Ono O Bi Gine Su Akpọ Na?

Ahwo buobu a rẹ rehọ ubiẹme ovo kẹ uyo onọ obehru na nnọ—Ọghẹnẹ. Rekọ muẹrohọ nọ Ebaibol na ọ jọ uvumọ oria ta nọ Jesu Kristi hayo Ọsẹ riẹ họ enọ e ginẹ rrọ isu akpọ na ha. Ukpoye, Jesu ọ ta nọ: “A ti le [osu] akpọ na no.” O te gbe fibae nọ: “[Osu] akpọ ọnana ọ be tha. O wo ogaga vi omẹ hẹ.”—Jọn 12:31; 14:30; 16:11.

Koyehọ osu akpọ na o mukpahe Jesu. Ono họ ohwo ọnana?

Imuẹro no Iyero Akpọ Ze

Ghelọ omodawọ ahwo-akpọ nọ a wo eva-ezi, akpọ na ọ ruẹ uye gaga no evaọ ikuigbe kpobi. Onana u te bi gbe ahwo unu, wọhọ epanọ o jọ kẹ okere obe nọ o whu no na David Lawrence: “ ‘Udhedhẹ evaọ akpọ’—enwene ohwo kpobi ọ gwọlọ e riẹ. ‘Aruoriwo kẹ ahwo’—enwene ahwo akpọ na kpobi a wo rie kẹ ohwohwo. O tẹ rrọ ere kọ eme ọ thọ? Fikieme ẹmo o bi ro guegue ahwo ghele emamọ ẹgwọlọ nọ a ro kugbe ahwo yẹ na?”

Onana u gbunu gaga, ogbẹrọ ere? Dede nọ ẹgwọlọ ahwo no emuhọ ze ọ rrọ re a rria evaọ udhedhẹ, a be jọ oria kpobi mukpahe je kpe omoma rai ghele—avọ eva iyoma. Roro kpahe uruemu ababọ ororokẹ evaega iyoma nọ e dafia. Ahwo a rehọ uwou erri errae, ega uye, ujojerrae, egbọudu ọ napalm, gbe idhere iyoma efa rọ lahiẹ je kpe ohwohwo no ababọ ohrọoriọ.

Kọ whọ rọwo nnọ ahwo-akpọ, enọ e be gwọlọ udhedhẹ gbe evawere na, ae ọvo a gine te epanọ a rẹ rọ wha evaega iyoma eyena ze mukpahe ohwohwo? Egaga vẹ e be wọ ahwo kpohọ iruo igbogbo itieye na hayo nọ i bi tu ai kpohọ iyero nọ a jẹ rọ gwọlọ ru emuemu oyoma otiọye na? Kọ who tube roro no ẹdẹjọ sọ ogaga umuomu jọ, nọ a rẹ ruẹ hẹ o be kpọ ahwo re a ru iruemu ozighi itieye na?

A Dhesẹ Isu Akpọ na Via

Omufa o du rọ ẹme na ha, keme Ebaibol na o dhesẹ vevẹ nọ ohwo owareghẹ jọ, nọ a rẹ ruẹ hẹ, o bi su te ahwo gbe erẹwho na. O ta nọ: “Akpọ na ọsoso ọ rọ obọ ogaga oyoma na.” Yọ Ebaibol na o dhesẹ i rie via, ta nọ: “Ọnọ a re se Ukumuomu gbe Setan na . . . ọ [be] viẹ akpọ kpobi họ.”—1 Jọn 5:19; Eviavia 12:9.

Eva okejọ nọ ‘Ẹdhọ ọ dawo’ Jesu, Jesu ọ vro ọkwa Setan wọhọ osu akpọ na ha. Ebaibol na o dhesẹ oware nọ o via vevẹ: ‘Ukọmuomu na ọ tẹ rehọ iẹ kpo ugbehru jọ nọ u kpehru thesiwa, o te dhesẹ ivie akpọ na kpobi kẹe gbe oruaro rai; ọ tẹ ta kẹe nọ, “Who te diguẹ gọ omẹ, mẹ rẹ kẹ owhẹ eware nana kpobi.” Kẹsena Jesu ọ tẹ ta kẹe nọ, “Setan, nyawa!” ’—Matiu 4:1, 8-10.

Roro kpahe onana. Setan ọ dawo Jesu ẹkwoma “ivie akpọ na kpobi,” nọ ọ rọ kẹe. Kọ, okẹ Setan na o hae te jọ uvi odawọ ogbẹrọnọ Setan họ ọnọ ọ ginẹ rrọ osu ivie akpọ nana ha? Ijo, o rẹ sae jọ ere he. Muẹrohọ re nnọ, Jesu ọ vro sọ esuo akpọ na kpobi ọrọ Setan ha ha, oware nọ ọ hai ti ru ogbẹrọnọ Setan họ ọnọ o wo ogaga rai hi. Fikiere, Setan Ẹdhọ na ọye ọ ginẹ rrọ osu akpọ na nọ a rẹ ruẹ hẹ! Evaọ uzẹme, Ebaibol na o se rie “ọghẹnẹ akpọ nana.” (2 Ahwo Kọrint 4:4) O tẹ rrọ ere, ẹvẹ ohwo omuomu otiọna ọ rọ ziọ ọkwa ologbo ọnana?

Ọnọ o zihe ruọ Setan na ọ jọ ẹnjẹle nọ Ọghẹnẹ ọ ma vẹre, rekọ ọ tẹ be re ọkwa Ọghẹnẹ ihri. Ọ vro udu esuo Ọghẹnẹ. Re o ru ẹjiroro riẹ gba, ọ tẹ rehọ araomuomu wọhọ ọtota rọ lẹliẹ aye ọsosuọ na họ, Ivi, o te no ere sai ru ei avọ ọzae riẹ, Adamu, re a ru onọ ọ ta ukpenọ a yo ẹme ọ Ọghẹnẹ. (Emuhọ 3:1-6; 2 Ahwo Kọrint 11:3) Ọ tubẹ ta dede nọ ọ rẹ sae rẹriẹ emọ nọ Adamu avọ Ivi a ti yẹ kpobi siọ Ọghẹnẹ ba. Fikiere Ọghẹnẹ ọ tẹ kẹ Setan uvẹ re ọ daoma ru ehaise riẹ na gba, rekọ Setan ọ re sae kparobọ họ.—Job 1:6-12; 2:1-10.

U muẹro, Setan ọvo ọ rọ abọ evaọ esuo akpọ riẹ na ha. Ọ tẹzẹ enjẹle efa gboma re a kuomagbe ei evaọ ọwọsuọ riẹ mukpahe Ọghẹnẹ. Enana i te zihe ruọ idhivẹri, izi nọ i bi fi obọ họ kẹe wha umuomu riẹ haro. Ebaibol na ọ ta kpahe ai okenọ ọ tuduhọ Ileleikristi awọ nọ: ‘Wha dikihẹ kẹ ereghẹ ukumuomu na. Keme orọnọ uwo gbe azẹ ma bi lele họra na ha, rekọ ikpahwo akpọ ebi ọnana, izi iyoma nọ e rọ eva eria ikpehru.’—Ahwo Ẹfẹsọs 6:11, 12.

Dadamu kẹ Izi Imuomu

Isu akpọ iyoma enana, nọ a rẹ ruẹ hẹ na a gwọlọ su ahwo-akpọ na kpobi thọ, re a rẹriẹ ai no egagọ Ọghẹnẹ. Edhere jọ nọ a bi ro ru ei họ ẹwhaharo ẹjiroro ẹrria uzuazọ evaọ obojọ nọ ohwo o te whu no, dede nọ Ẹme Ọghẹnẹ o ru rie vevẹ nọ enọ i whu no na a riẹ onahona ha. (Emuhọ 2:17; 3:19; Izikiẹl 18:4; Olezi 146:3, 4; Ọtausiuwoma Na 9:5, 10) Fikiere, idhivẹri muomu, nọ ọ be ya urru ọnọ o whu no, ọ rẹ sae t’ẹme kugbe imoni hayo egbẹnyusu ọnọ o whu no na, ẹkwoma ọ ọgbẹva imizi na hayo ẹkwoma ọ “urru” no obọ akpọ izi na ze nọ a rẹ ruẹ hẹ. “Urru” na o rẹ faki ru wọhọ orọ ọnọ o whu no na, rekọ ginẹ orọ idhivẹri!

Fikiere otẹrọnọ who yo “urru” utioye, jọ o viẹ owhẹ họ họ. Siọ oware nọ ọ ta kpobi, re who je bo ẹme ọ Jesu na via: ‘Nyawa, Setan!’ (Matiu 4:10; Jemis 4:7) Whọ kẹ uvẹ kẹ okpakpa obọ akpọ izi na re u ru owhẹ wo obọ kugbe idhivẹri imuomu na ha. Omadhehọ utioye na a re sei iruẹru-imizi, yọ Ọghẹnẹ ọ vẹvẹ enọ e be gọe unu kpahe oghẹrẹ riẹ kpobi. Ebaibol na ọ ghọ “ọgbẹva . . . hayo ọbo, hayo ọnuahwo, hayo ọjahwo hayo ẹjile.”—Iziewariẹ 18:10-12; Ahwo Galesha 5:19-21; Eviavia 21:8.

Nọ iruẹru-imizi i re ru ohwo ziọ otọ ekpakpọ idhivẹri na, whaha iruemu riẹ kpobi te e make rọ arozaha, hayo oghẹrẹ nọ e rẹ maki muọwhọ te kpobi. Iruemu enana i kugbe ughẹgbe nọ a re rri rọ gbẹva, eroruiruo Ekpala ibieme ẹvagba, Evuẹ idhivẹri nọ i kpehru vrẹ otoriẹ ohwo, eriwo isi evabọ ohwo (ẹva-ọgba evabọ), gbe isi erọgbẹva. Idhivẹri na e rẹ wha edo gbe eware igbunu efa nọ a rẹ ruẹ fihọ eva iwou nọ a ru wọhọ ẹkwotọ rai.

Ofariẹ, izi imuomu e be tẹrovi uzioraha nọ ahwo a riuku riẹ na ẹkwoma ẹwhaharo ebe, isinima, gbe arozaha etẹlẹvisiọne nọ i bi dhesẹ egbegbe gbe uruemu ẹhwa-obro. Idhivẹri na e riẹ nọ iroro ethọthọ nọ a si no udu hu e rẹ sae wha isiuru nọ e rẹ sai voro ho fihọ ahwo oma je su ahwo nyai ru uruemu ogbekuo—wọhọ idhivẹri na omarai.—Emuhọ 6:1, 2; 1 Ahwo Tẹsalonika 4:3-8; Jud 6.

Uzẹme, ibuobu e rẹ hwẹ iroro na nnọ idhivẹri a bi su akpọ na. Rekọ avro rai o gbunu hu, keme Ebaibol na ọ ta riẹ no nọ: “Setan oma riẹ ọ rẹ rehọ oma riẹ ru ukọ-odhiwu elo.” (2 Ahwo Kọrint 11:14) Eviẹhọ riẹ nọ e mae rro kpobi họ ibuobu nọ o tuaro no re a seba ẹriẹ nnọ tei te idhivẹri riẹ na a be ginẹ rria. Rekọ jọ a viẹ owhẹ họ họ! Ẹdhọ gbe idhivẹri riẹ a ginẹ rọ, yọ u fo nọ whọ rẹ gbẹ hae dadamu kẹ ai ẹsikpobi.—1 Pita 5:8, 9.

Avọ evawere, oke na o kẹle no enẹna nọ Setan gbe idhivẹri riẹ e gbẹte jọ họ! “Akpọ na [kugbe isu idhivẹri riẹ] e rẹ te vrẹ,” ere Ebaibol na ọ tuduhọ omai awọ, “rekọ ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) Ẹvẹ ufuoma riẹ o te rro te re a si ekpokpo oyoma omuomu ọyena no! Fikiere, joma jọ udevie enọ i bi ru oreva Ọghẹnẹ nọ e te reawere uzuazọ ebẹdẹ bẹdẹ evaọ akpọ kpokpọ okiẹrẹe Ọghẹnẹ na.—Olezi 37:9-11, 29; 2 Pita 3:13; Eviavia 21:3, 4.

[Picture on page 4]

Kọ Setan ọ hae sae rehọ isuẹsu akpọ na kpobi kẹ Jesu ogbẹrọnọ eriẹ e rrọ họ?