Eghale nọ I Re No Ovuhumuo Odhesẹ kẹ Uyoyou Jihova Ze—Abọ Avọ 2
1 Evaọ abọ nọ a jọ ta kpahe uzoẹme nana evaọ amara n’okpo na, ma fiẹgbahọ idhere ene nọ ma sai ro dhesẹ ovuhumuo mai kẹ uyoyou Jihova evaọ odibọgba na. (1 Jọn 4:9-11) Ma te jọ etenẹ fodẹ idhere isoi efa nọ a re ro ru onana. Okenọ ma te w’obọ vọvọ evaọ obufihọ kẹ amọfa evaọ abọ-ẹzi, ma re wo evawere.
2 Isẹri-Ise Ọnyakuo: Onana yọ emamọ edhere nọ a rẹ rọ gwọlọ ahwo nọ ohọo gbe uruame ẹrẹreokie u bi kpe jẹ kẹ ae ebe nọ i re fiobọhọ kẹ ae. U woma re ma ‘dẹ oke uvẹ na’ ro se-isẹri evaọ etoke kpobi jẹ rọkẹ ohwo kpobi nọ ma nyaku. (Ẹf. 5:16) O rẹ sae gwọlọ nọ ma gbaudu re ma sai se-isẹri evaọ edhere ọnana, rekọ otẹrọnọ ma wo ovuhumuo kẹ uyoyou Ọghẹnẹ gbe ẹgwọlọ ahwo, ma re se-isẹri evaọ uvẹ kpobi.—2 Tim. 1:7, 8.
3 Imishọnare jọ o wo oghale ulogbo fiki ẹme nọ o muhọ kugbe ohwo nọ a gbẹ ruọ omoto. Ọzae na o dhesẹ isiuru. A ru ozihebro, a te je muọ obe uwuhrẹ Ebaibol họ. Ọzae ọyena o kurẹriẹ ziọ uzẹme na jẹ nyaharo te epanọ o ro zihe ruọ ọkpako ukoko!
4 Ileta Ikere: Ẹsejọhọ ma sae nya n’uwou ruọ uwou hu fiki ẹyao hayo ovao ehru nọ u kiehọ họ. Ma sai kere ileta, se-isẹri ekpẹkpẹe kẹ ahwo nọ ma riẹ, enọ iyoyou rai i whu seba, hayo enọ ma dihọ uwou hu evaọ ẹkwotọ na. Ma sai vi omobe-ovẹvẹ ẹruoke mai jọ nọ u wo ovuẹ Ebaibol nọ u ti si ohwo na uru kugbei jẹ tuduhọ ohwo na awọ re ọ nọ onọ nọ o wo kpobi. Rehọ adrẹse obọra hayo ọrọ Ọgwa Uvie na ro vi ileta na; iviena wha rehọ adrẹse uwou-ogha ro vi ei hi.
5 Isẹri-Ise Ifonu: Onana yọ emamọ edhere nọ a rẹ rọ nya te ahwo nọ a dihọ uwou hu evaọ usiuwoma ota n’uwou ruọ uwou na. Ma te ru ei avọ areghẹ, ẹwo, ẹghẹ, gbe ona, ahwo na a sae jẹ emamọ owọ. Odibọgba Uvie Mai ọrọ February 2001, ẹwẹ-obe avọ 5-6, o kẹ iroro-ejẹ nọ i re fiobọhọ kpahe epanọ a sai ro wo iyẹrẹ nọ e mai woma.
6 Nọ oniọvo-ọmọtẹ jọ ọ jẹ rehọ ifonu se-isẹri, ọ tẹ nọ aye jọ sọ o roro ziezi no kpahe oware nọ o rrọ obaro kẹe gbe uviuwou riẹ. Aye na ọ tẹ ta nnọ o roro kpahe iẹe no. Ọ ta nnọ fiki iroro ababọ ẹruore riẹ, o sioma no họ obọ uwou riẹ. Nọ ọdawẹ nọ oniọvo-ọmọtẹ na o dhesẹ ọ wọe, aye na ọ tẹ rọwo nnọ ọ rẹ nya kpohọ eki jọ nọ ọ kẹle etẹe re a jọ etẹ ruẹ ẹro. Fiki onana, aye na ọ tẹ jẹ uwuhrẹ Ebaibol rehọ!
7 Edederehọ Erara: Otẹrọnọ ma you erivẹ mai, ma rẹ jaja aro vi re ma muẹrohọ ọrara kpobi nọ o weze ziọ oria ewuhrẹ mai je ru oma sasa iẹe. (Rom 15:7) Ru re ọ ruẹ nnọ ọ rrọ udevie ahwo nọ a ghine wo isiuru kpahe ewoma abọ-ẹzi riẹ. Uvi ọdawẹ mai gbe obe uwuhrẹ Ebaibol omobọ ohwo nọ ma rẹ jiroro riẹ kẹe o rẹ sae lẹliẹe jẹ obufihọ mai rehọ.
8 Emamọ Uruemu Mai: Ma rẹ whẹ erru họ uzẹme na ẹkwoma emamọ uruemu mai. (Tait. 2:10) Okenọ ahwo akpọ na a tẹ ta emamọ eme kpahe Isẹri Jihova, yọ a be rehọ ọghọ kẹ Ọghẹnẹ mai. (1 Pita 2:12) Onana o rẹ sai je fiobọhọ kẹ amọfa re a muhọ ẹnya evaọ edhere uzuazọ na.
9 Kọ whọ gbẹ wariẹ kiẹ idhere isoi nana nọ ma re ro dhesẹ ovuhumuo mai kẹ uyoyou ulogbo Jihova k’omai na riwi je fi ai h’iruo? (1 Jọn 4:16) Nọ who bi ru ere na, who ti vu irere buobu.