Ẹkpẹti Onọ

◼ Fikieme o jẹ gwọlọ omoyọrọ evaọ okenọ a tẹ be rehọ ileta se-isẹri?

Re a se-isẹri ẹkwoma ileta yọ edhere nọ o lehie otọ no nọ a rẹ rọ ghale usiuwoma na. Dede na, eware nọ e be jọ akpọ via kẹle na e be lẹliẹ ahwo yọroma kpahe erovie ileta nọ a riẹ kpahe ziezi hi. A re viẹro ku ẹnvẹlopu nọ i no oria nọ a riẹ hẹ ze hayo enọ i wo adrẹse nọ a rẹ rọ za ileta na ha, maero otẹrọnọ obọ a ro kere ae yọ e rrọ gbẹgbẹdẹ. Enọ i wo iwou a rẹ sai gbolo ileta itieye na kufiẹ ababọ erovie. Kọ ẹvẹ ma sae rọ whaha onana re o seba ẹvia?

O tẹ lọhọ, a rẹ taepo ileta na gbe eme ẹnvẹlopu na. Odẹ ohwo nọ whọ be ta usiuwoma kẹ na who re kere fihọ ẹnvẹlopu na. Who kere fihọ iẹe nọ ro se “Ọnọ Ọ be Rria Uwou” na ha. Fibae, hai kere adrẹse nọ a rẹ rọ za ileta ra ẹsikpobi. Otẹrọnọ o rrọ oware areghẹ re who dhesẹ adrẹse omobọ ra ha, kere odẹ ra gbe adrẹse Ọgwa Uvie na. Who kere ileta ababọ odẹ hẹ. Who kere adrẹse Society vievie he.—Rri Ẹkpẹti Onọ Odibọgba Uvie Mai ọrọ November 1996 na.

A rẹ sae ruẹ iroro-ejẹ efa gbe ileta oriruo evaọ Wo Erere no Ewuhrẹ ọ Isukulu Odibọgba Esuo-Ọghẹnẹ Ze, ẹwẹ-obe avọ 71-73. Ekpọvio nana i ti fiobọhọ k’omai rọ ileta ruiruo ziezi rọ rehọ emamọ usi na nya te amọfa oma.