Uzou Avọ 123

“Rri! Ọzae Na!”

AVỌ adhẹẹ kẹ ithihakọ Jesu je vuhumu nnọ ọ rọ ọvowa, Pailet ọ tẹ gwọlọ edhere ọfa nọ o re ro siobọnoi. Ọ ta kẹ ogbotu na nọ: “Wha wo uruemu, nọ a re siobọno ọvo kẹ owhai eva Eha Ọnyavrẹ na.”

Barabas, ojihẹ nọ a riẹ ziezi, ọ jọ uwou-odi, fikiere Pailet ọ tẹ nọ nọ: “Ono wha guọlọ nọ me siobọno kẹ owhai, Barabas orẹ, Jesu nọ a re se Kristi?”

Ẹkwoma ebahọ ọrọ ilori izerẹ na, ahwo na a tẹ ta nọ a siobọno Barabas rọ kẹ ai rekọ re a kpe Jesu. Pailet ọ tẹ gbẹ be ya, jẹ wariẹ nọ ai nọ: “Imava na, ọ vẹ wha guọlọ nọ me [siobọno] kẹ owhai?”

A te bo nọ: “Barabas.”

Avọ igbunu Pailet ọ tẹ nọ nọ: “O [tẹrọ] ere kẹvẹ me re ru Kristi?”

A tẹ rọ urru ovo va gaga nọ: “Ka riẹ veghe.” “Kare iẹ veghe, kare iẹ veghe!”

Nọ ọ riẹ nọ a be yare uwhu ọvowa, Pailet ọ tẹ lẹ nọ: “Fikieme, didi oware uyoma o ru? Mẹ jọ obọ riẹ ruẹ oruthọ nọ o te uwhu hu; fikiere mẹ rẹ fa e re me siobọno i.”

Makọ omodawọ riẹ kpobi, ogbotu evedha na, avọ ebahọ isu egagọ na, a te bi bo ebebo ọvo: “Kariẹ veghe.” Fiki uduotahawọ izerẹ na, ogbotu na a gwọlọ azẹ. Dai roro iei, edisoi ọvo nọ e vrẹ no, ababọ avro ejọ rai e jọ usu ahwo nọ a dede Jesu ziọ Jerusalẹm wọhọ Ovie! Oke na kpobi, ilele Jesu, otẹrọnọ a rọ etenẹ, a fibo ọvo je siomano.

Pailet, nọ ọ ruẹ nọ olẹ riẹ o be wha ewoma ze he rekọ, ukpoye, ozighi ọ be roma via, ọ tẹ rehọ ame ọ tẹ wozẹ abọ riẹ evaọ iraro ogbotu na, ta nọ: “Azẹ ohwo okiẹrẹe ọnana o te omẹ hẹ; wha wo ẹme ọyena.” Ahwo na a tẹ kuyo nọ: “Azẹ riẹ ọ jọ uzou mai jegbọ emọ mai!”

Fikiere, rọwo kugbe ayare rai—jẹ gwọlọ nọ o re ru ẹgwọlọ ogbotu na kẹ ai ukpenọ o re ru oware nọ ọ riẹ nọ u kiete—Pailet o te siobọno Barabas rọ kẹ ai. Ọ tẹ rehọ Jesu a tẹ ba iwu noi oma a tẹ fae. Onana orọnikọ efafa gheghe he. The Journal of the American Medical Association u dhesẹ uruemu ẹfa ahwo Rom:

“Oware nọ a rẹ rọ fa ohwo họ oviaviẹ okpẹkpẹe (oviẹ-arao) avọ ithuro oviẹ-arao nọ a zuo thethei, onọ a re thuru ibi egene hayo igbegbe igodẹ fihọ. . . . Nọ isoja Rom na a be rọ ẹgba rai kpobi rọ oviaviẹ na yẹ ohwo na uke na, ibi egene na e vẹ lẹliẹ iwo oma riẹ vrei ze, ithuro oviẹ-arao gbe igbegbe igodẹ na e vẹ biela họ oma ohwo na. Nọ a gbẹ be fa ohwo na, ela na e vẹ bẹre te iwo nọ e kẹle igbegbe o vẹ whae ze nọ iwo na e rẹ rọ fere lawhe bi fou je hwẹ azẹ.”

Nọ a fae no enẹ, a tẹ rọ Jesu kpohọ uwou-ovie ọba na, a te se egbaẹmo na kpobi kuku. Kọ etẹe isoja na kpobi a jọ lahiẹe ẹkwoma etu idhigbo nọ a ru a tẹ tehe iẹe fihọ uzou riẹ. A tẹ rọ ukpoko họ obọze riẹ, a tẹ whẹ ewu ogorurẹ họ iẹe, utionọ ovie ọ rẹ wha. A tẹ ta kẹe avọ ẹkoko nọ: “Do, Ovie Ju!” Ofariẹ, a te nweya ku ei a tẹ tehe iẹe ovao. Nọ a mi ei ukpoko na, a tẹ rehọ iẹe fae uzou, o tẹ whai ze nọ igbegbe ‘etu-uvie’ idhigbo omovuọ na e rọ rueva uzou riẹ viere.

Orro gbe ẹgba Jesu evaọ olahiẹ onana kpobi na u duobọ te Pailet nọ ọ rọ wariẹ daoma re o siwi iei. Ọ ta kẹ ogbotu na nọ: “Ri, mẹ rehọ iẹ je ro se owhai, re wha riẹ nọ mẹ ruẹ oruthọ ọvo obọ riẹ hẹ.” Ẹsejọhọ o roro nnọ nọ a ruẹ oma Jesu nọ a lahiẹ no ohrọ riẹ o te re ai. Nọ Jesu o dikihẹ aro ogbotu ọ ababọ ororokẹ na, avọ etu-uvie idhigbo riẹ nọ ọ wha gbe ewu ogorurẹ avọ ovao riẹ nọ u bi hwẹ azẹ avọ edada, Pailet o te whowho nọ: “Rri! Ọzae na!”—NW.

Dede nọ a kpe rie ukpe ẹsọ no, ohwo nọ ọ mae rro kpobi evaọ ikuigbe ọna, evaọ uzẹme ọzae nọ ọ mae rro nọ ọ rria no! Ẹhẹ, Jesu o dhesẹ udu gbe ithihakọ nọ e rro vi ogaga kpobi nọ Pailet o vuhumu, keme eme riẹ e vọ avọ adhẹẹ gbe ohrọ. Jọn 18:39–19:5; Matiu 27:15-17, 20-30; Mak 15:6-19; Luk 23:18-25.

▪ Edhere vẹ Pailet ọ rọ daoma nọ o re siobọno Jesu?

▪ Ẹvẹ Pailet ọ rọ gwọlọ ku uzou riẹ no?

▪ Re a fa ohwo, oghẹrẹ vẹ o rẹ jọ?

▪ Ẹvẹ a rọ rehọ Jesu se ẹkoko nọ a fae no?

▪ Omodawọ ọfa vẹ Pailet o ru re o siobọno Jesu?