Aparadase Otọakpọ Na

Ahwo uyẹ sa-sa nọ a be re emu kugbe evaọ aparadase

Jihova o re ti si eyoma kpobi nọ Setan ọ whaze no riẹriẹriẹ. Jihova ọ rehọ Jesu mu Ovie otọakpọ na kpobi no. Eva otọ isuẹsu riẹ, a re ti ru otọakpọ na fihọ aparadase.—Daniẹl 7:13, 14; Luk 23:43.

Jihova ọ yaeya kpahe eware enana:

EMU-ORE OBUOBU: “Kẹsena otọ o vẹ te kẹ ẹvi riẹ; Ọghẹnẹ, Ọghẹnẹ mai, ọ rẹ te ghale omai. Otọ na o te vọ avọ ibi ire buobu; ehru igbehru na o vẹ te vọ kpọhọ hwẹ.”—Olezi 67:6; 72:16.
ẸMO Ọ GBẸTE JỌ HỌ: “Wha nyaze, whai ahwo, wha rri iruo Jihova, oghẹrẹ nọ o ru eware igbenu fihọ otọakpọ. O bi ru emo serihọ ri te oka akpọ na.”—Olezi 46:8, 9.
AHWO OMUOMU A GBẸTE JỌ HỌ: “Iruemuemu na omai rai a re ti kpe ae no. . . Omoke kakao ukiọkọ, iruemuemu na a gbẹte jọ họ; dede who te rri oria riẹ ziezi, ọ rẹ te jọ etẹe he.”—Olezi 37:9, 10.
ẸYAO, UWELI, HAYO UWHU O GBẸTE JỌ HỌ: “Kẹsena enọ ituaro a rẹ te ruẹ ude, ezọ enọ i di i veti rovie. Kẹsena ọmo o veti duola wọhọ ugbosu-ozae, ẹrọo ọnọ o dienu o re ti bo oghọghọ via.”—Aizaya 35:5, 6.

“Ọghẹnẹ oma riẹ ọ rẹ te jọ kugbe ae. O ve ti ririe irui kpobi no aro rai, uwhu o gbẹte jọ vievie he, hayo kọ uweli, hayo oviẹ, hayo edada e gbẹte jọ ofa ha, keme eware anwae na evrẹ no.”—Eviavia 21:3, 4.

Jihova ọ rẹ ta ọrue vievie he, ọ wọhọ Setan avọ idhivẹri na ha. Oware kpobi nọ ọ ya kpahe o re rugba hrọ. (Luk 1:36, 37) Jihova o you owhẹ ọ tẹ jẹ gwọlọ nnọ whọ ria eva Aparadase nọ o bi ti ru na. Fikiere gwọlọ Isẹri ọ Jihova re who wuhrẹ kpahe izẹme igbunu efa nọ e rọ eva Ẹme Ọghẹnẹ. Otẹrọnọ who fi uzẹme na họ iruo eva uzuazọ ra, who re ti wo ufuoma no igbo erue, ogbẹrọwọ, gbe ugbogbori. Kẹsena, who ve ti no igbo uzioraha gbe uwhu. Wọhọ oghẹrẹ nọ Jesu ọ ta: “Whọ rẹ te riẹ uzẹme na, uzẹme na u ve ti ru owhẹ ọmuyẹ.”—Jọn 8:32.