Uwuhrẹ 2

Eme Nọ A Rẹ Ta Vevẹ

Eme o gwọlọ nọ who re ru?

Ta eme re ogbotu ra o wo otoriẹ rai lọlọhọ. Onana o gwọlọ (1) emamọ efihiruo ekwakwa ẹmeọta gbe (2) otoriẹ ona ẹme.

FIKIEME U JE WUZOU?

Whọ tẹ be roma totọ ta eme, amọfa a rẹ sai wo otoriẹ ẹme nọ whọ be ta na. Eme nọ a ta vevẹ họ eme nọ a re se gboja.

RE WHỌ sae t’ẹme kugbe omọfa ziezi, whọ rẹ t’ẹme vevẹ hrọ. Ẹme nọ whọ gwọlọ ta ọ sai siuru, tube wuzou dede, rekọ eme na buobu i ti vru otẹrọnọ a wo otoriẹ eme ra buobu hu.

Eme nọ ahwo a wo otoriẹ rai hi e rẹ kake wọ ahwo ho. Ohwo ọ tẹ maki wo urru ulogbo, ọ tẹ be t’eme riẹ jẹhọ akọ, e rẹ wọ amọfa j’owọ họ. O rẹ wọhọ ẹsenọ whọ be jẹ ẹvẹrẹ ọfa, ọnọ enọ i bi yo ẹme ra na a riẹ hẹ. (Jeri. 5:15) Ebaibol na ọ kareghẹhọ omai nọ: “Kọ otẹrọnọ a kporo onwae yọ edo riẹ o wo otọ họ, ono ọ rẹ wọ owọ ẹmo? Ere owhai re, otẹrọnọ wha be jẹ ẹvẹrẹ nọ o wo otọ họ, kẹvẹ ohwo ọ rẹ sae riẹ onọ a tae? Keme wha be te ta onana fihọ ofou.”—1 Kọr. 14:8, 9.

Eme O re Ru nọ Ẹmeunu O Gbe Do Vẹ Hẹ? O sae jọ nọ a rovie unu na ziezi hi. Iriẹ agba nọ e rọ gaga hayo igbenu nọ a rovie ziezi hi e rẹ lẹliẹ ẹme ohwo do họ eva.

Ẹme nọ a rẹ varioma ta o sai ru ei bẹbẹ re a wo otoriẹ ẹme. Oyena o wọhọ epaọ ẹsenọ a bi kporo ẹme nọ ohwo ọ ta fihọ ekasẹte vẹrẹ vi epanọ u fo nọ o rẹ jọ. Eme na e rọ etẹe, rekọ erere rai buobu o vru no.

Evaọ ẹsejọ, oware nọ o rẹ wha ẹme nọ o vẹ hẹ ze họ ẹbẹbẹ jọ evaọ ekwakwa ẹmeọta ugboma na. Rekọ makọ ahwo nọ a re thihakọ ẹbẹbẹ otiọye na a sae daoma ru ẹnyaharo ẹkwoma efihiruo ẹjiroro nọ a jọ uwuhrẹ nana kẹ na.

Rekọ, ẹsibuobu, oware jọ nọ o rẹ wha eme nọ i vẹ hẹ ze họ eme nọ a rẹ ta jẹhọ akọ—gua eme na kugbe nọ u re ru ei bẹbẹ re a wo otoriẹ rai. Ẹbẹbẹ na ọ sae jọ ẹlavrẹ ibieme jọ hayo eme nọ a re se yagha. Ohwo ọ tẹ be gua eme kugbe, enọ i bi yo eme riẹ a sai yo eme na jọ rekọ a ve roro otofa eme efa. Eme ọ ohwo i gbe vẹ hẹ o rẹ sai kpomahọ ewoma ewuhrẹ riẹ.

Epanọ A rẹ Rọ t’Ẹme Vevẹ. Usiavẹ jọ orọ ẹme nọ a rẹ ta vevẹ họ ewo otoriẹ ona eme evaọ ẹvẹrẹ ra. Evaọ evẹrẹ buobu, ekru-ibiẹme sa-sa i re ru ẹme ọsoso via. Ekru-ibiẹme yọ ubiẹme ovo hayo bu viere nọ a rẹ sai se sa evaọ ẹme ọsoso. Evaọ evẹrẹ itieye na, ibiẹme eyena i re do via evaọ okenọ whọ tẹ t’ẹme, dede nọ aikpobi i re wo ẹgba ọvo na ha. Whọ tẹ gwọlọ ru ẹme ra vẹ viere, roma totọ re whọ daoma se ekru-ibiẹme sa-sa na. Eva oke ọsosuọ, onana o sae wọhọ nọ who bi kele eme na, rekọ nọ who bi wuhrẹ na, eme na e te jọ owhẹ unu whra. Re ẹme ọ riẹriẹ, whọ te gua eme jọ kugbe, rekọ a rẹ whaha onana otẹrọnọ u ti ruru otofa eme na.

Ẹme unuovẹvẹ: Re ẹme ọ whrawhra evaọ unu ziezi, whọ sai wuhrẹ ẹmeọta gbe isase evaọ edhere ese ẹme ọvuọvo. Rekọ whọ kuvẹ hẹ re oyena o jọ ẹkoma ẹmeọta ra. O te riẹ do ho.

Otẹrọnọ ẹme ra o re do h’eva, daoma kpare uzou kpehru re whọ kpare agbotọ ra no udu ra. Okenọ who te bi se no Ebaibol ze, kru obe na kpehru ziezi re evaọ okenọ whọ tẹ be kpare ovao no ogbotu na ziọ Ebaibol ra o vẹ gwọlọ ẹro nọ whọ rẹ dina jẹlẹ ọvo. Onana o te lẹliẹ eme ra do lahwe ziezi.

Ewuhrẹ epanọ a rẹ rọ udu t’otọ t’ẹme o sai je ru ẹmeọta ra woma viere. Uzẹme o rọ inọ iriẹ ovao hayo iriẹ nọ e be kpọ ẹwẹ-ọwẹ na nọ i si kekeke o rẹ sai kpomahọ ẹmeọta ra yoyoma. Esikeke otiọye na o sai kpomahọ ọnyakugbe nọ ọ rẹ jọ iroro, uvo, gbe ẹwẹ-ọwẹ ra—eware nọ i fo nọ i ruiruo lọlọhọ.

U fo re a se iriẹ agba na họ re e sae j’owọ vẹrẹ viere kẹ ovuẹ nọ u bi no ẹvori na ze. A re je se igbenu na họ. E rẹ ruẹrẹ oma họ re i rovie je ruru vẹrẹ vẹrẹ re i koko edo buobu nọ o re no unu gbe edhuru na ze họ. Agba gbe igbenu e tẹ rọ kekeke, unu na o sai rovie ziezi hi, edo na ọ vẹ họrọ no udevie ibiakọ na ze. Onana o sae lẹliẹ ohwo kuemeku. Rekọ esehọ agba gbe igbenu na, orọnikọ u dhesẹ nọ ma rẹ nwani fioma h’otọ t’ẹme he. A rẹ rehọ edo kpọ onana vi re ẹme ohwo o vẹ.

Who te bi roro kpahe uyero ra, whọ sae ruẹ nọ u re fiobọhọ re who se do via. Muẹrohọ epanọ who bi ro fi ekwakwa igbunu erọ ẹmeọta na h’iruo. Kọ who bi rovie unu ra ziezi re ẹme o do via ababọ awhaha? Whọ rẹ kareghẹhọ nọ orọnikọ ẹrọo na ọvo họ okwakwa ẹmeọta ha, dede nọ o rọ ovo jọ nọ o rẹ mai ruiruo na. Uriohọ na, agba obotọ na, igbenu na, iriẹ ovao na, gbe iriẹ uvo na i re w’obọ re. Kọ o wọhọ nọ whọ rẹ t’ẹme ababọ ovao nọ u re nuhu? Otẹrọ ere, koyehọ u re vevẹ nọ ẹmeọta ra o vẹ hẹ.

Itepu e tẹ riẹ, rekọdo uvo ra evaọ okenọ whọ be t’ẹme gheghe, wọhọ epanọ whọ rẹ t’ẹme kẹ ohwo evaọ usiuwoma. Rekọdo eme nọ whọ ta evaọ iminiti buobu. Ezọgaviẹ kẹ eme nọ whọ rekọdo na o sai fiobọhọ k’owhẹ riẹ ẹbẹbẹ nọ who wo. Muẹrohọ eria nọ who bi jo si eme, ta eme jẹhọ akọ, hayo se eme jọ yagha, whọ vẹ daoma riẹ oware nọ o so riẹ ze. Who te fi eme obehru na h’iruo, whọ sae kpọ ẹbẹbẹ na vi.

Kọ who wo ẹbẹbẹ ẹmeọta jọ? Wuhrẹ epanọ who re ro rovie unu ra dina vi epanọ who je ru vẹre, jẹ roma totọ se eme viere. S’ẹwẹ rehọ re whọ rọ ẹmẹrera t’ẹme. Ere oruo o fiobọhọ kẹ ibuobu nọ i wo ẹbẹbẹ ẹmeọta t’ẹme vevẹ viere no. Otẹrọnọ whọ rẹ t’ẹme h’akọ, go ẹrọ ra no ibiakọ edhedhe ra okenọ who bi ti se eme nọ i wo s gbe z. Dede nọ ẹbẹbẹ ra ọ te nwani kuhọ kpobi hi, whọ ruawa ha. Kareghẹhọ nọ Jihova ọ salọ Mosis, ọzae nọ o wo ẹbẹbẹ ẹmeọta, re ọ wha ovuẹ riẹ bru ahwo Izrẹl gbe Fẹro ọrọ Ijipti. (Ọny. 4:10-12) U te n’owhẹ eva ze, ọ te rehọ owhẹ ruiruo re, yọ ọ te ghale odibọgba ra avọ obokparọ.

EPANỌ A RE RO RU EI

T’ẹme je se ibieme kpobi vevẹ—avọ osegba, edo nọ o fo, yọ o rẹ vẹrẹ hayo siotọ ga hrọ họ.

Whọ t’eme h’akọ họ hayo ku eme ku hu evaọ edhere nọ enọ e be gaviezọ k’owhẹ a gbẹ riẹ otofa ẹme ra ha.

Dina kpare uzou kpehru, je rovie unu ra ziezi nọ whọ tẹ be t’ẹme.

Wuhrẹ re who ru uriohọ ra, agba ra, igbenu, iriẹ ovao, gbe iriẹ edhuru ra lọlọhọ.

ORIA IRUO: Rọ ẹkoma ra t’ẹme. Ẹvẹ who bi rovie unu ra te? Kọ u fo re whọ dina rovie ei viere re whọ jẹ rehọ iriẹ ovao ra ruiruo viere? Daoma ru ere nọ who bi se Matiu 8:23-27 do via na. Kpare uzou kpehru, re who je ru iriẹ agbotọ ra lọlọhọ.