Ẹmeọta-Kugbe Ẹkwoma Ileta
ILETA i ru izuazọ gbe iruemu ima ahwo buobu woma viere no. Ibuobu ebe ọ Ikereakere Griki Ileleikristi na e jọ ileta vẹre. Ma rẹ sai kere ileta nẹnẹ rọ bọ ahwo ọkpokpọ nọ e rọwo ga, kpeze evuẹ se egbẹnyusu, tuduhọ inievo nọ e rehọ ewha-iruo obọdẹ, ro ru enọ e rẹriẹ ovao ku ọbẹwẹ oma ga, je ro kpeze evuẹ nọ i fo rọkẹ iruẹru ukoko.—1 Tẹs. 1:1-7; 5:27; 2 Pita 3:1, 2.
Ileta ikere yọ obọdẹ edhere jọ nọ a re ro se isẹri. Evaọ eria jọ, ahwo buobu a be rria iwou nọ a bi rowu t’aso t’uvo hayo iwou ehọtẹle nọ a rẹ rria nọ a sae jọ ta usiuwoma lọlọhọ họ. Ejọ e rẹ kake jọ uwou hu, fikiere ma rẹ rue rae he nọ ma te bi se isẹri n’uwou ruọ uwou. Efa e be rria eria imivu.
Ẹyao, ova-ehru oyoma, hayo uzi ọ a ruọ otafe he e rẹ sai kru owhẹ fihọ uwou ẹsejọ. Kọ whọ sai kere ileta re who ro se isẹri efa kẹ omoni ra jọ hayo ohwo nọ who lele t’ẹme evaọ edhere ọnyakuo no ẹdẹjọ? Kọ ọmọ-uwuhrẹ Ebaibol ra jọ ọ kwa no? Ileta nọ who re kere sei o sae jọ oware kpobi nọ ọ gwọlọ re isiuru abọ-ẹzi riẹ e gbẹ jọ jajaja. Hayo whọ sae ghale ovuẹ Ikereakere jọ nọ u wuzou kugbe enọ e rọo kẹle, enọ i zihe ruọ eyewọ, hayo enọ ohwo oyoyou o whu ku.
Isẹri-Ise Ẹkwoma Ileta
Okenọ who te bi kere re who ro se isẹri kẹ ohwo nọ whọ re nyaku ẹdọvo ho, kaki dhesẹ oma ra. Whọ sai dhesẹ nọ who bi ru iruo unevaze akpọ-soso. Otẹrọnọ u fo, fodẹ nọ whẹ yọ omọvo Isẹri Jihova. Vuẹ ohwo na oware nọ who je bi kere viukpenọ who re weze kpohọ obọ uwou riẹ. Kere iei epaọ ẹsenọ who dikihẹ aro ohwo na be t’ẹme. Dede na, evaọ ẹnyalele ọkpọvio na nnọ “wha wo areghẹ wọhọ eriọvọ wowolẹ wọhọ irueruẹ,” roro gaga kpahe umuo nọ who re dhesẹ omara te.—Mat. 10:16.
Fi eme nọ whọ hae ta otẹrọnọ whọ rọ aro riẹ ba ileta na. Whọ rẹ sai si eme emuhọ ro no obe Reasoning na ze hayo wariẹ ẹmeọta Ikereakere jọ no Odibọgba Uvie Mai ọkpokpọ jọ ze. Whọ sae n’onọ jọ whọ vẹ tuduhọ ohwo na awọ re o roro kpahe iẹe. Iwhowho-uvie jọ a rẹ ta ọvo nọ ma wo omaa ọvọvẹ onọ ma rẹ jọ k’iyo Ebaibol, a vẹ riobọ kpohọ uzou jọ evaọ obe mai jọ nọ ma re ro wuhrẹ ahwo. Ileta oriruo nọ a kere ro se isẹri o roma via evaọ ẹwẹ-obe avọ 73. O sae kpọ owhẹ, rekọ u re woma re who nwene eme na. Ogbẹrọ ere he, ileta evona i ti te ahwo jọ obọ unuẹse buobu.
Ehoo ọ rẹ jọ ahwo jọ oma re a se ileta ithethei nọ i no obọ ọrara ze. Fikiere o sae jọ oware areghẹ re ileta ra na e jọ kpẹkpẹe. Ku ileta na họ taure ehoo ọ tẹ te ruọ ọnọ who bi kere se na oma. U re woma otẹrọnọ who re fi obe uzizie kpohọ iwuhrẹ eva Ọgwa Uvie họ iẹe. Whọ sai fi obe-ovẹvẹ, ibroshọ, hayo ukere Uwou-Eroro Na hayo Awake! jọ họ iẹe je ru ei vẹ nnọ whọ sai vi enana sei ẹsikpobi otẹrọnọ ọ gwọlọ. Hayo whọ sae nọ e sọ whọ sai weze kpohọ uwou riẹ re who lele iei t’ẹme na haro.
Eme Jọ Kpahe Omaa Ileta
Rri ileta oriruo na. Muẹrohọ eware enana: (1) O rọ kpatiẹ, o gua kugbe he. (2) Ẹnvẹlopu na ọ tẹ maki vru, ohwo nọ who kere ileta na se na o ti gbe wo odẹ gbe adrẹse ra. (3) A fodẹ ẹjiroro ileta na lọlọhọ gbi ae evaọ edhe-ẹme ọsosuọ na. (4) A fi ugogo ẹme kpobi họ edhe-ẹme sa. (5) Fiki ẹjiroro riẹ, ileta na e wọhọ oware aruọzaha ha.
Evaọ ileta iruo, wọhọ ileta nọ okere-obe ukoko o re vi se uwou ogha na, odẹ ukoko na o rẹ jariẹ, kugbe odẹ okere-obe na, adrẹse nọ a re ro postu riẹ, gbe ideti na. Odẹ gbe adrẹse ohwo hayo ukoko nọ a bi vi ileta na bru o rẹ jariẹ re. Uyere nọ u fo u ve lele iei. Re who ku ileta na họ, evaọ evẹrẹ jọ ẹme wọhọ “Emamọ ohwo ra” hayo “Avọ oruọzewọ” o rẹ roma via evaọ ehru obọ-owhẹhọ na. Obọ a rẹ rọ whobọhọ obe na.
Evaọ ileta kpobi, tẹrovi ẹgbagba ibieme na, ọwhẹgbe eme na, oka-ukpehọ, gbe ẹkpatiẹ ileta na. Onana u re fi ọghọ họ ileta ra gbe ovuẹ nọ o rọ eva riẹ.
Evaọ uke ẹnvẹlopu na, kere adrẹse ra fihọ iẹe ẹsikpobi. Who te roro nọ u ti fo re who kere adrẹse ra ha, kere adrẹse Ọgwa Uvie na. Who re kere adrẹse Watch Tower Society na fihọ iẹe vievie he, keme onana u ti dhesẹ thọthọ nọ ọfisi Society a vi ileta na no vrẹ, yọ o sae wha ẹbẹbẹ ze. Who gbe fi adrẹse ra họ iẹe he yọ who vi obe lele iei, onana o sae lẹliẹ ahwo roro nọ Society o vi rie.
Ruẹ nọ who fi estampo nọ i te họ iẹe, maero otẹrọnọ obe o rọ uko na. Estampo na u gbe te he, a ti mi ọnọ who bi vi uko na se na ugho, yọ onana u ti fi afuẹwẹ họ ovuẹ ra. Kareghẹhọ nọ evaọ erẹwho buobu, nọ a te fi ibroshọ hayo emagazini họ uko, unuigho estampo na u re bu vi onọ a ro vi ileta gheghe.
Emamọ Eme
Who te kere ileta ra re no, sei re whọ kiẹ eme nọ e rọ eva riẹ riwi. Ẹvẹ o do? Kọ o rọ whẹtiẹwhẹtiẹ avọ ẹghẹ? Uyoyou gbe ẹwo e rọ usu ekwakwa nọ ma gwọlọ dhesẹ evaọ oyerikugbe mai kugbe amọfa. (Gal. 5:22, 23) Whọ tẹ ruẹ nọ ẹme jọ o do jẹlẹ hayo o wo irekọ, kpọ ẹme na vi.
Ileta e rẹ sai kpohọ eria nọ whọ sai te he. Onana u ru ileta fihọ okwakwa nọ u wuzou evaọ odibọgba mai. Nọ ileta ra i dikihẹ kẹ owhẹ gbe oghẹrẹ ohwo nọ whọ rọ na, muẹrohọ eme nọ o ta, epanọ o rọ, gbe oghẹrẹ nọ u do. O sae kẹ oware nọ o gwọlọ re who fiobọhọ kẹ, bọga, jẹ tuduhọ ẹwẹ ọghaghae jọ awọ kpohọ edhere uzuazọ.
[Ẹkpẹti nọ o rrọ ẹwẹ-obe avọ 73]
Umukọkọ Akpọreha
124 Iyẹ Ibio
Isoko, Delta State
June 1, 20—
Titi, Ọrivẹ Mẹ,
Mẹ avọ ọzae mẹ ma be rria okegbe ra na. Ma re sai wo uvẹ re ma lele owhẹ t’ẹme he, yọ ma wo ovuẹ jọ nọ u wuzou nọ ma gwọlọ ghale kugbe owhẹ. Ovuẹ na o rọ omobe-ovẹvẹ nọ o rọ evaọ uko na.
O rọ oware evawere k’omai re ma w’obọ evaọ iruo nọ ahwo unevaze a be jọ ekwotọ nọ i bu vi 200 ru. Evaọ ekwotọ enana kpobi, a bi zizie ahwo re a wo erere no ọruẹrẹfihotọ jọ ze nọ o bi fiobọhọ kẹ ahwo wuhrẹ iyo Ebaibol kẹ enọ nọ i wuzou wọhọ: Fikieme ma jẹ be rro kpako je whu? Eme họ ẹjiroro uzuazọ? Ẹvẹ whọ sai ro duku uvi evawere?
Ma bi w’obọ evaọ iruo nana keme ma ghine wo isiuru kpahe erivẹ mai. Iruo mai e rọ ekiọthuọ họ. O rọ irẹro mai inọ ẹdẹjọ ma te sae ruẹ owhẹ re ma gbẹ t’ẹme kugbe. Whọ tẹ gwọlọ omai ruẹ, whọ sai ru ere ẹkwoma adrẹse obehru na, yọ o te were omai.
Avọ oruọzewọ,
[Obọ-Owhẹhọ]