Eghale nọ I Re No Ovuhumuo Odhesẹ kẹ Uyoyou Jihova Ze—Abọ 1
1 Jọn ukọ na o kere nọ: “Ma you [Jihova] keme ọye ọ kaki you omai.” (1 Jọn 4:19) Ma te roro kpahe eware kpobi nọ Jihova ọ k’omai no, o rẹ w’omai dhesẹ ovuhumuo odidi mai kẹe. Jesu o fi oriruo h’otọ evaọ onana uruo ẹkwoma ẹmeoyo nọ o ro se isẹri kpahe odẹ gbe Uvie Ọghẹnẹ. (Jọn 14:31) U re woma re ma roro kpahe idhere jọ nọ ma sai ro dhesẹ ovuhumuo mai kẹ uyoyou Jihova gbe eghale nọ i re noi ze.
2 Ẹnya n’Uwou Ruọ Uwou: Jesu o wuhrẹ ilele riẹ epanọ a re ro ru iruo ovuẹ Uvie na. Eme riẹ i dhesẹ vevẹ nnọ a jẹ nya n’uwou ruọ uwou, jẹ vaha emamọ usi na. (Luk 9:1-6; 10:1-7) O gwọlọ uyoyou kẹ Ọghẹnẹ gbe ọrivẹ re ma ruabọhọ ẹnya n’ẹthẹ t’ẹthẹ evaọ okenọ ma tẹ nya ku ababọ isiuru gbe ọwọsuọ ahwo. Ghele na, ẹkwoma ere oruo, ma re wo erere keme u re ru ẹrọwọ mai ga viere, imuẹro mai e rẹ ga viere, ẹruore mai o ve je vẹ viere.
3 Eruo iruo evaọ otọ ọkpọvio enjẹle, o lẹliẹ omai duku ahwo nọ ohọo gbe uruame uzẹme na u bi kpe no. (Evia. 14:6) Ahwo jọ a ta no inọ okenọ Osẹri ọ ziọ unuẹthẹ rai yọ a be lẹ kẹ obufihọ. Isẹri ivẹ jọ gbe ọmaha jọ a jẹ nya n’uwou ruọ uwou evaọ ukoliko Caribbean. Okenọ ekpako na a ku iroro na họ nnọ a bi kuhọ re a kpo, ọmaha na ọvo ọ tẹ nya kpohọ unuẹthẹ nọ o kẹle riẹ o te kporo ẹthẹ. Uvovo-aye jọ o te rovie ẹthẹ na. Okenọ ekpako na a ruẹ onana, a tẹ nya je lele uvovo-aye na t’ẹme. O te zizie ai rueva ọ tẹ ta kẹ ae nnọ ọ jẹ nwane lẹ se Ọghẹnẹ re o vi Isẹri na ze re a wuhrẹ iẹe Ebaibol na!
4 Isẹri-Ise Evaọ Iyẹrẹ: Nọ o rrọ bẹbẹ gaga evaọ eria jọ re a di ahwo họ uwou na, isẹri-ise iyẹrẹ yọ edhere owoma nọ a re ro se isẹri kẹ ahwo. Ofariẹ, ahwo buobu a be rria iwou nọ a rẹ jọ rroiro egaga nọ a sae jọ ta usiuwoma n’uwou ruọ uwou hu. Dede na, ovuhumuo mai kẹ uyoyou Jihova o rẹ w’omai re ma rehọ edhere nọ o rovie kpobi rọ rehọ ovuẹ Uvie na rọ nya te ahwo oma, te ẹkwoma isẹri-ise iyẹrẹ.—Itẹ 1:20, 21.
5 Eruo Izihebro: Nọ ma be gwọlọ ahwo nọ a “se ẹgwọlọ abọ-ẹzi rai gboja” na, u fo re ma dao ẹgba mai re ma ruẹ nọ a ru ẹgwọlọ rai na gba. (Mat. 5:3, NW ) Onana o gwọlọ nọ ma re zihe re ma kuame họ ibi uzẹme nọ ma kọ na. (1 Kọr. 3:6-8) Oniọvo-ọmọtẹ jọ evaọ Australia o fi omobe-ovẹvẹ jọ h’ada kẹ aye jọ nọ ọ nwani dhesẹ isiuru tere he. Oniọvo-ọmọtẹ na o te thihakọ daoma wariẹ gwọlọ uwou na. Okenọ ọ rue riẹ, oniọvo mai na ọ tẹ ruẹ nnọ okenọ o no iweze ọsosuọ na kpo no, aye na ọ tẹ dẹ Ebaibol eghaghae jọ. Oniọvo na o te muọ uwuhrẹ họ kugbe ei!
6 Eruo Ebe Iwuhrẹ Ebaibol: Onana o sae jọ abọ odibọgba mai na nọ o rẹ mae kẹ omawere gbe erere. Ẹvẹ o rrọ oghale te re a fiobọhọ kẹ ahwo wuhrẹ kpahe Jihova, re a rue rae nọ a bi ru inwene evaọ izuazọ rai re a ruẹsi ru ei eva were, re a jẹ ruẹ ame-ọhọ Oleleikristi rai evaọ oka omarọkẹ Ọghẹnẹ rai!—1 Tẹs. 2:20; 3 Jọn 4.
7 Evaọ ukere n’otha na, ma te t’ẹme kpahe idhere efa nọ ma jọ wo eghale fiki edhesẹ ovuhumuo kẹ uyoyou Jihova.