bọwo ohwo ota wọhọ ọleka—ọnọ ọ la Ọghẹnẹ eka—yọ okolo oware he!

Ghele na, Jesu ọ tẹ ruabọhọ olẹ nọ: “Orọnọ orọ eva mẹ hẹ, orọ eva ra.” Jesu ọ roma riẹ kpotọ kẹ oreva Ọghẹnẹ. Ẹnjẹle jọ no obọ odhiwu ze ọ tẹ roma via ọ tẹ rọ eme ọbọga jọ bọe ga. Ẹsejọhọ ẹnjẹle na ọ ta kẹ Jesu nnọ o wo ọjẹrehọ Ọsẹ riẹ.

Ghele na, ẹvẹ owha nọ o rọ Jesu ẹkoko o gbẹdẹ te! Uzuazọ ebẹdẹ bẹdẹ obọriẹ gbe orọ uyẹ ohwo-akpọ soso u bi veghe. Udubro na o rọ ruaro. Fikiere Jesu ọ tẹ gbẹ ruabọhọ olẹ, yọ ẹroyẹ riẹ o tẹ wọhọ ogẹgẹ azẹ nọ u bi kie fihọ otọ. Wọhọ epanọ The Journal of the American Medical Association o muẹrohọ: “Dede nọ onana yọ oware nọ o rẹ kake via ha, ẹroyẹ azẹ . . . o sae roma via nọ udu u te bi bru ohwo thesiwa.”

Ukuhọ riẹ, Jesu o te zihe orọ avọ isiasa bru ikọ riẹ, ọ tẹ wariẹ rue rai nọ a be wezẹ. Uweri o lẹliẹ oma lọhọ ai no. O te bo nọ: “Wha bi serihọ wezẹ enẹna? U te no; auwa o te no; a vivie Ọmọ ohwo họ obọ erahaizi no. Kparoma, ma kpo; ri, ọnọ o vivie omẹ ọ kẹle ino.”

Nọ ọ gbẹ be t’ẹme na, Judas Iskariọt ọ tẹ lahwe, avọ ogbotu ahwo jọ nọ a kru utuerae avọ ikpẹ gbe ekwakwa-ẹmo. Matiu 26:30, 36-47; 16:21-23; Mak 14:26, 32-43; Luk 22:39-47; Jọn 18:1-3; Ahwo Hibru 5:7.

▪ Nọ a no ubrukpẹ ukpehru na no, diẹse Jesu o su ikọ na kpohọ, kọ eme ọ jọ obei ru?

▪ Nọ Jesu ọ jẹ lẹ eme ikọ na a je ru?

▪ Fikieme Jesu ọ jẹ be rova, kọ eme ọ yare Ọghẹnẹ?

▪ Eme ẹroyẹ Jesu nọ o je su wọhọ ogẹgẹ azẹ na u dhesẹ?