Uwuhrẹ 10

Iruemu nọ Ọghẹnẹ O Mukpahe

Ẹvẹ o rẹ j’owhẹ oma kpahe eware nọ Ọghẹnẹ ọ ta nọ e rọ yoyoma? (1)

Didi eghẹrẹ uruemu owezẹ ezae aveya e rọ thọthọ? (2)

Ẹvẹ Oleleikristi o re riwi ọrue ọta? (3) edhọ-ifio? (3) uji-utho (3) ozighi? (4) uruemu-imizi? (5) idieda-thomawa? (6)

Ẹvẹ ohwo ọ sai ro sioma no iruemu ethọthọ? (7)

1. Idibo Ọghẹnẹ a you oware nọ uwoma. Rekọ a re je wuhrẹ re a mukpahe oware nọ u yoma. (Olezi 97:10) Oyena u dhesẹ ẹwhaha iruemu jọ nọ Ọghẹnẹ o mukpahe. Eme họ iruẹru eyena jọ?

2. Ogberẹ-Obro: Owezẹ emezae avọ emetẹ taure a tẹ te rọo, ẹnwae-obro, owezẹ kugbe erao, ẹnwae-obro udevie imoni, gbe ezae-duezae kpobi yọ izieraha egaga mukpahe Ọghẹnẹ. (Iruo-Izerẹ 18:6; Ahwo Rom 1:26, 27; 1 Ahwo Kọrint 6:9, 10) Otẹrọnọ ọzae avọ aye a be rria kugbe rekọ a rọo ho, a rẹ hẹriẹ hayo a vẹ ruọ orọo lele uzi.—Ahwo Hibru 13:4.

3. Ọrue Ọta, Edhọ-Ifio, Uji-Utho: Jihova Ọghẹnẹ ọ rẹ ta erue he. (Taitọs 1:2) Ahwo nọ a gwọlọ ọjẹrehọ riẹ a rẹ whaha ọrue ọta. (Itẹ 6:16-19; Ahwo Kọlọsi 3:9, 10) Uvo-uthe u gbe oghẹrẹ edhọ-ifio kpobi ku no. Fikiere Ileleikristi a re w’obọ evaọ oghẹrẹ edhọ-ifio ọvo ho, wọhọ elọtri, ekade-ro-fi-edhọ, gbe try-your-luck. (Ahwo Ẹfẹsọs 5:3-5) Yọ Ileleikristi i re tho-uji hi. A re keke aro fihọ dẹ eware nọ a tho ho hayo tọlọ eware ababọ uvẹ u mio ho.—Ọnyano 20:15; Ahwo Ẹfẹsọs 4:28.

4. Ofuomuo, Ozighi: Ofu nọ a rẹ kpọ họ o rẹ sae su kpohọ iruẹru ozighi. (Emuhọ 4:5-8) Ohwo nọ o re ru ozighi ọ sae jọ ogbẹnyusu Ọghẹnẹ hẹ. (Olezi 11:5; Itẹ 22:24, 25) O thọ re a ru orukele hayo rehọ uyoma hwosa eware iyoma nọ amọfa a ru omai.—Itẹ 24:29; Ahwo Rom 12:17-21.

5. Oghẹrẹ Ọnyẹ Kpobi gbe Uruemu-Imizi: Ahwo jọ a re bose ogaga imizi na re a ro siwi eyao. Amọfa a rẹ sa ewegrẹ rai esagba re a ru ai mọ ẹyao hayo re a tube kpe ai dede. Setan họ ogaga nọ o rọ emu enana kpobi. Fikiere Ileleikristi a re w’obọ ọvo vievie evaọ enana ha. (Iziewariẹ 18:9-13) Ẹria kugbe Jihova kpekpekpe oye họ oware nọ o mai woma nọ o rẹ thọ omai no esagba nọ amọfa a rẹ sa omai.—Itẹ 18:10.

6. Idieda-Thomawa: O thọ họ re a da umutho udi, ebiẹẹ, hayo udi ogaga jọ. (Olezi 104:15; 1 Timoti 5:23) Rekọ idi buobu eda gbe idieda-thomawa e thọ evaọ aro Ọghẹnẹ. (1 Ahwo Kọrint 5:11-13; 1 Timoti 3:8) Idieda vrẹ ẹta e sae raha ugboma ra gbe uviuwou ra. O rẹ jẹ sai ru owhẹ kie ruọ edawọ efa vẹrẹ vẹrẹ.—Itẹ 23:20, 21, 29-35.

7. Ahwo nọ a bi ru eware nọ Ọghẹnẹ ọ ta nọ e thọ a te “reuku uvie Ọghẹnẹ hẹ.” (Ahwo Galesha 5:19-21) Who te ghine you Ọghẹnẹ jẹ gwọlọ ru ei evawere, whọ rẹ sai sioma no iruemu enana. (1 Jọn 5:3) Wuhrẹ re who mukpahe eware nọ Ọghẹnẹ ọ ta nọ e thọ. (Ahwo Rom 12:9) Nyusu kugbe ahwo nọ i wo iruemu Ọghẹnẹ. (Itẹ 13:20) Usu ekpako Ileleikristi o sae jọ ehri obufihọ. (Jemis 5:14) Onọ omae rro họ, rẹro suọ obufihọ Ọghẹnẹ ẹkwoma olẹ.—Ahwo Filipai 4:6, 7, 13.

[Pictures on page 20, 21]

Ọghẹnẹ o mukpahe idieda-thomawa, uji-utho, edhọ-ifio, gbe iruẹru ozighi